Mapan iti linaonna

Mapan iti segundario a pagpilian

Dagiti Saksi ni Jehova

Iloko

Pitopulo a Tawenen ti Gilead School

Pitopulo a Tawenen ti Gilead School

Idi Pebrero 1, 1943, nangrugi iti amianan a paset ti New York ti kaunaan a klase ti maysa nga espesial nga eskuelaan. Dayta nga eskuelaan a pagaammo itan kas ti Watchtower Bible School of Gilead ket nakaipaayen iti espesial a pannakasanay ti nasurok a 8,000 a lallaki ken babbai manipud iti amin a paset ti lubong.

Ngato: Makinsango a pagserkan iti Gilead School, South Lansing, New York. Baba: Instruktor ti Gilead nga agpalpalawag kadagiti estudiante ti maika-31 a klase ti Gilead iti ampiteatro

Kinuna ni Jonathan a nagraduar iti nabiit pay a klase ti Gilead: “Ti naawatmi nga edukasion a naibasar iti Sao ti Dios ket tumulong kadakami nga agbalin a mas epektibo iti aniaman a teritoria wenno kultura.” Kinuna pay ti asawana a ni Marnie: “Ad-adda itan a kayatko nga ipaawat kadagiti tattao nga awanen ti nasaysayaat a wagas ti panagbiag no di laeng ti wagas a maitunos iti panggep ti Dios para kadatayo. Kombinsidoak a sumayaat ti biag dagiti tattao no matulongan ida a mangam-ammo ken Jehova.”

Awan matrikula iti lima a bulan a panageskuela iti Gilead. Kangrunaan a nakapokus dayta iti Biblia ken iti kinapateg ti trabaho a panangasaba. Panggep ti kurso a dagiti aggraduar iti dayta ket paregtaen ken pabilgenda ti ili ti Dios ken tulonganda ti amin a mangpasayaat kadagiti naespirituan a galad a kasapulanda tapno masolbarda dagiti maipasango kadakuada a problema. Bayat ti panageskuela dagiti estudiante, adalenda dagiti prinsipio ti Biblia a makatulong kadakuada a mangpabileg iti relasionda iti Diosda a ni Jehova.

Ngato: 1958, Isursuro ni Albert Schroeder dagiti estudiante iti Gilead babaen ti panangusarna iti maysa a modelo ti tabernakulo. Baba: 1968, Isursuro ni Ulysses Glass ti maika-46 a klase ti Gilead

Dagiti agassawa nga ageskuela iti Gilead ket datin a full-time a ministro. Kalpasan ti panagturposda, mabalin nga agsublida iti teritoriada wenno maidestinoda iti sabali a pagilian. Dadduma ti maapointaran nga agtrabaho iti maysa kadagiti nasurok a 90 a sanga nga opisina dagiti Saksi ni Jehova. Kaaduan ket maibaon nga agserbi kadagiti lugar nga aduan iti populasion a sadiay makatulongda unay iti trabaho a panangasaba.

Idi damo, ti Gilead School ket adda idiay Kingdom Farm, iti South Lansing, New York. Idi 1961, nayakar dayta iti sangalubongan a hedkuarter dagiti Saksi ni Jehova iti Brooklyn, New York. Manipud 1988 agingga iti 1995, dayta ket naangay idiay Watchtower Farms, iti Wallkill, New York. Ngem idi 1995, nayakaren dayta iti pakaang-angayannan a Watchtower Educational Center, iti Patterson, New York. Idi Marso 2013, nagraduar ti maika-134 a klase.

Ngato: 2003, Dagiti estudiante ti maika-116 a klase ti Gilead iti klaseda. Baba: 2011, Dagiti estudiante bayat ti panagadalda iti libraria ti Gilead

Iti 70 a tawenen, dagiti nagturpos iti Watchtower Bible School of Gilead ket nakaipasdeken iti nagsayaat nga ulidan iti matalek a panangsaksida maipapan ken Jehova.