Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

Bombero a Naka-Off-Duty, Nangsalbar iti Biag

Bombero a Naka-Off-Duty, Nangsalbar iti Biag

Idi Domingo, Enero 5, 2014, agbibiahe ni Serge Gerardin iti bus a mapan iti pagasambleaan dagiti Saksi ni Jehova iti asideg ti Paris, France, idi naimatanganna ti nakaro nga aksidente. “Adda lugan a nakadungpar iti konkreto a bangen iti igid ti rangtay sa timmayab,” malagipna. “Kalpasanna, timmama dayta iti rangtay, gimmil-ayab sa natnag a pabalintuag.”

Nasurok nga 40 a tawenen a bombero ni Serge. Kas kapitan ti brigada dagiti bombero, insigida a nagresponde. Malagipna: “Nupay sungani ti direksionmi iti haywey, imbagak iti drayber nga isardengna ti bus. Dimsaagak ken nagtarayak a napan iti maur-uram a lugan.” Nakangngeg ni Serge kadagiti mangyik-ikkis iti “Tulongandak! Tulongandak!” Kunana: “Nakaamerikana ken nakakurbataak, ken awan ti awitko a mangprotektar iti bagik. Ngem ipasimudaag dagidiay nga ikkis nga adda dagiti mabalin a masalbar!”

Idi linikmutna ti lugan, nakita ni Serge ti maysa a matartaranta a pasahero isu nga impanna iti natalged a disso. “Imbagana kaniak nga adda pay dua a nabati iti lugan,” kinuna ni Serge. “Kadaydi a tiempo, adun a lugan ti simmardeng. Ngem awan ti makaasideg gapu iti nakaro a gil-ayab.”

Immasideg ti sumagmamano a drayber ti trak a siaawit kadagiti fire extinguisher. Imbilin ni Serge nga iyibusda ti linaon dagiti fire extinguisher iti maur-uram a lugan isu nga apagapaman a nasebseban ti apuy. Ngem di pay nakaruar ti drayber ti nakabaliktad a maur-uram a lugan. Isu a dayta ket binagkat ni Serge ken ti dadduma pay nga immarayat sada inruar ti drayber ken impan iti natalged a disso.

“Iti dayta a kanito,” kinuna ni Serge, “bigla a gimmil-ayab manen ti apuy!” Ngem adda pay nabati a nakabalinsuek ken naka-seat belt a pasahero iti uneg. Simmangpet met ti sabali pay a naka-off-duty a bombero a nakabado iti lalat nga us-usaren dagiti agmotmotorsiklo. “Imbagak a dandanin bumtak ti lugan,” kinuna ni Serge, “isu a ginuyodmi ti lalaki kadagiti takkiagna.” Awan pay maysa a minuto, bimtaken ti lugan.

Idi simmangpet dagiti bombero ken paramediko, isudan ti nangasikaso kadagiti biktima ken nangsebseb iti apuy. Naagasan met dagiti nasugat ken nauram nga ima ni Serge. Idi agluganen ni Serge iti bus a mapan iti pagasambleaan, adda lallaki a kimmamakam ken nagyaman ken Serge.

Anian a yaman ni Serge ta adda idi sadiay tapno tumulong. “Nariknak a responsabilidadko iti Diosko a ni Jehova a tulongan dagidiay a tattao. Maragsakanak ta natulongak ida.”