Mapan iti linaonna

Mapan iti segundario a pagpilian

Dagiti Saksi ni Jehova

Iloko

No Dumteng ti Didigra, Matignaytayo a Tumulong Gapu iti Ayat

No Dumteng ti Didigra, Matignaytayo a Tumulong Gapu iti Ayat

Tultulongan dagiti Saksi ni Jehova dagiti kapammatianda ken ti dadduma a tattao no tiempo ti rigat. Ar-aramidenda dayta gapu iti ayat, a pakabigbigan dagiti pudno a Kristiano.​—Juan 13:35.

Mabasam iti baba ti dadduma kadagiti tulong a naited iti uneg ti 12 a bulan a nagpatingga idi katengngaan ti 2012. Saan pay a karaman dita dagiti naipaay a naespirituan ken emosional a tulong a kanayon a kakuykuyog ti panangsaranaymi. Dagiti Disaster Relief Committee a dinutokan dagiti branch office-mi ti nangorganisar iti kaaduan kadagita. Nakiraman met dagiti kongregasion kadagita a lugar iti panangited iti tulong.

Japan

Japan: Idi Marso 11, 2011, ti makin-amianan a paset ti Japan ket dinayyeg ti ginggined a nagresulta iti tsunami. Ginasut a ribu a tattao ti naapektaran. Sipaparabur nga inranud dagiti Saksi ni Jehova iti intero a lubong ti kuarta, paglaingan (skill), ken sanikuada tapno makatulong iti panagrekober dagiti biktima. Buyaem ti video-mi maipapan iti panangsaranay kadagiti biktima ti ginggined idiay Japan.

Brazil: Natay ti ginasut a tattao gapu iti layus, panagreggaay ti daga, ken mudslide. Gapuna, kadagiti apektado a rehion, nangipatulod dagiti Saksi ni Jehova iti 42 a tonelada a makan a saan nga alisto a madadael, 20,000 a bote ti danum, 10 a tonelada a bado, ken 5 a tonelada a suplay a mausar iti panagdalus, kasta met dagiti agas ken dadduma pay a banag.

Congo (Brazzaville): Idi bimtak ti maysa a bodega dagiti bala ken bomba, nadadael ti balay ti 4 a Saksi ni Jehova ken naperdi ti balay ti 28 a dadduma pay a Saksi. Naikkan dagiti biktima iti makan ken bado, ket pinadagus dagiti lumugar a Saksi dagiti pamilia a naapektaran iti didigra.

Congo (Kinshasa): Naikkan iti agas dagiti biktima ti kolera. Naited dagiti naidonar a bado kadagiti naapektaran iti layus gapu iti napigsa a tudo. Dagiti adda iti pagbakuitan ket naipaayan iti medikal a tulong, bin-i, ken tinontonelada a bado.

Venezuela: Naglayus ken nag-mudslide gapu iti napigsa a tudo. Tinulongan dagiti disaster relief committee ti 288 a naapektaran a Saksi. Nasurok a 50 a balay ti naipatakder. Maysa pay, tinulonganda dagidiay aggigian kadagiti balay a naapektaran gapu iti panagngato ti danum ti Lake Valencia.

Pilipinas

Pilipinas: Naglayus iti dadduma a paset ti pagilian gapu iti bagyo. Nangipatulod ti sangay kadagiti makan ken bado para kadagiti biktima, ket timmulong dagiti lumugar a Saksi nga agdalus kalpasan nga immes-es ti danum.

Canada: Kalpasan ti dakkel a puor iti kabakiran idiay Alberta, nakaawat ti Slave Lake Congregation iti dakkel a donasion a naggapu kadagiti Saksi iti dayta a rehion a mausar iti panagdalus. Gapu ta sobra ti naawat ti kongregasion a kuarta, nasurok a kagudua ti indonarda para kadagiti biktima ti kalamidad iti dadduma a paset ti lubong.

Côte d’Ivoire: Sakbay, kabayatan, ken kalpasan ti gubat iti pagilian, naipaayan dagiti agkasapulan kadagiti relief goods, pagyanan, ken medikal a tulong.

Fiji: Gapu iti nakaro a layus a resulta ti napipigsa a tudo, nadadael ti taltalon ti kaaduan kadagiti 192 a Saksi a pamilia a naapektaran ket awanen ti pagsapulan ken pangalaanda iti makan. Isu a naipaayanda kadagiti kasapulanda a makan.

Ghana: Dagiti naapektaran iti layus iti makindaya a rehion ti pagilian ket naipaayan kadagiti makan, bin-i, ken baro a pagyanan.

United States: Gapu kadagiti dadakkel nga ipo-ipo, naperdi ti dadduma a paset ti 66 a balay dagiti Saksi iti tallo nga state ken interamente a nadadael ti 12 a balay dagiti Saksi. Uray adda insurance ti kaaduan kadakuada, naipaayanda latta iti pinansial a tulong tapno al-alistoda a makabangon.

Argentina: Tinulongan dagiti kongregasion dagiti Saksi ni Jehova dagiti adda iti abagatan a paset ti pagilian a naperdian iti balay gapu iti lahar.

Mozambique: Nasuplayan iti makan ti nasurok a 1,000 a tattao a naapektaran iti nakaro a tikag.

Nigeria: Naikkan iti pinansial a tulong ti 24 a Saksi a karaman iti nakaro a pannakaaksidente ti maysa a bus. Natulongan met ti adu a tattao nga aggigian iti amianan a paset ti pagilian a naawanan iti balay gapu iti panaglalaban ti nagduduma a tribu ken relihion.

Benin: Naikkan kadagiti agas, badbado, moskitero, mainum a danum, ken pagdagusan dagiti naapektaran iti nakaro a layus.

Dominican Republic

Dominican Republic: Kalpasan ti nagpigsa a bagyo nga Irene, timmulong dagiti kongregasion sadiay iti panangtarimaan, ken nangipaayda kadagiti material a kasapulan.

Ethiopia: Naipaayan iti pinansial a tulong dagiti biktima iti dua a lugar a naapektaran iti nakaro a tikag ken iti maysa a lugar a naapektaran iti layus.

Kenya: Naikkan iti pinansial a tulong dagiti naapektaran iti nakaro a tikag.

Malawi: Naipaayan iti tulong dagiti aggigian iti Dzaleka refugee camp.

Nepal: Napakaruan ti balay ti maysa a Saksi gapu iti landslide. Naibangonan iti temporario a balay, ken tinulongan dagiti kakongregasionna.

Papua New Guinea: Adda dagiti nangigagara a nangpuor iti walo a balay dagiti Saksi. Nayurnos a maibangon manen dagita.

Romania: Nadadael ti balay ti dadduma a Saksi gapu iti layus. Naikkanda iti tulong tapno maibangon manen dagita.

Mali: Nangted ti Senegal, maysa kadagiti kaarrubana a nasion, iti pinansial a tulong kadagidiay awanan iti umanay a makan gapu iti bassit nga apit a resulta ti nakaro a tikag.

Sierra Leone: Dagiti doktor a Saksi a taga-France ket nangted iti medikal a tulong kadagiti Saksi ni Jehova nga aggigian kadagiti lugar a naapektaran iti gubat.

Thailand: Dakkel ti perhuisio nga inyeg dagiti nakaro a layus kadagiti sumagmamano a probinsia. Adda 100 a balay ken 6 a Kingdom Hall a tinarimaan ken dinalusan dagiti relief team.

Czech Republic: Kalpasan a dinadael dagiti layus ti sumagmamano a balay iti Czech Republic, timmulong a simmaranay dagiti Saksi manipud iti kaabayna nga Slovakia.

Sri Lanka: Malmalpasen ti amin a disaster-relief work sadiay para kadagiti naapektaran iti maysa a tsunami.

Sudan: Adda dagiti naipatulod a makan, bado, sapatos ken plastik kadagiti Saksi ni Jehova a napapanaw iti pagyanan gapu iti gerra iti pagilian.

Tanzania: Bayat ti nakaro a layus, napukaw dagiti sanikua ti 14 a pamilia. Nagdonar ti kongregasion iti dayta a lugar kadagiti bado ken mausar iti balay. Maysa met a balay ti naibangon manen.

Zimbabwe: Nangyeg iti bisin ti nakaro a tikag iti maysa a lugar iti pagilian. Naikkan iti makan ken kuarta dagidiay naapektaran.

Burundi: Naipaayan dagiti refugee iti relief assistance, agraman medikal a tulong.