Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

Dagiti Picture a Mangpapintas Kadagiti Artikulo

Dagiti Picture a Mangpapintas Kadagiti Artikulo

Kasano ti panangala dagiti photographer-mi kadagiti picture a tumulong tapno agbalin a napintas ken nalaklaka a maawatan dagiti artikulo kadagiti publikasionmi? Kas panangilawlawag kadagiti ar-aramidenda, kitaentayo no kasano a nadisenio ken naretrato ti akkub ti Septiembre 2015 nga Agriingkayo! *

  • Disenio. Kalpasan a nabasada ti artikulo a “Ti Umiso a Lugar ti Kuarta iti Biagmo,” nagaramid dagiti designer ti Art Department, nga adda iti Watchtower Educational Center idiay Patterson, New York, kadagiti drowing a mangirepresentar iti linaon ti artikulo. Sa ipakitada dagita iti Writing Committee ti Bagi a Manarawidwid—ti mangpili no ania a konsepto ti maretrato.

  • Lokasion. Imbes nga iti agpaypayso a banko ti pagpiktiuranda, inusar ti photography team ti maysa kadagiti lobby iti Watchtower Educational Center kas sinsinan a banko. *

  • Panagpili iti Model. Saksi ni Jehova ti amin a model a napili a mangirepresentar kadagiti gagangay a kliente ti banko iti maysa a siudad. Mairekord no sino dagiti model tapno saanda unay a maulit-ulit a mausar para kadagiti publikasionmi.

  • Props. Nagusar ti Art Department kadagiti kuarta ti sabali a nasion tapno kasla iti ruar ti Amerika ti ayan ti banko. Nagusar met ti photography team kadagiti props tapno agbalin a kasla agpaypayso ti eksena. “Saan a mabalin ti tsamba-tsamba laeng,” kuna ti photographer a ni Craig.

  • Bado ken make-up. Iti eksena iti banko, dagiti model ti mismo a nagitugot kadagiti badoda. Ngem no ti eksena ket maipapan idi un-unana wenno no agkasapulan kadagiti espesial nga uniporme, mabalin nga ag-research dagiti taga-Art Department sa aramidenda dagiti maibagay a kostium. Make-up-an dagiti make-up artist dagiti model tapno bumagay ti langada iti estoria, iti panawen a nagbiag ti karakter nga ak-akmenda, wenno iti lugar iti eksena a maretrato. “High-resolution itan dagiti kamera ken iskrin a maus-usar, isu a makitan uray dagiti nagbabassit a detalye,” kuna ni Craig, “masapul ngarud nga eksakto ti pannakaiplastar ti amin. Ta uray bassit laeng a kamali, madadaelen ti picture.”

  • Photo session. Sinigurado dagiti photographer a ti lighting iti eksena iti banko ket aglanglanga nga aldaw. Kada photo session, masapul a siguraduen dagiti photographer a husto ti lighting (lawag ti init, lawag ti bulan, wenno artipisial a lawag), bumagay iti lawag a dati nga addan iti lokasion ti eksena, ken maitunos iti emosion iti eksena. “Saan a kas iti video,” kuna ni Craig, “maysa laeng a picture ti mabalinmi nga usaren a mangipakita iti emosion ti eksena, isu a nakaim-importante ti lighting.”

  • Panag-edit. Kalpasan dayta, pinagbalin dagiti editor a blurred ti kuarta a nausar tapno saan a ti nasion a pakaus-usaran ti kuarta ti pagpokusan dagiti agbasa, no di ket kadagiti tattao iti ladawan. Nalabaga ti talaga a kolor dagiti frame ti ridaw ken tawa, ngem binaliwan dagiti editor ket pinagbalinda a berde—isu a bimmagay iti kolor a nausar iti dayta a ruar ti magasin.

Malaksid kadagiti photographer nga adda idiay Patterson, adda pay dagiti photographer kadagiti branch office iti intero a lubong—idiay Australia, Brazil, Canada, Germany, Japan, Korea, Malawi, Mexico, ken South Africa—a mabalin a pagalaan kadagiti picture a mausar kadagiti publikasionmi. Kada bulan, agarup 2,500 a picture ti inaynayon ti Art Department iti database-da. Adu kadagita ti maus-usar kadagiti magasin a Pagwanawanan ken Agriingkayo!, nga iti kada ruar dagita idi 2015 ket adda napagtipon a nasurok a 115 a milion a nayimprenta a kopia. Tapno ad-adu pay ti maammuam, mabalinmo ti agpasiar kadagiti pasilidadmi idiay Patterson, New York, wenno iti sadinoman a branch office-mi iti intero a lubong.

Panangipaima iti magasin iti pangasabaan

^ par. 2 Ad-adu a picture para iti akkub ti maretrato ngem iti talaga a mausar. Uray no kasta, adu kadagiti picture a saan a nausar, ti mainayon iti library dagiti picture sa mausar iti sabali a proyekto.

^ par. 4 No maala dagiti picture iti maysa a kalsada ti siudad, kaaduanna a dumawat ti Art Department iti permit kadagiti opisial iti dayta a lugar. Ibagada no mano ti tao a karaman, balor dagiti equipment, ken klase ti lighting a mausar.

Ammuem ti Ad-adu Pay

Ania ti Bethel?

Ti Bethel ket naisangsangayan a lugar nga addaan iti nakapatpateg a panggep. Ammuem ti ad-adu pay maipapan kadagiti agserserbi sadiay.

Kasano a Maisursurat ken Maipatpatarus Dagiti Literatura Dagiti Saksi ni Jehova?

Mangpatpataudkami kadagiti literatura iti nasurok a 750 a lengguahe. Apay nga ar-aramidenmi daytoy?