Mapan iti linaonna

Mapan iti listaan dagiti linaonna

 PANAGBIAG KAS KRISTIANO

Petpetam Dagiti Moral a Pagalagadan ni Jehova

Petpetam Dagiti Moral a Pagalagadan ni Jehova

Nangikeddeng ni Jehova a Dios kadagiti pagalagadan iti moral para kadatayo. Kas pagarigan, ibilbilinna a ti panagasawa ket permanente a panagtipon ti maysa a lalaki ken maysa a babai. (Mt 19:4-6, 9) Kagurana ti amin a kita ti seksual nga immoralidad. (1Co 6:9, 10) Nangipaay pay kadagiti prinsipio mainaig iti panagbadbado ken panaglanglanga kas pagilasinan iti nakaidumaan dagiti adipenna.—De 22:5; 1Ti 2:9, 10.

Adu ita ti saan a sumursurot kadagiti pagalagadan ni Jehova. (Ro 1:18-32) Agpapaimpluensiada iti opinion ti kaaduan maipapan iti panagbadbado, panaglanglanga, ken kondukta. Ipagpampannakkel ti adu ti nakaal-alas nga ar-aramidda ken kritkritikarenda dagidiay naiduma ti sursurotenda a pagalagadan.—1Pe 4:3, 4.

Kas Saksi ni Jehova, masapul a situtured a petpetantayo dagiti moral a pagalagadan ti Dios. (Ro 12:9) Kasano? Rumbeng a sitataktika nga ipakaammotayo no ania ti makaay-ayo kenkuana. Masapul met a taginayonentayo a nangato ti pagalagadan a sursurotentayo. Kas pagarigan, no agpilitayo iti estilo ti bado wenno panaglanglanga, mabalin a panunotentayo: ‘Ipakpakita kadi dagiti pilik ti pagalagadan ni Jehova, wenno ti pagalagadan ti lubong? Malasin kadi iti panagbadbado ken panaglanglangak a maysaak a Kristiano a managbuteng iti Dios?’ Wenno no agpilitayo iti buyaen, mabalin nga isaludsodtayo: ‘Kayat ngata ni Jehova daytoy a pabuya? Makimpagalagadan ti itamtampokna? Kumapuy ngata ti determinasionko nga agtalinaed a nadalus iti moral no buyaek daytoy? (Sal 101:3) Pakaitibkolan ngata daytoy dagiti kapamiliak wenno ti dadduma?’—1Co 10:31-33.

Apay a nakapatpateg a petpetantayo dagiti moral a pagalagadan ni Jehova? Dandanin dadaelen ni Kristo Jesus dagiti nasion ken ti amin a kinadakes. (Eze 9:4-7) Dagidiay laeng mangar-aramid iti pagayatan ti Dios ti maisalakan. (1Jn 2:15-17) Suportarantayo ngarud dagiti moral a pagalagadan ni Jehova tapno dagidiay makasaksi iti nasayaat a konduktatayo maidaydayawda ti Dios.—1Pe 2:11, 12.

Makimpagalagadan ti ipakpakita ti panagbadbado ken panaglanglangak?

BUYAEN TI VIDEO NGA AGBALINKA A GAYYEM NI JEHOVA—MAYSA A LALAKI, MAYSA A BABAI, SA PAGSASARITAAN DAGITOY A SALUDSOD:

  • Apay nga umiso laeng a suroten dagiti pagalagadan ni Jehova?

  • Apay a masapul nga isuro dagiti nagannak kadagiti annakda dagiti moral a pagalagadan ni Jehova bayat nga ubbingda pay?

  • Ubbingtayo man wenno nataengan, kasano a matulongantayo dagiti tattao a magunggonaan iti kinaimbag ti Dios?