Mapan iti linaonna

Mapan iti segundario a pagpilian

Dagiti Saksi ni Jehova

Iloko

Nasurok a 165,000 a Cart a Pagidispleyan iti Literatura

Nasurok a 165,000 a Cart a Pagidispleyan iti Literatura

Dagiti Saksi ni Jehova, a nalatak gapu iti panangasabada iti binalaybalay, ket masarakan itan a nakatakder iti abay ti cart a pagidispleyan iti literatura kadagiti publiko a lugar.

Iti nabiit pay, ad-addan a maipaganetget daytoy a porma ti panangasaba. Idi Nobiembre 2011, inrugi ti maysa a grupo dagiti Saksi iti New York City ti panangipakaammo kadagiti tattao ti mensahe ti Biblia babaen kadagiti lamisaan ken cart a pagidispleyan ti literatura. Daytoy a panangpadas ket nakabalballigi ta inaramidda met a dagus dayta iti dadduma a siudad.

Idi Marso 2015, adda 165,390 a cart ti naipatulod kadagiti kongregasion dagiti Saksi ni Jehova iti intero a lubong. Rinibu met ti naala a lamisaan ken pagpuestuan.

Ti panagbalaybalay ti kangrunaan latta a pamay-an dagiti Saksi a mangipakaammo iti kinapudno iti Biblia. Nupay kasta, nakita a nakaep-epektibo dagiti cart a pagidispleyan iti literatura. Usigem dagiti pagarigan.

Idiay Peru, maysa a lalaki nga agnagan Raul ti immasideg kadagiti Saksi iti maysa a cart ti nagkuna: “Apay nga ita laeng a makitakayo? Tallo a tawenen a birbirokek dagiti Saksi! Nagyamanak iti Dios idi nakitak ti cart-yo.”

Nupay masansan a mapmapan dagiti Saksi iti lugar a pagnanaedanna, awan ni Raul iti pagtaenganna no iti aldaw wenno iti ngudo ti lawas. Imbagana a nakipagadal idin iti Biblia kadagiti Saksi, ket kayatna ti makipagadal manen. Nayurnos ngarud dayta.

Maysa nga agkabannuag a pagassawaan ti simmardeng iti maysa a cart idiay Bulgaria ket nangalada iti libro a Ti Sekreto ti Kinaragsak iti Pamilia. Nagsublida iti sumaruno a lawas ket nangalada ti dua pay a libro: Ti Librok Dagiti Estoria ti Biblia ken Agsursuroka iti Naindaklan a Mannursuro. Dinamag ti Saksi nga agbambantay iti cart no mano ti anakda. Insungbatda: “Awan pay, ngem no maaddaankaminto, planomi nga isuro kadakuada ti maipapan iti Dios. Dagitoy a libro ti apagisu a kasapulanmi.”

Maysa a lalaki a nakauniporme iti pangmilitar ti immasideg kadagiti Saksi iti asideg ti cart idiay Ukraine. Kinunana: “Babbai, ibagayo man no kaano nga umay ti Armagedon.” Nakipaset ti lalaki iti nabiit pay a gulo idiay Ukraine. Dagiti pasamak iti lubong ti nangkombinsir kenkuana nga asidegen ti Armagedon, ken pinampanunotna no apay a saan pay laeng nga agtignay ti Dios iti kabiitan a panawen. Inlawlawag dagiti agibumbunannag manipud Biblia nga adda naimbag a rason no apay a saan pay laeng a makibiang ti Dios kadagiti aktibidad ti tao ken dandaninan dadaelen amin a managdakdakes. Inawat ti lalaki dagiti magasin a Pagwanawanan ken Agriingkayo! kasta met ti libro nga Is There a Creator Who Cares About You?

Idiay Macedonia, imbaga ti maysa nga agkabannuag a lalaki kadagiti Saksi nga agbambantay iti cart nga isu ket pamiliar kadagiti magasinda. Ngem ita, kayatna ti maaddaan iti libro nga Ania a Talaga ti Isursuro ti Biblia? Kinunana a mapan a dagus iti pangpubliko a libraria tapno rugianna a basaen dayta.

Kalpasan ti agarup dua nga oras, nagsubli ti lalaki idi nabasana ti umuna a 79 a panid ti libro. Kinunana: “Daytoy a libro balbaliwanna ti biag! Mabigbigko itan a saan nga umiso ti adu a patpatiek. Amin nga inlawlawag ti libro ket nalawag kaniak. Naan-anay a binalbaliwanna ti pannakaawatko iti biag!”

Ammuem ti Ad-adu Pay

PROGRAMA A PANAGADAL ITI BIBLIA

Apay nga Adalem ti Biblia?

Mangipapaay ti Biblia kadagiti sungbat ti agkakapateg a saludsod ti minilion a tattao iti intero a lubong. Kayatmo kadi met ti matulongan?

PROGRAMA A PANAGADAL ITI BIBLIA

Kasano ti Panagadal iti Biblia?

Iti intero a lubong, pagaammo dagiti Saksi ni Jehova a mangituktukon iti libre a panagadal iti Biblia. Buyaem no kasano a maar-aramid dayta.

MASANSAN A MAISALUDSOD

Kristiano Kadi Dagiti Saksi ni Jehova?

Pangngaasim ta ammuem no kasano a naidumakami kadagiti dadduma a relihion a maaw-awagan iti Kristiano.