Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

Pannakipagtrabaho Kadagiti Saksi ni Jehova Idiay Warwick

Pannakipagtrabaho Kadagiti Saksi ni Jehova Idiay Warwick

Adu ti masmasdaaw iti kinamanagsakripisio dagiti tumultulong iti konstruksion idiay Warwick. Kuna ti direktor ti kompania a nangikabil kadagiti elebeytor iti maysa a trabahador: “Nakaskasdaaw ti ar-aramidenyo. Kaaduan a tao ita ket naimut iti orasda.”

Idi naammuanna ken dagiti kakaduana a dagiti agibangbangon iti sangalubongan a hedkuarter dagiti Saksi ni Jehova idiay Warwick, New York, ket volunteer, impagarupda nga asideg laeng ti naggapuan dagitoy a Saksi ken Sabado ken Domingo laeng ti trabahoda. Nasdaawda idi naammuanda nga adda dagiti nagikkat iti trabaho ken naggapuda iti nadumaduma a paset ti pagilian tapno umayda tumulong iti sumagmamano a bulan, wenno tawtawen pay ketdi.

Idi ngudo ti 2015, agarup 23,000 a Saksi ti nagboluntario idiay Warwick a kaduada dagiti miembro ti pamilia ti United States Bethel. Adda met 750 a construction worker a saan a Saksi ni Jehova a timmulong tapno maipalpas ti trabaho sigun iti eskediul. Nagdakkel ken nagsayaat ti epektona kadagitoy a trabahador ti pannakipagtrabahoda kadagiti Saksi ni Jehova.

Makapabang-ar a Pagtrabahuan

Kastoy ti insurat ti manedyer ti maysa a kompania nga agar-aramid iti tawa ken pagdiding: “Masmasdaaw dagiti trabahador ti kompaniami a karaman iti daytoy a proyekto gapu iti ugali dagiti nakatrabahuanda. Isu nga adu kadakami ti mayat nga agtrabaho iti daytoy a proyekto.”

Adda sabali pay a kompania a nangipatulod kadagiti trabahador tapno tumulong iti panangipatakder kadagiti residence building. Idi nalpasen ti kontrata ti kompania, kayat ti tallo a trabahadorda ti agtalinaed iti Warwick. Nagikkatda iti trabahoda sa simrekda iti sabali a kompania a madama pay laeng idi nga agtrabtrabaho sadiay.

Nagsayaat ti epektona iti dadduma a trabahador dagiti maitunos iti Biblia nga ugali nga impakita dagiti Saksi. Adda lalaki nga agtrabtrabaho iti kompania a nagaramid iti pundasion dagiti building. Kalpasan ti sumagmamano a bulan a panagtrabahona idiay Warwick, nadlaw ni baketna a simmayaat ti ugali ken panagsasaona. Maragragsakan a nangibaga: “Nagdakkel ti nagbaliwanna!”

“Uray Dagiti Babbai a Saksi Ket Umayda Agtrabaho”

Adu kadagiti Saksi a nagtrabaho iti site ket babbai. Saanda la a nagmaneho iti bus, nagdalus iti kuarto, ken nagtrabaho iti opisina no di ket inurnosda pay ti trapiko, nagmanehoda iti heavy equipment, pinagsisilpoda dagiti fiber-optic cable, inikkanda iti proteksion dagiti tubo, nagikapetda iti drywall, nagiplastarda iti tubo, ken timmulongda iti panagbuhos. Nakagaggagetda!

Napaliiw ti saan a Saksi a nangikabil kadagiti atep a no bumaban iti bus dagiti aggaassawa, adda dagiti agkibin a mapan iti trabahoda. Nagustuanna dayta. Nakitana met a kasla saan a mabambannog dagiti babbai. “No makitam dagiti naasawaan a babbai iti site, kunam no simmurotda laeng iti asawada,” kinunana. “Ngem no agtrabahodan, adu ti malpasda! Adun a proyekto ti nagtrabahuak iti intero a New York City, ngem awan pay ti nakitak a kastoy.”

Sabsabali ti winter idi 2014/2015 isu a nagmayat koma ti agkukot iti uneg ti balaymo imbes nga agmalmalem nga agtrabahoka iti ruar. Malagip ni Jeremy, maysa a Saksi a timmulong iti panangyurnos iti trabaho iti site: “No nalamiis idi ti panawen, masansan a damagen kaniak ti maysa a foreman ti maysa a kompania, ‘Agobra met inton bigat dagiti babbai a kaduayo?’

“‘Wen.’

“‘Uray dagiti adda iti ruar nga agur-urnos iti traffic?’

“‘Wen.’

“Idi kuan, kunana a binagaanna dagiti trabahadorna nga agreportda iti trabaho ta uray dagiti babbai a Saksi ket umayda agtrabaho!”

Nagustuan Dagiti Drayber ti Bus ti Trabahoda

Nasurok a 35 a drayber ti bus ti nabayadan a mangdagas ken mangitulod kadagiti volunteer idiay Warwick manipud iti paggigiananda.

Sakbay ti maysa a biahe, timmakder ti drayber sa simmango kadagiti pasaherona. “Magusgustuankayo nga imanehuan,” kunana. “Pangngaasiyo man ta ag-email-kayo ken boss-ko ket ibagayo a ditoyak lattan. Nagadu ti naammuak iti Biblia gapu kadakayo. Diak idi ammo ti nagan ti Dios ken addanto gayam ti paraiso ditoy daga. Saanakon a mabuteng a matay. Awan pangisukatak iti pannakikaduak kadakayo. Makitadakto idiay Kingdom Hall inton sumaruno a day-off-ko.”

Kuna ni Damiana, maysa a Saksi a volunteer idiay Warwick: “Maysa nga aldaw, idi nakalugankamin iti bus, kuna ti draybermi nga adda kano ibagana. Kunana nga addan 4,000 a Saksi nga intulod ken dinagasna iti nadumaduma a construction site-tayo iti New York. ‘Adda latta babassit a diyo pagpapadaan,’ kunana, ‘ngem baybay-anyo latta dagita ken agtitinnulongkayo. Nagmayat dayta.’ Imbagana pay a magusgustuanna ti makisarsarita kadakami.

“Idi nalpasen nga agsao, dinamag ti maysa a Saksi nga adda iti bus, ‘Magusgustuam kadi no agkakantakami?’

“Nagkatawa sa imbagana, ‘Wen! Kantaentayon ti 134?’” *

^ par. 22 Ti kanta 134, manipud iti Kantaanyo ni Jehova, ket napauluan iti “Inton Mapabaro ti Amin.” Iladawanna ti ragsak dagiti agbiagto iti baro a lubong ti Dios.

Ammuem ti Ad-adu Pay

Ania ti Bethel?

Ti Bethel ket naisangsangayan a lugar nga addaan iti nakapatpateg a panggep. Ammuem ti ad-adu pay maipapan kadagiti agserserbi sadiay.

Ania a Kita ti Tattao Dagiti Saksi ni Jehova?

Mano ti am-ammom a Saksi ni Jehova? Ania a talaga ti ammom maipapan kadakami?