Mapan iti linaonna

Mapan iti listaan dagiti linaonna

Ania a Talaga ti Langa ni Jesus?

Ania a Talaga ti Langa ni Jesus?

Awan ti addaan iti retrato ni Jesus. Saan a nagpaaramid iti portrait, wenno drowing ti rupana, ken saan a nagpaikitikit iti estatuana. Ngem makita latta ti ladawanna kadagiti aramid ti adu nga artist iti napalabas a ginasut a tawen.

Siempre, saan nga ammo dagidiay nga artist no ania a talaga ti langa ni Jesus. No agaramidda iti ladawan ni Jesus, masansan a surotenda ti kultura, narelihiosuan a patpatien, ken ti kayat dagiti agpaaramid iti ladawanna. Ngem gapu kadagita, mabalin a maimpluensiaan wenno agbaliw pay ketdi ti kapanunotan dagiti tattao maipapan ken Jesus ken kadagiti pannursurona.

Adda dagiti artist a nangiladawan ken Jesus kas nakapsut nga addaan iti atiddog a buok ken naingpis a barbas wenno nakalidliday ti itsurana. Nailadawan pay ni Jesus kas misterioso, nga adda nagsirkulo a lawag iti ulona, wenno awan bibiangna kadagiti kaduana. Husto kadi dagita a panangiladawan ken Jesus? Kasano a maammuantayo? Ti maysa a pamay-an ket ti panangadal kadagiti sasao iti Biblia a makatulong tapno maawatantayo no ania ti mabalin a langana. Makatulong met dagita tapno maaddaantayo iti husto a kapanunotan maipapan kenkuana.

“NANGISAGANAKA ITI BAGI A MAIPAAY KANIAK”

Agparang nga imbaga ni Jesus dagita iti kararagna idi nabautisaran. (Hebreo 10:5; Mateo 3:13-17) Ania ti langa dayta a bagi? Agarup 30 a tawen sakbay dayta, imbaga ni anghel Gabriel ken Maria: “Iyinawmonto iti aanakam ken ipasngaymonto ti maysa nga anak a lalaki, . . . Anak ti Dios.” (Lucas 1:31, 35) Gapuna, perpekto a tao ni Jesus a kas ken Adan idi naparsua. (Lucas 3:38; 1 Corinto 15:45) Sigurado a mayat ti pammagi ni Jesus, ken mabalin a kaing-ingas ti Judio nga inana a ni Maria.

Kas gagangay kadagiti Judio, adda barbas ni Jesus, saan a kas kadagiti Romano. Isimbolo ti barbas ti dignidad ken kinadesente; naurnos, nadalus, ken saan nga atiddog dayta. Sigurado a regular a putputdan ni Jesus ti barbasna ken kanayon nga agpappapukis. Dagiti laeng Nazareo, a kas ken Samson, ti saan idi nga agpappapukis.—Numeros 6:5; Uk-ukom 13:5.

Iti kaaduan a paset ti 30 a tawen a panagbiagna, nagkarpintero ni Jesus. Awan pay idi dagiti moderno nga alikamen. (Marcos 6:3) Gapuna, sigurado a nabaked ti pammagi ni Jesus. Iti rugrugi ti ministeriona, maymaysana a nangparuar iti amin nga “addaan kadagiti karnero ken bakbaka manipud iti templo, ket imbukbokna dagiti sinsilio dagiti agsuksukat iti kuarta ket imbalintuagna dagiti lamisaanda.” (Juan 2:14-17) Masapul a napigsa ken nabileg ti maysa tapno maaramidna dayta. Inusar ni Jesus ti bagi nga insagana ti Dios tapno itungpalna ti imbilin ti Dios nga aramidenna: “Kasta met nga iti sabsabali a siudad masapul nga ideklarak ti naimbag a damag ti pagarian ti Dios, agsipud ta naibaonak maigapu iti daytoy.” (Lucas 4:43) Kasapulan ti ekstraordinario a pigsa tapno mabaelan ti maysa a pagpagnaen ti intero a Palestina ken maipakaammona daytoy a mensahe.

“UMAYKAYO . . . KET PAGIN-AWAENKAYTO”

Gapu ta nadungngo ken nalaka a maas-asitgan ni Jesus, sigurado a makaallukoy dayta nga awisna nangnangruna kadagiti “mabambannogan ken madagdagsenan.” (Mateo 11:28-30) Gapu iti kinadungngo  ken kinamanangngaasina, naipasigurado kadagidiay mayat nga agsursuro kenkuana a magin-awaandanto. Uray dagiti ubbing, kayatda nga asitgan ni Jesus, ta ibaga ti Biblia: “Innalana dagiti ubbing kadagiti takiagna.”—Marcos 10:13-16.

Saan a naliday a tao ni Jesus uray no napasaranna ti rigat sakbay a natay. Kas pagarigan, iti maysa a kasar idiay Cana, ad-adda a nagbalin a naragsak ti selebrasion gapu ta pinagbalinna ti danum a nasayaat nga arak. (Juan 2:1-11) Iti dadduma nga okasion, nangisuro kadagiti leksion a saanto a pulos malipatan.—Mateo 9:9-13; Juan 12:1-8.

Kangrunaanna, nangasaba ni Jesus tapno maaddaan dagiti dumdumngeg iti naragsak a namnama a biag nga agnanayon. (Juan 11:25, 26; 17:3) Idi impadamag ti 70 nga adalanna ti kapadasanda iti panangasaba, “naglaplapusanan ti rag-ona” ket imbagana: “Agrag-okayo agsipud ta ti nagnaganyo nailanaden iti langlangit.”—Lucas 10:20, 21.

“NUPAY KASTA, SAANKAY NGA AGBALIN A KASTA”

Idi panawen ni Jesus, immaniobra dagiti lider ti relihion ti bambanag tapno maiturong kadakuada ti atension ken maipaganetget ti autoridadda. (Numeros 15:38-40; Mateo 23:5-7) Ngem naiduma ni Jesus. Insurona dagiti apostolna a saanda nga ‘iturayan’ ti sabsabali. (Lucas 22:25, 26) Kinapudnona, impakdaar ni Jesus: “Siputanyo dagiti eskriba a kayatda ti agpagnapagna a nagpagan-anay iti nagayad ket kayatda dagiti kablaaw kadagiti plasa.”—Marcos 12:38.

Iti sabali a bangir, no makikadua idi ni Jesus kadagiti tattao, adda dagiti panawen a saanda a mailasin. (Juan 7:10, 11) Saan met a naidumduma ti langana kadagiti 11 a matalek nga apostolna. Idi adda dagiti mangtiliw ken Jesus, isu ket kasapulan pay a bisongen wenno agepan ni Judas, kas “napagaanamongan a pagilasinan,” tapno maammuanda no asino ni Jesus.—Marcos 14:44, 45.

Uray no adu a detalye ti saantayo nga ammo, nalawag a naiduma ti langa ni Jesus iti kaaduan a pannakailadawanna. Nupay kasta, adda banag a napatpateg ngem iti talaga a langana—ti kapanunotantayo maipapan kenkuana ita.

“APAGBIIT LAENGEN KET TI LUBONG SAANNAKTON A MAKITA”

Imbaga ni Jesus dagita iti mismo nga aldaw ti ipapatay ken pannakaitabonna. (Juan 14:19) Intedna ti biagna “kas subbot a kasukat dagiti adu.” (Mateo 20:28) Iti maikatlo nga aldaw, pinagungar ti Dios ni Jesus kas “espiritu” ken “pinalubosanna a maiparangarang” wenno agparang iti dadduma nga adalan. (1 Pedro 3:18; Aramid 10:40) Ania ngarud ti langa ni Jesus idi nagpakita kadagiti adalanna? Nalawag a naiduma unay iti dati a langana ta saan a nailasin a dagus uray dagiti nadekket kenkuana nga adalanna. Impagarup ni Maria Magdalena nga isu ket maysa a hardinero. Iti met dalan nga agpa-Emmaus, impagarup ti dua nga adalan nga isu ket maysa a dayo.—Lucas 24:13-18; Juan 20:1, 14, 15.

Kasano ngarud ti panangiladawantayo ken Jesus ita? Nasurok nga 60 a tawen kalpasan a natay ni Jesus, adda dagiti nasirmata ti madungdungngo nga apostol a ni Juan maipapan ken Jesus. Kadagita a sirmatana, saanna a nakita a matmatay ni Jesus iti krus. Imbes ketdi, nakitana ti “Ari ti ar-ari ken Apo ti ap-appo,” ti Ari ti Pagarian ti Dios, a dandanin mangdadael kadagiti demonio ken tattao a kabusor ti Dios, ken mangyeg iti agnanayon a bendision kadagiti tattao.—Apocalipsis 19:16; 21:3, 4.