Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

Baro nga Assembly Hall iti Kabakiran ti Amazon

Baro nga Assembly Hall iti Kabakiran ti Amazon

Naipatakder iti tengnga ti kabakiran ti Amazon ti nagpintas a baro nga Assembly Hall dagiti Saksi ni Jehova. Napuskol a kabakiran ti kaaduan a paset ti 52 nga ektaria a daga nga ayan dayta. Masarakan dayta iti amianan ti siudad ti Manaus, Brazil. Dagiti agkikiak a nadumaduma ti kolorna a macaw, toucan, ken dadduma pay a billit ket adda iti tuktok dagiti kayo a cupuaçu, natatayag a Brazil nut, ken angelim pedra. Apay a nagibangonda iti Assembly Hall sadiay?

Ti siudad ti Manaus a masarakan 1,450 a kilometro (900 mi) manipud iti wangawangan ti Amazon River ket addaan iti agarup dua a milion a populasion. Ti baro a pagasambleaan ket usaren ti agarup 7,000 a Saksi iti Manaus ken kadagiti ili iti aglawlawna a pakairamanan dagiti mapagnanaedan a lugar iti igid ti Amazon ken kadagiti waigna. Ti kaadaywan nga ili a São Gabriel da Cachoeira ket masarakan nasurok a 800 a kilometro (500 mi) iti laud ti Manaus. Tallo nga aldaw nga agbangka ti dadduma a Saksi tapno makaatenderda iti asamblea wenno kombension iti Assembly Hall!

Nagrigat ti agibangon iti Assembly Hall iti tengnga ti rehion ti Amazon. Ti agarup 13 a dadakkel a container a naglaon kadagiti mausar iti panagibangon ket masapul a maibiahe manipud iti puerto ti Santos, São Paulo, iti kosta ti Brazil. Kalpasanna, maidalan dagita iti Amazon River tapno maidanon iti lugar a pagibangonan.

Ti baro a pagasambleaan ket maika-27 nga Assembly Hall a naibangon idiay Brazil, ken 1,956 ti immatendar iti programa ti dedikasion idi Domingo, Mayo 4, 2014. Adu ti napalalo ti ragsakna gapu ta dayta ti damo nga itatabunoda iti taripnong iti maysa nga Assembly Hall.

Saan laeng a mangngeg dagiti timmabuno ti ispiker no di ket makitada pay. Nagsayaat dayta a panagbalbaliw ta iti napalabas, maangay dagiti asamblea ken kombension kadagiti publiko a lugar, nga adu ti saan a makakita iti plataporma ken iti ispiker. Kinuna ti maysa a Saksi: “Adun a tawen a tumabtabunoak kadagiti kombension ngem diak pay pulos nakabuya iti Bible drama, mangngegko laeng no kua dagita.” Ita, makitan ti amin ti entablado.

Ammuem ti Ad-adu Pay

Apay a Mangang-angaykami Kadagiti Dadakkel nga Asamblea?

Tinawen nga agtataripnongkami para iti tallo nga espesial nga okasion. Kasanoka a magunggonaan kadagitoy?

Apay ken Kasano a Maibangbangon Dagiti Kingdom Hall Dagiti Saksi ni Jehova?

Apay a Kingdom Hall ti awag iti pagdaydayawanmi? Ammuem ti ad-adu pay no kasano a makatulong iti kongregasionmi dagitoy a simple a pasdek.