Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

Nalapdan ti Panagpakamatay Idiay Sky Tower

Nalapdan ti Panagpakamatay Idiay Sky Tower

Timmulong ti 80 anyos a Saksi ni Jehova a ni Graham Browne a nangkombinsir iti adda diperensia ti isipna a lalaki a saan a tumpuak iti 328 a metro ti kangatona a Sky Tower iti Auckland, New Zealand. “Idi imbaga ti lalaki a kayatna a makasarita ti maysa kadagiti Saksi ni Jehova,” kinuna ni Graham, “inawagandak dagiti polis tapno kiddawenda a tumulongak.

“Insuot kaniak dagiti empleado ti Sky Tower ti safety harness ken ginalutanda ti Bibliak iti atiddog a tali. Idi kuan, impandak dagiti polis iti makinruar a viewing platform a 192 a metro ti kangatona. Naglamiis ti pul-oy ti angin iti aglawlaw ti tower. Ti lalaki a kayatnan ti tumpuak ket nakauyaoy dagiti sakana a nakatugaw iti akikid a pagnaan iti di unay adayo kaniak .

“Impukkawko a maysaak a Saksi ni Jehova ken kayatko ti tumulong. Kalpasan ti naulimek a panagkararagko, linuktak ti Bibliak ket nangrugiak nga agsao.

“Imbagak ti maipapan iti kinasagrado ti biag. Tema dayta ti nabiit pay a palawagko iti Kingdom Hall-mi.

“ ‘Napategka iti imatang ti Dios,’ kinunak, ‘ken inikkannaka iti nagpateg a sagut—ti biagmo. Ipakitam koma kenkuana nga ipatpategmo dayta a sagut. Pangngaasim, umayka ditoy likud ti safety fence.’

“Binasak met ti sumagmamano a teksto iti Biblia, agraman ti Juan 3:16 a kunana: ‘Ta ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.’

“ ‘Isu nga ay-ayatennaka ti Dios ken kayatna nga agbiagka,’ kinunak kenkuana.

“Idi damo, kasla saan a dumdumngeg ti lalaki. Isu a siuulimek a nagkararagak ken Jehova a sapay koma ta makombinsirko a di tumpuak. Di nagbayag, nagin-inayad a timmakder sa immasideg kaniak. Mariribukan unay.

“ ‘Itay nabiit, adda dagiti Saksi ni Jehova nga immay iti balayko ngem pinapanawko ida,’ kinunana. ‘Makonkonsiensiaak unay. Sapay koma ta mapakawannak.’

“ ‘Ammom, kasta met ti inaramid ti dadduma kadakami sakbay a nagbalinkami a Saksi,’ impatalgedko kenkuana. ‘Sigurado a mapakawannaka ni Jehova.’

“ ‘Agyamanak,’ insungbatna, ‘tumalna met laengen ti panunotko.’

“ ‘Ammom, talaga a madanaganak para kenka,’ intuloyko. ‘Naka-safety harness-ak, ngem no maikagliska, mapukaw ti nagpateg a biagmo. Sigurado a malidayan no kua ni Jehova. Isu a pangngaasim ta umayka ditoy safety fence.’

“Kimmalma met laengen ti langana. ‘Sige,’ insungbatna. ‘Umayak ditan.’

“Idi adda isunan iti viewing platform, insigida nga inasistiran dagiti polis iti natalged a disso. Agarup maysa nga oras met ti panagtungtongmi.”

Talaga a maseknan dagiti Saksi ni Jehova kadagiti tattao, nangruna kadagiti marirriribukan. Iti intero a lubong, us-usarenda ti Biblia tapno iranud ti namnama ken liwliwa. Ipaspasiguradoda kadagiti tattao a pudno a maseknan ti Dios.