Mapan iti linaonna

Mapan iti segundario a pagpilian

Dagiti Saksi ni Jehova

Iloko

Koleksion ti Retrato iti Warwick 3 (Enero Agingga iti Abril 2015)

Koleksion ti Retrato iti Warwick 3 (Enero Agingga iti Abril 2015)

Iti daytoy a koleksion ti retrato, makita ti nagrang-ayan ti trabaho iti baro a hedkuarter dagiti Saksi ni Jehova manipud Enero agingga iti Abril 2015.

Pannakailadawan ti kompleto a Warwick complex. Manipud iti makinngato a kannigid nga agpakannawan:

  1. Vehicle Maintenance Building

  2. Pagparkingan Dagiti Bisita

  3. Maintenance Building ken Pagparkingan Dagiti Residente

  4. Residence B

  5. Residence D

  6. Residence C

  7. Residence A

  8. Offices/Services Building

Enero 2, 2015—Vehicle Maintenance Building

Ni Harold Corkern, a katulongan iti Publishing Committee ti Bagi a Manarawidwid, ket nangipaay iti Nainkasuratan a palawag a natemaan iti “Itultuloyyo nga Aramiden ti Amin a Kabaelanyo.” Regular nga adda bumisbisita nga agpalawag iti Warwick a mangparegta kadagiti trabahador.

Enero 14, 2015—Offices/Services Building

Ti puraw a plastik a trapal protektaranna dagiti trabahador ken makatulong kadakuada a mangileppas iti trabahoda bayat ti winter. Daytoy a seksion ti pasdek ti ayanto ti panganan, infirmary, kosina, ken paglabaan.

Enero 16, 2015—Residence D

Agsagsagana dagiti elektrisian nga agikapet iti waya. Nasurok a 12,000 a metro (40,000 pie) a kable ti naikapeten kadagiti residence building. Apaman a nagatang ti daga iti Warwick, nangrugin ti trabaho mainaig iti elektrikal ken agtultuloy dayta agingga a malpas ti proyekto.

Enero 16, 2015—Residence A

Maysa a trabahador a mangikabkabil iti duct tape iti balkonahe tapno maisagana para iti waterproofing. Ditoy, dagiti balkonahe iti kangatuan a kadsaaran ket makalupkopan iti polymethyl methacrylate (PMMA)—maysa a water-resistant membrane nga alisto a mai-apply kas likido.

Enero 23, 2015—Residence A

Agama nga elektrisian nga agikapkapet iti waya ti koriente a mapan iti tunggal kuarto.

Pebrero 6, 2015—Vehicle Maintenance Building

Mangmangan iti pangngaldaw dagiti mabisin a trabahador iti temporario a panganan. Inaldaw a nasurok a 2,000 a pangaldaw ti maisagsagana.

Pebrero 12, 2015—Maintenance Building ken Pagparkingan Dagiti Residente

Agikabkabil dagiti trabahador iti landok para iti basement kadagiti maintenance shop.

Pebrero 12, 2015—Residence C

Surat dagiti ubbing, nga agyamyaman kadagiti trabahador. Adu dagiti boluntario nga apagbiit laeng. Kinapudnona, agarup 500 a baro a trabahador ti linawas a sumangpet. Iti bulan ti Pebrero, agarup 2,500 ti inaldaw a nagtrabaho iti proyekto iti Warwick.

Pebrero 24, 2015—Pagibangonan iti Warwick

Agarup 60 a porsiento iti proyekto ti nalpasen. Manipud Enero agingga iti Abril 2015, nairingpas ti estruktura dagiti residence building ken ti estruktura a landok ti Offices/Services Building. Bayat dayta a tiempo, rinugian met dagiti trabahador nga iplastar dagiti konkreto a diding iti Maintenance Building, aramiden ti pagnaan a mamagkonektar kadagiti residence, ken tarimaanen ti dam iti Sterling Forest Lake (Blue Lake).

Pebrero 25, 2015—Offices/Services Building

Buya ti maysa nga stair tower manipud iti baba. Dagiti nabayadan a kontraktor ti nagipatakder kadagiti pormas daytoy lima ti kadsaaranna a tower, ket dagiti boluntario a Saksi ti nagibuhos iti semento iti dayta.

Pebrero 26, 2015—Maintenance Building ken Pagparkingan Dagiti Residente

Iti nalamiis nga aldaw, agikabkabil dagiti trabahador iti landok para iti umuna a kadsaaran. Agarup 127 a sentimetro (50 pulgada) ti nagtinnag a niebe iti Warwick manipud Enero agingga iti Marso. Palpalaen dagiti trabahador dagiti niebe tapno nawaya ti agtrabaho, ken adda dagiti estasion a pagpapudotan dagiti trabahador.

Marso 12, 2015—Pagparkingan Dagiti Bisita

Maikapkapet ti metal a galba iti nasaksakbay ti pannakasangalna a balabala dagiti atep. Iti ngudo ti Abril, nakompleto ken naikapeten ti kaaduan a bayangbayang (gabled roof) dagiti residence building. Malpas a maatepan ti Residence B iti katengngaan ti Hunio.

Marso 18, 2015—Maintenance Building ken Pagparkingan Dagiti Residente

Buya ti Residence B manipud iti tower crane.

Marso 18, 2015—Maintenance Building ken Pagparkingan Dagiti Residente

Iti Resident Parking Garage, kitkitaen dagiti tubero dagiti drowing. Nasurok a 3,400 nga aprobado a drowing ti konstruksion ti kasapulan para iti intero a proyekto.

Marso 23, 2015—Offices/Services Building

Manipud iti boom lift, agikabkabil dagiti trabahador iti plastik a trapal tapno maprotektaran ti pasdek. Adu a panagsanay ti maar-aramid tapno masigurado a natalged ti panagusar kadagiti lift ken dadduma pay nga equipment. Dagiti klase mainaig iti kinatalged ramanenna ti panagusar kadagiti boom lift, scissor lift, proteksion tapno saan a matnag, dagiti kangrunaan a prinsipio iti kinatalged, panagusar iti respirator, ken rigging/signaling.

Marso 30, 2015—Pagibangonan iti Warwick

Buya dagiti residence building manipud iti laud. Iti ngudo ti Abril, kapigsa ti pannakatrabaho ti mekanikal ken elektrikal iti Residence A, B, ken D, kas makita iti daytoy a retrato. Nairugi metten ti panagikapet iti drywall, tile, ken panagpintura iti Residence C (saan a makita ditoy retrato).

Abril 15, 2015—Residence B

Dua a trabahador iti boom lift a mangikabkabil iti vapor-permeable air barrier iti makinruar a paset dagiti diding. Agarup dua a bulan ti mabusbos iti panagikabil iti barrier iti tunggal residence building.

Abril 27, 2015—Offices/Services Building

Agibangbangon dagiti mason iti pader a granite. Daytoy a pasdek ti ayanto ti receiving dock ken nagduduma a support service.

Abril 30, 2015—Pagibangonan iti Warwick

Suksuktan ti maysa a natangdanan a bumabatok (diver) ti daan a valve iti Blue Lake. Iti maysa laeng a talmeg ti button, mabalinen nga ages-es ti dan-aw tapno saan nga aglayus no adda bagyo.