Mapan iti linaonna

Mapan iti segundario a pagpilian

Dagiti Saksi ni Jehova

Iloko

Binalbaliwan Kadi Dagiti Saksi ni Jehova ti Biblia Tapno Maitunos Kadagiti Patpatienda?

Binalbaliwan Kadi Dagiti Saksi ni Jehova ti Biblia Tapno Maitunos Kadagiti Patpatienda?

Saan, no di ket dagiti patpatienmi ti balbaliwanmi no matakuatanmi a saan a maitunos dagita iti Biblia.

Nabayag pay sakbay nga inrugimi nga ipablaak ti Baro a Lubong a Patarus ti Nasantuan a Kasuratan idi 1950, sinukimatmi ti Biblia. Inusarmi ti aniaman a patarus nga adda idi ket dita ti nangibatayanmi kadagiti patpatienmi. Kitaem ti sumagmamano kadagiti nabayagen a patpatien dagiti Saksi ni Jehova, ket ikeddengmo no talaga a maitunos dagitoy iti isursuro ti Biblia.

  1. No ania ti patpatienmi: Ti Dios ket saan a Trinidad. Kuna ti Hulio 1882 a ruar ti Zion’s Watch Tower: “Ammo dagiti agbasbasa iti daytoy a magasin a nupay mamatikami ken ni Jehova ken Jesus, ken iti nasantuan nga Espiritu, ibilangmi a saan a nainkasuratan ti pannursuro a dagitoy ket tallo a Dios ngem maymaysa a persona, wenno maysa a Dios ngem tallo a persona.”

    No ania ti kuna ti Biblia: “Ni Jehova a Diostayo isu ti maymaysa a Jehova.” (Deuteronomio 6:4, Ti Biblia) “Adda maymaysa a Dios, ti Ama nga paggapuan dagiti isu-amin a banag, ket datayo maipaaytayo kencuana; ken maymaysa nga Apo, ni Jesu-Cristo, a gapu kenkuana adda dagiti isu-amin a banag, ken gapu kencuana addatayo.” (1 Corinto 8:6, Ti Biblia) Kinuna ni Jesus: “Ni Ama dacdackel ngem siac.”—Juan 14:28, Ti Biblia.

  2. No ania ti patpatienmi: Awan ti agnanayon a pannakatuok iti umap-apuy nga impierno. Naibatay iti Roma 6:23 iti King James Version ti paulo ti Hunio 1882 a ruar ti Zion’s Watch Tower a, “Dagiti Supapac ti Basol Isu ni Patay.” Kunana: “Nakalawlawag ken simple daytoy a sasao. Isu a nakaskasdaaw ta nakaad-adu dagiti agkunkuna a mamatida iti Biblia kas Sao ti Dios ngem konkontraenda met daytoy a naglawag a sasao ken ipapilitda nga isursuro kano ti Biblia a dagiti supapak ti basol ket agnanayon a pannakatuok.”

    No ania ti kuna ti Biblia: “Ti tao nga agbasol isu ti matay.” (Ezequiel 18:4, 20, Ti Baro a Naimbag a Damag Biblia) Ti maudi a dusa dagidiay bumusbusor iti Dios ket saan nga agnanayon a pannakatuok no di ket “agnanayon a pannakadadael.”—2 Tesalonica 1:9, Ti Baro a Naimbag a Damag Biblia.

  3. No ania ti patpatienmi: Ti Pagarian ti Dios ket pudpudno a gobierno, saan laeng a kasasaad iti puso. Maipapan iti Pagarian ti Dios, kastoy ti kuna ti Disiembre 1881 a ruar ti Zion’s Watch Tower: “Inton maipasdek daytoy a pagarian, maparmekto amin a pagarian ditoy daga.”

    No ania ti kuna ti Biblia: “Iti panawen dagitoy nga agturay, mangipasdekto ti Dios ti langit iti pagarian a pulos a dinto agpatingga. Saanto a maparmek dayta a pagarian ngem gibusannanto dagiti amin a pagarian. Isu laeng ti agpaut iti agnanayon.”—Daniel 2:44, Ti Baro a Naimbag a Damag Biblia.

Ti laeng kadi Baro a Lubong a Patarus ti us-usaren dagiti Saksi ni Jehova a mangsuporta kadagiti patpatienda?

Saan, ta itultuloymi ti agus-usar iti adu a patarus ti Biblia iti panangasabami. Kinapudnona, nupay mangmangtedkami iti libre a kopia ti Baro a Lubong a Patarus kas paset ti libre a panangyadalmi iti Biblia, maragsakankami met a mangyadal iti siasinoman uray no kaykayatna nga usaren ti sabali a patarus.

Ammuem ti Ad-adu Pay

SUNGBAT DAGITI SALUDSOD MAIPAPAN ITI BIBLIA

Adda Kadi iti Biblia ti Doktrina a Trinidad?

Adu a relihion ti mangisursuro a ti Dios ket Trinidad. Kasta kadi ti isursuro ti Biblia?

SUNGBAT DAGITI SALUDSOD MAIPAPAN ITI BIBLIA

Ania ti Impierno? Lugar Kadi Dayta a Pagtutuokan iti Agnanayon?

Madusa kadi dagiti managdakdakes iti umap-apuy nga impierno? Dayta kadi ti supapak ti basol? Basaem dagiti sungbat iti Biblia kadagitoy a saludsod.

SIASINO ITA DAGITI MANGAR-ARAMID ITI PAGAYATAN NI JEHOVA?

Kasano a Limmawag Manen ti Kinapudno a Linaon ti Biblia?

Kasanotayo a masigurado nga umiso ti pannakaawattayo iti isursuro ti Biblia?