Mapan iti linaonna

Mapan iti segundario a pagpilian

Dagiti Saksi ni Jehova

Iloko

Koleksion ti Retrato iti Warwick 1 (Mayo Agingga iti Agosto 2014)

Koleksion ti Retrato iti Warwick 1 (Mayo Agingga iti Agosto 2014)

Agipatpatakder dagiti Saksi ni Jehova iti agbalinto a sangalubongan a hedkuarterda iti Warwick, New York. Manipud Mayo agingga iti Agosto 2014, adu ti nagapuanan dagiti agtrabtrabaho iti konstruksion iti pannakaibangon ti Vehicle Maintenance Building, ti Administration Offices/Services Building, ken ti residence building C ken D. Ipakita dagiti naurnong a retrato ti dadduma a nagapuanan kabayatan dayta a tiempo.

Pannakailadawan ti kompleto a Warwick complex. Manipud iti makinngato a kannigid nga agpakannawan:

  1. Vehicle Maintenance Building

  2. Visitor Parking Building

  3. Maintenance Building/Resident Parking

  4. Residence B

  5. Residence D

  6. Residence C

  7. Residence A

  8. Administration Offices/Services Building

Mayo 1, 2014—Lugar a pagibangonan iti Warwick

Buya manipud iti makin-abagatan a laud, a matannawagan ti Sterling Forest Lake (Blue Lake) iti amianan. Iti makinsango a paset, maar-aramid ti basement ti residence D. Iti asideg ti lake, maisagsagana ti pannakakonkreto ti residence C.

Mayo 14, 2014​—Sabali a lugar a pakaar-aramidan ti panagsangal

Dagiti trabahador nga agas-asembol iti banio, a maawagan pod, a maikabil kadagiti residence building. Addaan dagitoy a pod kadagiti frame, wallboard, adda met maiplastar a tubo ken waya ti koriente, pagnaan ti angin, ken pannakaserra ti bathtub. Makompletonto laeng ti banio inton maiplastar ti pod iti residence building.

Mayo 22, 2014​—Vehicle Maintenance Building

Dagiti tubero nga agtrabtrabaho iti basement. Bayat ti panagibangon, agserbi dayta kas panganan ti agarup 500 a trabahador, ken adda pay dadduma a paset ti building a panganan ti 300 pay a trabahador. Inton dandani malpas ti proyekto, maikkatto daytoy a temporario a dining room tapno mairingpas daytoy a building para iti pannakamantener dagiti lugan.

Hunio 2, 2014​—Vehicle Maintenance Building

Dagiti trabahador a mangiwarwaras iti espesial ti pannakaisaganana a daga para iti atep (green roof). Dagita nga atep nga addaan kadagiti agtubo a ruot ket makatulong iti aglawlaw gapu ta pabassitenna ti mausar nga enerhia, kissayanna ti agayus a danum gapu iti tudo, ken sagatenna dagiti rugit manipud iti tudo.

Hunio 5, 2014—Administration Offices/Services Building

Daytoy a patakder ket buklento ti tallo nga agdedekket a pasdek, a ti kalawa ti suelo dagitoy ket agdagup iti 42,000 a metro kuadrado (450,000 sq ft). Makita ditoy dagiti kontraktor a mangiplasplastar kadagiti landok a mausar para kadagiti adigi.

Hunio 18, 2014​—Vehicle Maintenance Building

Trabahador nga agus-usar iti propane torch para iti aspalto nga atep. Nakasuotda kadagiti harness tapno saanda a matnag.

Hunio 24, 2014​—Residence C

Pannakaiplastar ti naasembol a ductwork ken HVAC equipment. Kadagiti Saksi nga agtrabtrabaho kadagiti proyekto iti Warwick, agarup 35% kadakuada ket babbai.

Hulio 11, 2014​—Montgomery, New York

Nagatang daytoy a pasilidad idi Pebrero 2014 a mausar iti proyekto. Agserbi daytoy a pasilidad kas bodega ken lugar a pagsangalan. Ti uneg daytoy ket aglawa iti 20,000 a metro kuadrado (220,000 sq ft). Dagiti makita a puraw iti makinngato a kannawan ti retrato ket dagiti pod ti banio a nakasaganan a maipatulod.

Hulio 24, 2014​—Residence C

Ti makitkita ditoy ket ti makin-amianan a daya a paset ti site. Agnaedto ditoy a pasdek ti agarup 200 a miembro ti hedkuarter. Ti kadakkel ti kaaduan a kuarto ket adda iti nagbaetan ti 30 ken 55 a metro kuadrado (350 ken 600 sq ft). Addaanto dagitoy iti bassit a kosina, banio, ken bassit a beranda.

Hulio 25, 2014​—Maintenance Building/Resident Parking

Maisagsagana ti site a pagibangonan. Iti makinngato a kannigid ti retrato, rumrumeken ti makina dagiti nakali a bambanag a mausarto iti proyekto. Inton malpas ti intero a proyekto, agarup 260,000 a metro kubiko (340,000 cu yd) a daga ti maikkaten manipud iti lugar a pagibangonan iti Warwick. Inaldaw nga agarup 23 a bagon ti maus-usar.

Hulio 30, 2014​—Vehicle Maintenance Building

Mamulmulaan dagiti atep kadagiti ruot.

Agosto 8, 2014​—Lugar a pagibangonan iti Warwick

Manipud iti boom (atiddog a paset a pagibagkat) ti dakkel a crane, makita ti buya ti makin-abagatan a laud manipud iti ngatuen ti office building. Iti makimbaba a kannigid, makita ti nalpasen a Visitor Parking Building. Inaldaw a mapno daytoy kadagiti lugan dagiti agtrabaho. Dadduma a Saksi ti agmaneho iti 12 nga oras a mapan iti site tapno agboluntario iti tallo wenno uppat laeng nga aldaw.

Agosto 13, 2014​—Vehicle Maintenance Building

Dandanin malpas ti temporario a dining room. Babaen kadagiti video monitor (saan pay a naikapet) ken dagiti speaker a naikapet iti bobida, dagiti trabahador mangngeg ken mabuyada ti morning worship ken dadduma pay a naespirituan a programa manipud iti sanga nga opisina ti United States.

Agosto 14, 2014​—Administration Offices/Services Building

Pannakabuhos ti umuna a kadsaaran. Iti kannawan, agus-usar ti maysa a trabahador iti concrete vibrator tapno masigurado nga awan awang ti konkreto ken nasaysayaat ti pannakasedsed ti konkreto.

Agosto 14, 2014​—Administration Offices/Services Building

Dagiti tubo a pagnaan ti waya ti koriente iti tengnga ti pasdek, a nakasaganan a mabuhusan iti basement slab.

Agosto 14, 2014​—Administration Offices/Services Building

Dandanin malpas ti pannakabuhos ti suelo ti umuna a kadsaaran. Daytoy pay laeng ti kaaduan a buhos iti proyekto iti Warwick, nga agdagup iti 540 a metro kubiko (700 cu yd). Ti naibuhos a semento ket naisagana iti batch plant (pakatemplaan ti semento ken graba) nga adda iti site, sa intulod ti walo a mixing truck ken nausar ti dua a concrete pump. Naibuhos dayta iti agarup 5.5 nga oras. Iti tengnga ti retrato, naipatakder ti maysa kadagiti torre nga ayan ti agdan ti building.

Agosto 14, 2014​—Residence C

Maar-aramid ti barandilias ti atep. Iti makinngato a kannawan ti retrato, madama a maar-aramid ti basement ti residence A.

Agosto 15, 2014​—Residence C

Ingatngato ti crane iti maikatlo a kadsaaran ti nalpasen a pod ti banio. Adu dagiti material a nasangal a nasaksakbay para iti proyekto iti Warwick. Gapu iti dayta, maliklikan ti panaglilinnetnet iti site ken al-alisto ti trabaho.

Agosto 20, 2014​—Residence C

Dagiti kontraktor nga agikapkapet kadagiti semento a diding, a naaramid a nasaksakbay ken nainut iti enerhia. Natinaan dagiti konkreto a diding tapno saanen a kasapulan a mapintaan ken basbassit ti kasapulan a pannakamantenerna. Gapu ta alisto a maiplastar, makatulong daytoy iti pannakalpas ti proyekto iti naikeddeng a tiempo.

Agosto 31, 2014​—Lugar a pagibangonan iti Warwick

Buya manipud iti makin-abagatan a laud. Iti makinsango a paset, nakasaganan dagiti pormas para iti sumaganad a kadsaaran ti residence D. Iti likud dayta, dandanin malpas ti istraktura ti residence C.