Accessibility setting

Agpili iti lengguahe

Mapan iti segundario a pagpilian

Mapan iti linaonna

Dagiti Saksi ni Jehova

Iloko

Nakallalagip a Panagpasiar

Nakallalagip a Panagpasiar

Kada tawen, pinullo a ribu ti agpasiar kadagiti pasilidad ti sanga nga opisina ti United States ken iti sangalubongan a hedkuarter dagiti Saksi ni Jehova iti New York State. Dagita a lugar ket maawagan iti Bethel a “Balay ti Dios” ti kaipapananna iti Hebreo. Asideg ken adayo ti paggapuan dagiti agpasiar a mayat a mangkita no kasano ti pannakayimprenta dagiti publikasion, no kasano ti pannakaorganisar ti trabahomi, ken mangbisita kadagiti gagayyemda nga agtrabtrabaho sadiay. Itay nabiit, adda maysa a nagporsegi unay tapno matuloy ti panagpasiarna.

Ni Marcellus a maysa kadagiti Saksi ni Jehova ket agnanaed iti Anchorage, Alaska, U.S.A. Manmano laeng ti maisaona sipud idi naistrok sumagmamano a tawenen ti napalabas. * Masansan a naka-wheelchair ken masapul nga adda tumulong kenkuana kadagiti inaldaw nga aramidenna. Iti laksid dagita a pakarigatan, tartarigagayanna unay ti agpasiar iti Bethel. Itay nabiit, natungpal met laengen dayta nga arapaapna.

“Porsegido,” kuna ti gayyemna a ni Corey a timmulong iti pannakaiplano ti panagpasiarna. “Kanayon nga awagannak no adda damagenna maipapan iti plano. Yantangay ‘Wen’ ken ‘Saan’ laeng ti maisao ni Marcellus, masapul nga adu ti isaludsodko no umawag.” Kastoy no kua ti tungtonganda:

“Kayatmo nga umayak dita?”

“Saan.”

“Kayatmo nga awagak ti doktor?”

“Saan.”

“Maipapan kadi daytoy iti panagpasiarmo idiay Bethel?”

“Wen.”

“Kalpasanna, ilawlawagko dagiti naaramidakon iti pannakaiplano ti biahena. Maragsakanak unay ta natungpal dayta nga arapaapna.”

Napagballigian ni Marcellus ti sumagmamano a problema tapno matuloy ti panagpasiarna. Yantangay limitado ti sapulna, dua a tawen a nagurnong tapno adda pagpletena iti 5,400-kilometro a biahena nga agpa-New York. Gapu kadagiti pisikal a limitasionna, masapul nga agbirok iti makabael a kaduana nga agbiahe. Kamaudiananna, kasapulanna ti doctor’s certificate ket naawatna dayta sumagmamano la nga aldaw sakbay ti nakaeskediul a panagtayabna.

Idi nakadanon ni Marcellus iti New York, isu ket naipasiar kadagiti pasilidad iti Brooklyn, Patterson, ken Wallkill. Nakitana dagiti nagdadakkel a makina nga agim-imprenta kadagiti libro ken Biblia ken nagadu ti naammuanna maipapan iti pannakaorganisar ti trabaho dagiti Saksi ni Jehova. Nabuyana met dagiti eksibit a napauluan iti “The Bible and the Divine Name (Ti Biblia ken ti Nagan ti Dios)” ken “A People for Jehovah’s Name (Tattao a Maipaay iti Nagan ti Dios).” Bayat ti panagpasiarna, naaddaan iti adu a baro a gagayyem. Talaga a nakallalagip dayta a panagpasiar!

Adu ti agkuna a kurang ti sasao a mangiladawan iti panagpasiarda iti Bethel. Ngem idi naisaludsod ken Marcellus no napnek met laeng iti panagpasiarna iti Bethel, simmungbat iti kakaisuna a pamay-an a kabaelanna: “Wen. Wen. Wen!”

Kas iti napadasan ni Marcellus, mabalin a makaparegta a kapadasan para kenka ken iti pamiliam ti panagpasiar iti Bethel. Siraragsak a maawat ti amin nga umay agpasiar kadagiti sanga nga opisinami iti intero a lubong. Padasem met ti umay!

^ par. 3 Natay ni Marcellus idi Mayo 19, 2014 bayat a maisagsagana ti pannakaipablaak daytoy nga artikulo.

Ammuem ti Ad-adu Pay

Ania ti Bethel?

Ti Bethel ket naisangsangayan a lugar nga addaan iti nakapatpateg a panggep. Ammuem ti ad-adu pay maipapan kadagiti agserserbi sadiay.

Ania ti Maas-asikaso iti Sanga nga Opisina Dagiti Saksi ni Jehova?

Maawis dagiti bisita nga agpasiar iti aniaman kadagiti sanga nga opisinami. Awisendaka met nga umay agpasiar!