Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

100 a Tawenen ti Musika a Mangidaydayaw iti Dios

100 a Tawenen ti Musika a Mangidaydayaw iti Dios

“Kayatko a mapanka iti Columbia Studios idiay New York City ket kantaem ti maysa kadagiti himnotayo. Propesional ti panangirekordda iti dayta. Ngem dimo ibagbaga iti asinoman ti aramidem.”

William Mockridge

Iti maudi a paset ti 1913, tinungpal ni William Mockridge dayta a naisangsangayan nga impaaramid ni Charles Taze Russell. * Dayta a kanta a pagaammo ti dadduma kas “The Sweet By-and-By,” ket nairekord iti 78-rpm a plaka. Idi agangay, naammuan ni William a mausar gayam dayta iti panglukat a paset ti “Photo-Drama of Creation,” maysa a pabuya maipapan iti nairekord a palawag ken musika a naibasar iti Biblia a napakuyogan iti awan unina a pelikula (silent movie) ken ladladawan a naipinta kadagiti glass slides. Iti New York City ti damo a nakaipabuyaan ti “Photo-Drama” idi Enero 1914.

Ti inrekord ni William ket maysa laeng iti nasurok a 50 a rekording a pinatokar dagiti opereytor ti ponograpo no maipabuya idi ti “Photo-Drama” iti Ingles. Kaaduan kadagita a rekording ket pinutar ti dadduma. Ngem ti sumagmamano, agraman ti kinanta ni William, ket impairekord dagiti Bible Students sada kinanta. Dagiti liriko dagita a kanta ket inadawda iti Hymns of the Millennial Dawn a maysa kadagiti libro a pagkantaanda.

Panangusig iti Kaipapanan Dagiti Liriko

Iti adu a tawen, dagiti kanta nga insurat ti sabali ti us-usaren dagiti Saksi para iti panagdaydayawda. Ngem no kasapulan, baliwanda dagiti liriko tapno ipakitada ti pannakaawatda iti ibagbaga ti Biblia.

Kas pagarigan, maysa kadagiti nausar iti “Photo-Drama” ket ti “Our King Is Marching On” a naibatay iti kanta a “Battle Hymn of the Republic.” Kastoy ti rugi ti “Battle Hymn”: “Mine eyes have seen the glory of the coming of the Lord (Dagiti matak makitada ti dayag ti iyaay ti Apo).” Ngem binaliwan dagiti Bible Students ti lirikona iti: “Mine eyes can see the glory of the presence of the Lord (Dagiti matak nakitada ti dayag ti kaadda ti Apo).” Dayta a panangbaliw ti mangipakita iti pammatida a ti panagturay ni Jesu-Kristo ket saan laeng a maipapan iti iyaayna no di ket karaman pay ti kaaddana iti maysa a partikular a periodo ti tiempo.Mateo 24:3.

Idi naipablaak ti Singing and Accompanying Yourselves With Music in Your Hearts (Agkankanta ken Pakpakuyoganyo ti Bagiyo iti Toktokar Kadagiti Pusoyo) idi 1966, inikkatda dagiti musika a pagaammo a nagtaud iti sekular wenno iti sabali a relihion. Iti dayta a tawen, nangbuangay dagiti Saksi iti bassit nga orkestra ket inrekordda kadagiti plaka ti amin a 119 a kanta iti dayta a libro. Dagita a plaka ti inusar dagiti kongregasion no agkantada kadagiti gimongda, ken maragragsakan ti dadduma a Saksi a dumngeg kadagita iti pagtaenganda.

Idi 2009, impablaak dagiti Saksi ni Jehova ti baro a pagkantaanda a Sing to Jehovah (Kantaanyo ni Jehova). Adda met vocal rendition dagita a mairekrekord iti adu a lengguahe. Idi 2013, rinugian dagiti Saksi nga ipablaak dagiti pang-ubbing a music video. Napauluan ti maysa kadagita iti Pray Anytime. Kada bulan, dagiti bumisbisita iti jw.org ket minilion a daras nga agi-download kadagiti kanta.

Adun ti nangyebkas iti panangapresiarda kadagitoy a kanta. Insurat ti maysa a babai a ni Julie maipapan iti Kantaanyo ni Jehova: “Nagpipintas dagiti baro a kanta! No maymaysak, dengdenggek dagidiay mangyebkas iti pudpudno a marikriknak. Gapu iti dayta, timmibker ti relasionko ken Jehova ken mas determinadoak itan a mangipaay kenkuana iti aminko.”

Kastoy ti insurat ti maysa nga ina nga agnagan Heather maipapan iti epekto ti video a Pray Anytime kadagiti annakna nga agtawen iti pito ken siam: “Dayta ti nakatulong kadakuada a mangyugali iti agkararag, saan laeng a no agriingda wenno no kaduadakami, no di ket iti aniaman nga oras a kayatda ti makisarita ken Jehova.”

^ par. 3 Ni Charles Taze Russell (1852–1916) ti mangidadaulo idi kadagiti Bible Students, kas awag idi kadagiti Saksi ni Jehova.