Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

Dagiti Video a Mangparagsak iti Puso

Dagiti Video a Mangparagsak iti Puso

“Mabasbasa ni Jehova ti puso dagiti nagannak.” Dayta ti panangdeskribir ti maysa nga ama idiay Malaysia kadagiti serye ti animated video nga Agbalinka a Gayyem ni Jehova.

Sipud idi nairuar ti umuna a paset, nangaramiden dagiti Saksi ni Jehova iti serye dagiti animated video a mangitampok ken ni Caleb ken ti pamiliana. Dagiti video, a mabuya itan iti jw.org, isuroda kadagiti ubbing dagiti napateg a leksion maipapan iti naimbag nga ar-aramid ken ti panagbalin a nasinged iti Dios, kas iti no apay a rumbeng a dida agtakaw ken no kasanoda nga agkararag iti Dios.

Ti umuna a video daytoy a serye ket naipatarusen iti 131 a lengguahe a pakagunggonaan dagiti ubbing iti intero a lubong.

Nagsayaat a Reaksion

Insurat ti maysa nga ina nga addaan iti lima nga annak: “Sipud idi naawatmi ti DVD nga Umimdeng, Agtulnog, ket Mabendisionan makalawas ti napalabasen, agarup namin-50 a nabuyamin dayta.”

Ni Millie a taga-England ket agtawen iti 12. Ni manongna a Thomas ket agtawen iti 15 ken addaan iti Down syndrome. Insurat ni Millie: “Addaan ni manongko a Thomas kadagiti video ni Caleb iti iPad-na, isu a maipabuyana dayta kadagiti gagayyemna idiay eskuelaan. Magustuanna dagiti kanta ken nagmayat ti panangkantana kadagita nga uray la nakasangit ti maysa a karelihionanmi. Nakaay-ayat a kitaen.”

Kastoy ti insurat ni Ava a nangibaga nga agedaden iti 8 a tawen, 9 a bulan, ken 25 nga aldaw: “Nakalalaing da Caleb ken ni manangna a mangisuro kadagiti ubbing.”

Insurat met ni Mikaylah: “Innem ti tawenko. Pagyamanan iti DVD nga Umimdeng, Agtulnog, ket Mabendisionan. Isursuronak nga agtulnog kadagiti nagannakko ta dayta ti mangparagsak ken Jehova.”

Makagunggona ti Linaonna

Maysa nga agkabannuag nga animator (eksperto iti panagaramid kadagiti cartoons) a saan a maysa kadagiti Saksi ni Jehova ti nagbuya iti video a Dakes ti Agtakaw. Bimmilib unay nangruna idi naammuanna a maysa la a bassit a grupo dagiti animator ti nangaramid iti dayta. Kinunana: “Adda dagiti am-ammok nga agtrabtrabaho kadagiti dadakkel ken babbabassit nga studio ti animation. No dadduma, pampanunotek no kasano ngata ti agtrabaho kadagiti kasta a lugar. Ngem kinaagpaysuanna, amin a trabaho ken panagreggetda ket mangpataud laeng iti pagkakatawaan dagiti tattao iti sumagmamano nga oras. Agingga la ditan. Ngem dagiti ar-aramidenyo ket mangpasayaat iti biag dagiti ubbing, isursurona ida nga agaramid iti naimbag, liklikan ti dakes, ken tulonganna ida nga agaramid iti nasayaat a desision. Adda panggep ti ar-aramidenyo, banag a makatulong kadagiti tattao.”

Umanamong dagiti nagannak iti intero a lubong. Insurat ti maysa nga ina: “Binuya ti tallo ti tawenna nga anakko a ni Quinn ti video a Pannakigayyem ken Jehova. Iti tengnga ti kanta, kinitanak, inkabilna ti bassit nga imana ti barukongna sana kinuna: ‘Mommy, maragragsakanak a mangbuybuya iti daytoy a video.’ ”