Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

Tuxedo Site—Pappapintasen Dagiti Boluntario

Tuxedo Site—Pappapintasen Dagiti Boluntario

Alas 6:45 iti gagangay nga agsapa iti Tuxedo, New York. Asul ti langit, ken naabbungotan iti naingpis a yelo ti bassit a danaw nga asideg iti uppat-kadsaaranna a pasdek a sumsumrekan dagiti agkabannuag a lallaki ken babbai. Nakabado ken nakasapatosda iti pangtrabaho. Naggapuda ita nga agsapa kadagiti hotel ken balbalay sadiay ken iti dadduma pay a paset ti New York—Patterson, Wallkill, ken uray idiay Brooklyn, agarup 80 a kilometro ti kaadayona.

Ngem sakbay pay dayta, kaaduan kadakuada ti naggapun kadagiti ad-adayo pay a lugar, manipud iti amin a paset ti United States ken dadduma a pagilian. Nagboluntarioda nga agtrabaho ditoy—adda makalawas, innem a lawas, ken mabaybayag pay ti dadduma. Bukodda a gastos ti pinagpleteda ken saanda a masuelduan. Ngem naragsakda nga addada ditoy.

Ita nga aldaw, adda agarup 120 a boluntario, ngem manayonan pay dayta kadagiti sumaganad a bulan. Sumrekda iti kuarto a panganan sada agtugaw a sagsasangapulo iti maysa a lamisaan. Adu ti agkapkapen bayat nga agadiwara ti angot ti bacon manipud iti kosina. Iti eksakto nga alas 7:00 ti agsapa, mabuyan kadagiti TV ti pannakailawlawag ti maysa a teksto iti Biblia. Kalpasan ti 15 a minuto, idasaren dagiti waiter ti pamigat. Malaksid iti bacon, mangidasarda met iti tinapay, itlog, ken oatmeal. Nagadu ti makan!

Kalpasan ti pangserra a kararag iti ngudo ti pannangan, agsaganadan nga agtrabaho. Dagiti agtrabaho iti konstruksion ket naragsakda nga agsasarita bayat nga isusuotda dagiti hard hats, safety glasses, narangrang a vest, ken nadagsen a tool belts.

Ti trabahoda ket papintasen ti dati a pasilidad ti International Paper Company iti Tuxedo tapno pagbalinenda a pagisaganaan para iti pannakaibangon ti sangalubongan a hedkuarter dagiti Saksi ni Jehova a maipatakder iti sumagmamano a kilometro, nga asideg iti ili ti Warwick. Maar-aramid dagiti siled a pagnaedan ken opisina kadagiti datin a pasdek, agraman dagiti pagtrabahuan ken bodega. Idi Martes, Marso 12, 2013, inaprobaran ti lokal a planning board ti plano para iti dayta a lugar iti Tuxedo.

Kasano ti pannakapasangbay dagiti temporario a boluntario idi kasangsangpetda kadagiti pagdagusanda? “Apagsangpetmo,” kuna ni William a taga-New Jersey, “ibaga kenka dagiti receptionist dagiti masapul a maammuam—no ayan ti siledmo, ti direksion dagiti mabalinmo a papanan, no kasano nga usaren dagiti tulbek. Amin ket tumulong kenka. No addakan iti Tuxedo, maam-ammom ti crew leader-mo kalpasan ti pamigat, sa ilawlawagna no ania dagiti aramidem.”

Ania ti rikna dagiti agtrabtrabaho ditoy? Ni Yajaira ken ni lakayna ket naggapu iti Puerto Rico ken tumultulongda iti framing ken drywall. “Agriingkami iti agarup 4:30 ti parbangon,” kunana. “Urnosenmi ti siledmi, agkapekami, sa mapankamin iti bus a paglugananmi. No mumalemen, nabannogkamin ngem kasla awan inggana ti panagkakatawami. Nakaragragsakkami amin!”

Nalikmut iti kabakiran ti nagatang a daga iti Warwick. Ti agassawa a da Zach ken ni Beth a taga-Minnesota ket tumultulong iti pannakaisagana dagiti pagibangonan iti Warwick. Idi nasaludsod no apay nga immayda ditoy, kuna ni Beth: “Mamatikami nga awanen ti nasaysayaat a panggep iti biag no di ti agserbi ken Jehova. Kayatmi nga usaren dagiti paglainganmi nga agserbi kenkuana.”