Mapan iti linaonna

Mapan iti listaan dagiti linaonna

 PANAGBIAG KAS KRISTIANO

Umuna a Makikappiaka ken Kabsatmo—Kasano?

Umuna a Makikappiaka ken Kabsatmo—Kasano?

Panunotem nga agnanaedka iti Galilea idi panawen ni Jesus. Nagdaliasatka a mapan idiay Jerusalem tapno selebraran ti Piesta dagiti Abong-abong. Nakaad-adu dagiti kapammatiam a bimmisita iti Jerusalem a naggapu iti adayo ken nagduduma a lugar. Kayatmo ti mangidaton ken Jehova. Nangitugotka iti kalding ket rinugiam ti magna iti tengnga ti nagadu a tao nga agturong iti templo. Idi nakadanonkan, nakitam a napusek ti templo kadagiti tattao a mayat met nga agdaton. Ita, batangmon nga iyawat iti padi ti kalding a datonmo. Iti dayta met la kanito, nalagipmo nga adda gura kenka ti kabsatmo, a nalabit adda met iti bunggoy wenno iti siudad. Inlawlawag ni Jesus ti rumbeng nga aramidem. (Basaen ti Mateo 5:24.) Kasano nga agkappiakayo iti kabsatmo kas iti imbaga ni Jesus? Iti listaan iti baba, tsekam ti umiso a sungbat.

RUMBENG NGA ARAMIDEM

  • kasaritam laeng ti kabsatmo no ammom nga adda nainkalintegan a rasonna a masaktan

  • ilintegmo ti kapanunotan ti kabsatmo no iti panagriknam ket naarsagid unay wenno no adda met basolna

  • dumngegka a naimbag iti kabsatmo bayat nga iyeb-ebkasna ti riknana. Uray no saanmo unay a maawatan, sipapasnek a dumawatka iti pammakawan ta nasaktam wenno saan a nasayaat ti epekto kenkuana ti inaramidmo

RUMBENG NGA ARAMIDEN TI KABSATMO

  • mangala iti suporta iti dadduma iti kongregasion babaen ti panangibagana no kasano a nasaktam

  • ungtannaka, ipalagipna ti amin a detalye ti inaramidmo, ken ibagana nga aminem a sika ti nagkamali

  • bigbigenna ti kinapakumbabam ken turedmo nga immasideg, ken naimpusuan a pakawanennaka

Nupay saanen a kasapulan nga agdatontayo iti animal, ania ti insuro ni Jesus maipapan iti pakainaigan ti pannakikappia kadagiti kakabsattayo ken ti panagdaydayaw nga anamongan ti Dios?