Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

Ania ti Patpatien ken Ar-aramiden Dagiti Saksi ni Jehova Maipapan iti Panagminatay?

Ania ti Patpatien ken Ar-aramiden Dagiti Saksi ni Jehova Maipapan iti Panagminatay?

Naibasar iti Biblia dagiti ar-aramiden ken patpatienmi maipapan iti panagminatay. Dagitoy ti karaman kadagita:

  • Normal laeng ti agladingit no adda natay nga ay-ayatentayo. Nagladingit dagiti adalan ni Jesus idi adda natay nga ipatpategda. (Juan 11:33-35, 38; Aramid 8:2; 9:39) Gapuna, saanmi nga ibilang a panawen ti panagragragsak ti pannakaimansayag ken pannakaipumpon ti natay. (Eclesiastes 3:1, 4; 7:1-4) Panawen dayta tapno makipagriknakami.—Roma 12:15.

  • Awan puot dagiti natay. Aniaman ti puli wenno kulturami, likliklikanmi dagiti kostumbre wenno kaugalian a saan a naibatay iti Biblia nga adda koneksionna iti pammati nga adda puot dagiti natay ken kabaelanda nga impluensiaan dagiti sibibiag. (Eclesiastes 9:5, 6, 10) Karaman iti dayta dagiti kaugalian kas iti nagarbo a selebrasion kalpasan ti pumpon ken tinawen a pananglaglagip iti natay, panagatang, panagkiddaw ken pannakisarita iti natay, ken dagiti ritual a panagladingit ti nabalo. Saanmi nga ar-aramiden dagita a kaugalian kas panagtulnog iti bilin ti Biblia nga: “Isinayo ti bagbagiyo, . . . ket isardengyo a sagiden ti di nadalus a banag.”—2 Corinto 6:17.

  • Adda namnama dagiti natay. Isursuro ti Biblia nga agbiagto manen dagiti natay ken addanto tiempo nga awanen ti matay. (Aramid 24:15; Apocalipsis 21:4) Daytoy a namnama ti tumultulong kadakami tapno saankami unay a maladingitan, a kas met laeng kadagiti nagkauna a Kristiano.—1 Tesalonica 4:13.

  • Isursuro ti Biblia ti kinapakumbaba. (Proverbio 11:2) Saanmi nga ibilang ti panagminatay kas tiempo ti “panangiparammag” iti kinabaknang wenno panangipakita iti kinatan-ok ti maysa a tao. (1 Juan 2:16) Saankami a mangyur-urnos iti nagarbo a mansayag ken pumpon a nairanta kas pagpalpaliwaan wenno mangiparammag kadagiti agkakangina a lungon ken bado.

  • Saanmi nga ipilit iti dadduma dagiti patpatienmi maipapan iti panagminatay. No maipapan iti dayta, sursurotenmi daytoy a prinsipio: “Tunggal maysa kadatayo makikuentanto iti Dios maipaay iti bagina.” (Roma 14:12) Ngem no maikkankami iti gundaway, ilawlawagmi dagiti patpatienmi iti “naalumamay” ken addaan “nauneg a panagraem.”—1 Pedro 3:15.

Kasano ti pumpon kadagiti Saksi?

Lugar: No kayat ti pamilia nga adda programa ti pumpon, mabalin a maaramid dayta iti lugar a napilida, kas iti Kingdom Hall, funeral home, balay, crematory, wenno iti sementerio.

Programa ti pumpon: Adda palawag a mangliwliwa iti natayan a pamilia a mangilawlawag iti isursuro ti Biblia maipapan iti ipapatay ken iti namnama a panagungar. (Juan 11:25; Roma 5:12; 2 Pedro 3:13) Iti daytoy a programa, mabalin a maipalagip dagiti nasayaat a naaramidan ti natay, a mabalin a maipamaysa dayta kadagiti masursuro iti ulidan nga impakitana.—2 Samuel 1:17-27.

Mabalin a makanta ti maysa a kanta a naibatay iti Biblia. (Colosas 3:16) Maileppas ti programa babaen iti makaliwliwa a kararag.—Filipos 4:6, 7.

Bayad wenno panagkolekta: Saanmi a pagbaybayaden dagiti miembromi iti aniaman a serbisio ti relihionmi, a pakairamanan ti programa ti pumpon, ken saankami met nga agkolekta iti kuarta kadagiti gimongmi.—Mateo 10:8.

Umatender: Uray dagiti saan a Saksi ket mabalin nga umatender kadagiti programa ti pumpon iti Kingdom Hall. Kas kadagiti gimongmi, mabalin nga umay ti amin iti programa ti pumpon.

Umat-atender met kadi dagiti Saksi iti pumpon dagiti sabali ti relihionna?

Agdesision ti tunggal Saksi para iti bagina, ket ibasarna dayta iti nasanay iti Biblia a konsiensiana. (1 Timoteo 1:19) Ngem saankami nga umat-atender kadagiti ibilangmi a saan a maitunos iti Biblia a seremonia ti sabali a relihion.—2 Corinto 6:14-17.

Ammuem ti Ad-adu Pay

Apay a Matay ti Tao?

Mangted liwliwa ken namnama ti sungbat ti Biblia iti daytoy a saludsod.

Ania ti Mapasamak no Matay ti Maysa a Tao?

Ammo kadi dagiti natay ti mapaspasamak iti aglawlawda?

Naikeddeng Kadin ti Ipapataytayo?

Apay nga ibaga ti Biblia nga adda “tiempo ti ipapatay”?