Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

Ti Panagturpos ti Maika-136 a Klase ti Watchtower Bible School of Gilead

Ti Panagturpos ti Maika-136 a Klase ti Watchtower Bible School of Gilead

Kalpasan ti napasnek a panagadal iti Biblia iti lima a bulan, nagturpos ti maika-136 a klase ti Gilead idi Sabado, Marso 8, 2014. Iti daytoy nga eskuelaan, nasursuro dagiti aduan kapadasan a ministro dagiti Saksi ni Jehova ti agbalin a mas epektibo iti ministerioda tapno mapabilegda ti pammati dagiti padada a Saksi. Agdagup iti 11,548 ti timmabuno iti programa, iti man aktual a nakaangayanna iti educational center dagiti Saksi ni Jehova idiay Patterson, New York, wenno babaen iti pannakaikonektar babaen iti video kadagiti lugar idiay Canada, Jamaica, Puerto Rico, ken United States.

“Pagtalinaedenyo Kadakayo Daytoy a Kababalin iti Isip.” Ni David Splane, a miembro ti Bagi a Manarawidwid dagiti Saksi ni Jehova ken tserman iti programa, imbasarna ti panglukat a sasaona iti Filipos 2:5-7: “Pagtalinaedenyo kadakayo daytoy a kababalin iti isip nga adda met ken Kristo Jesus.” Idi adda ditoy daga ni Jesus, saan a maseknan iti posisionna. Sipapakumbaba ketdi nga impamaysana ti bagina iti trabaho ti Dios.

Kas pagarigan, inidian ni Jesus ti tunggal sulisog ti Diablo babaen iti sasao nga “Adda a naisurat,” kas panangkotarna iti palawag ni Moises iti nasion ti Israel. (Mateo 4:4, 7, 10; Deuteronomio 6:13, 16; 8:3) Nupay mabalin koma nga agsao ni Jesus babaen iti mismo nga autoridadna kas ti napulotan nga Anak ti Dios, sipapakumbaba nga impakitana ti panangapresiarna iti insurat ni Moises. Masapul met ngarud a bigbigentayo dagiti abilidad ti sabsabali ken kanayon a komendarantayo ida.

Intampok met ni Brother Splane no kasano nga impakita ni Jesus ti umiso a panagpampanunot idi agpatinggan ti pannakasanayna ditoy daga. Inkararag ni Jesus: “Pinadayagka ditoy daga, yantangay naturposko ti trabaho nga intedmo kaniak nga aramidek. Gapuna ita sika, Ama, padayagennak iti sibaymo iti dayag nga adda kaniak idi iti sibaymo sakbay a naadda ti lubong.” (Juan 17:4, 5) Saan nga inkagumaan ni Jesus ti maaddaan kadagiti kanayonan a pribilehio. Ti kakaisuna a kiddawna ket makapagsubli iti dati a posisionna, wenno trabahona, apaman a makasubli idiay langit. Ni Jesus ket masapul met ngarud a tuladen dagiti nagturpos iti Gilead babaen ti panagbalinda a sipapanunot iti trabahoda imbes nga iti posision, nga agbalinda a kontento uray no awan ti maawatda a kanayonan a pribilehio inton agsublidan kadagiti pakaidestinuanda.

“Awanan Babawi a Panagsakripisio.” Ni William Malenfant, a katulongan ti Teaching Committee ti Bagi a Manarawidwid, pinaregtana dagiti estudiante a tuladenda ti kinamanagsakripisio ni apostol Pablo. Imbes a pinanunotna dagiti insakripisiona maigapu iti panagserbina iti Dios, kinuna ni Pablo: “Lipatek amin a napalabas ket ipakatko ti amin a kabaelak a manggun-od iti adda iti masangoanan.”Filipos 3:13, 14, Ti Baro a Naimbag a Damag Biblia.

Babaen ti awanan babawi a panagsakripisio dagiti estudiante, matuladda dagiti nagkauna ken agdama a matalek nga agserserbi iti Dios. Kinotar ni Brother Malenfant ni Clara Gerber Moyer, a nangrugi a nagserbi ken Jehova sipud kinaubingna. Insuratna: “Anian a pribilehio a lagipen ti nasurok a 80 a tawen ti dedikado a panagserbik iti Dios—awan a pulos ti pagbabawyak! No maisublik la koma ti napalabas, usarek ti biagko iti kasta met laeng a pamay-an.”

“Panangikasaba iti Pagarian a Kadua Dagiti Anghel ken kas Kadagiti Anghel.” Ni Gerrit Lösch a miembro ti Bagi a Manarawidwid tinulonganna dagiti estudiante a mangapresiar iti dua a naisangsangayan a pribilehio a tagtagiragsaken dagiti mangaskasaba. Umuna, agserserbida kas anghel ti Dios no ipakaammoda ti mensahena a naimbag a damag ti Pagarian. Ngamin, ti Hebreo ken Griego a sasao a nausar iti Biblia para iti “anghel” ket mabalin met nga ipatarus kas “mensahero.” Maikadua, ikaskasaba dagiti estudiante ti naimbag a damag iti sidong ti panangiwanwan dagiti anghel nga espiritu a parsua, kas iti inaramid idi ni adalan a Felipe.Aramid 8:26-35.

Kalpasan dayta, insalaysay ni Brother Lösch ti sumagmamano a kapadasan dagiti Saksi ni Jehova iti trabahoda a panangikasaba iti Pagarian. Kas pagarigan, ni Gabino a maysa a Saksi idiay Mexico gagangay a maminsan wenno mamindua laeng nga agtuktok iti ridaw. Ngem adda aldaw a namimpat a nagtuktok iti maysa a ridaw. Imbaga ti bumalay a nanglukat iti ridaw a dandani idin nga agpakamatay. Kuna ti lalaki: “Makitam daydiay tali a nakabitin? Naigalutko daytan iti tengngedko iti maikapat a panagtuktokmo ngem winarwarko tapno luktak ti ridaw. Agyamanak ta saanka a nauma a nagtuktok ta no saan, nagbekkelak koman.”

Nupay nalabit naiparna laeng dagiti kapadasan a kas iti dayta, ammotayo nga adu ti saan a kasta. Dagita ketdi ket ebidensia nga iwanwanwan dagiti anghel ti Dios ti sangalubongan a trabaho a panangasaba.Apocalipsis 14:6.

“Ti Nadayaw ket Mabendisionan.” Ni Michael Burnett nga instruktor iti Gilead, imbasarna ti tema ti palawagna iti ulidan ni Jabez a kaputotan ni Juda, a “nadaydayaw idi ngem ti kakabsatna.” Inkararag ni Jabez iti Dios: “No bendisionannakto a di bumurong ket pudno a palawaem ti teritoriak ket ta imam pudpudno nga adda kaniak, ket pudpudno nga aluadannak manipud iti didigra!”1 Cronicas 4:9, 10.

Matulad dagiti estudiante ti nadayaw nga ulidan ni Jabez babaen ti panagbalinda nga espesipiko kadagiti kararagda, nangruna no kiddawenda iti Dios a tulonganna ida a mangtungpal iti panggep ti pannakasanayda iti Gilead. Rumbeng laeng met a kiddawenda iti Dios a salaknibanna ida manipud iti didigra, saan a babaen ti panangilisina a naan-anay kadagiti epekto dayta, no di ket tulonganna ida a mangliklik iti ladingit wenno epekto ti kinadakes. Sinungbatan ti Dios ti kararag ni Jabez, ken kastanto met ti aramidenna kadagiti estudiante ti Gilead.

“Pagtalinaedenyo a Nadarang ti Apuyyo.” Ni Mark Noumair nga instruktor ti Gilead ken katulongan ti Teaching Committee imbasarna ti palawagna iti 1 Tesalonica 5:16-19. No kasano a ti literal nga apuy ket agkasapulan iti sungrod, oksihena, ken bara tapno agtultuloy ti darangna, adda tallo a mausar dagiti estudiante tapno agtultuloy ti regtada iti ministerioda.

Umuna, ‘agrag-oda a kankanayon.’ (1 Tesalonica 5:16) Makapagrag-o dagiti estudiante—a mangmantener iti regtada—babaen ti kanayon a panangpanunotda iti bendision ti pananganamong kadakuada ni Jehova. Maikadua, ‘agkararagda a di agressat.’ (1 Tesalonica 5:17) Ti kararag ket kas iti oksihena a mangbiag iti apuy. Iyat-atiddogtayo koma dagiti kararagtayo, nga ibagatayo iti Dios ti amin a linaon ti pusotayo. Maikatlo, “mainaig iti isuamin agyamanda.’ (1 Tesalonica 5:18) Ti kinamanagyaman ti mangpasinged iti relasiontayo ken Jehova ken kadagiti kapammatiantayo. “Agbalinkayo a manangapresiar,” kinuna ni Brother Noumair, “imbes nga agbalinkayo a manangkritikar.”

“Panangidaydayaw ken Jehova a Kadua ti Tangatang.” Ni Sam Roberson nga instruktor kadagiti nateokratikuan nga eskuelaan, imbasarna dagiti panglukat a komentona kadagiti nailanad iti Biblia a mangipakita a ti init, ti bulan, ken dagiti bituen idaydayawda ni Jehova. (Salmo 19:1; 89:37; 148:3) Imbagana a dagiti estudiante ket mabalin met a maaddaan iti pribilehio a mangidaydayaw ken Jehova. Kalpasanna, inturongna ida kadagiti pannakayakto dagiti kapadasan a nabiit pay a natagiragsakda iti tay-ak ti ministerio. Kas pagarigan, nagyaman ti maysa nga estudiante iti maysa a lalaki a naka-wheelchair kas apresasion kalpasan nga insardeng ti estudiante ti lugan a manmanehuenna tapno makaballasiw dayta a lalaki iti kalsada. Nagtungtongda ken inawat dayta a lalaki ti tukon a mayadalan iti Biblia. Bayat nga inyadalan dayta nga estudiante iti Gilead kadagiti simmaruno a lawas, nakasabaanna ti sumagmamano a tattao a simmarungkar iti dayta a lalaki. Idi agangay, pito pay ti narugianna a nayadalan iti Biblia kas resulta ti damo a pannakisaritana iti naka-wheelchair a lalaki.

“Agbalinkayo a Nabilbileg Babaen iti Nadiosan nga Edukasion.” Ni Donald Gordon a katulongan ti Publishing Committee ininterbiuna ti dua a pagassawaan iti klase. Ti maysa kadagiti kakabsat a lallaki a nainterbiu imbagana a ti Efeso 3:16-20 ket naitampok iti unos ti panageskuelada. Dayta ti ‘nangpabileg’ kadagiti estudiante tapno agbalinda a napakumbaba ken nalaka a maas-asitgan ken bigbigenda a nagadu pay laeng ti kayat ni Jehova nga ipaaramid iti tunggal maysa a Saksi. Kinuna ti maysa kadagiti kakabsat a babbai nga apresiarenna no kasano ti panangparegta ti maysa nga instruktor iti Gilead kadagiti estudiante nga agbalinda kas bassit nga ikan iti naglawa a taaw, imbes nga agbalinda a dakkel nga ikan iti sangamalukong a danum, isu a saandan a dumakkel pay. Kinunana: “Nasursurok a no kanayon a napakumbabaak iti organisasion ni Jehova, tulongannak a rumang-ay iti naespirituan.”

“Nasayaat Koma ti Pakalaglagipanyo ken Jehova.” Ni Mark Sanderson a miembro ti Bagi a Manarawidwid ti nangted iti kangrunaan a palawag iti programa ti panagturpos. Imbasarna ti temana iti kararag ni Nehemias: “Lagipennak, O Diosko, maipaay iti pagimbagan.” (Nehemias 5:19; 13:31) Saan idi a madanagan ni Nehemias a lipaten ni Jehova ken ti panagserbina kenkuana. Ti ketdi kiddawna ket sidudungngo a laglagipen ken bendisionan koma isuna ti Dios.

Makapagtalek met dagiti estudiante a nasayaat ti malaglagipto ni Jehova kadakuada no iyaplikarda dagiti kangrunaan a naadalda iti Gilead. Kas pagarigan, ti koma naimpusuan a panagayatda ken Jehova ti kangrunaan a motiboda iti panagserbida kenkuana. (Marcos 12:30) Ni Jehova ket naimpusuan nga inayat ni Abraham isu a sidudungngo a laglagipen isuna ti Dios. Uray no rinibun a tawen a natay ni Abraham, kaskasdi a kuna ti Dios maipapan kenkuana: “Ni Abraham a gayyemko.”Isaias 41:8.

Pinalagipan met ni Brother Sanderson dagiti estudiante nga ayatenda dagiti padada a tattao nangruna dagiti Kristiano a kakabsatda. (Marcos 12:31) Kas iti naimbag a Samaritano,a “namagbalin iti bagina a pada a tao daydiay natnag kadagiti mannanakaw,” rumbeng nga isuda ti agdisnudo ken mangtulong kadagiti agkasapulan. (Lucas 10:36) Kas panangyilustrar, inusarna ti ulidan ni Nicholas Kovalak a nagturpos iti Gilead ken nagserbi kas manangaywan iti distrito. Ni Brother Kovalak ket pagaammo gapu ta mannakigayyem ken nadungngo. Binalakadanna naminsan ti maysa nga agdaldaliasat a manangaywan ken ti asawana nga aggaggagetda iti ministerioda, babaen ti panangibagana: “Sapsapaenyo iti bigat, rugrugi ti lawas, rugrugi ti bulan, ken rugrugi ti tawen.” Ngem kalpasan ti sumagmamano nga aldaw a panangpaliiwna iti asawa ti agdaldaliasat a manangaywan, kinunana kenkuana: “Lipatemon ti imbagak. Nakagaggagetkan. Dimon sobsobraan tapno makapagtultuloyka nga agserbi ken Jehova.” Ti naasi ken mannakipagrikna a balakadna ti nakatulong iti dayta a kabsat nga agtultuloy iti amin-tiempo a serbisio iti pinullo a tawen.

Kamaudiananna, pinaregta ni Brother Sanderson dagiti estudiante a tungpalenda ti panggep ti panageskuelada babaen ti panangisuro ken panangsanayda iti sabsabali. (2 Timoteo 2:2) Bayat ti panangitungpalda kadagiti annongenda, mapabileg ken mapagbalinda a natalged ti panagkakabsat ket namnamaenda a nasayaat ti malaglagipto ni Jehova kadakuada.Salmo 20:1-5.

Konklusion. Kalpasan a naawat dagiti estudiante dagiti diplomada, maysa kadakuada ti nangbasa iti surat ti panagyaman ti klase. Sangapulo ket lima a miembro iti klase ti nangturpos iti programa babaen iti a cappella a panangkantada iti kanta numero 123 manipud iti Kantaanyo ni Jehova, a napauluan “Papastor—Sagut a Tattao.”

Ammuem ti Ad-adu Pay

Ania Dagiti Eskuelaan a Para Kadagiti Payunir?

Ania a naisangsangayan a pannakasanay ti maipapaay kadagiti mangbusbusbos iti amin a tiempoda iti trabaho a panangikasaba iti Pagarian?