Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan  |  Oktubre 2015

 NAGKAUNA A PRINSIPIO A MAKATULONG ITA

Naimpusuan a Mangpakawan

Naimpusuan a Mangpakawan

PRINSIPIO TI BIBLIA: ‘Itultuloyyo a sibubulos a pakawanen ti maysa ken maysa no ti asinoman adda pakaigapuan ti reklamona maibusor iti sabali. Kas iti sibubulos a panangpakawan kadakayo ni Jehova, kasta met ti aramidenyo.’—Colosas 3:13.

Ania ti kaipapananna? Iti Biblia, ti basol ket naipada iti utang ken ti panangpakawan ket nayarig iti saanen a panangsingir iti utang. (Lucas 11:4) Sigun iti maysa a reperensia, ti nausar iti Biblia a Griego a sao a naipatarus a “mangpakawan” kaipapananna ti “pananglipat iti utang babaen ti din panangsingir iti dayta.” Isu a no pinakawantayon ti maysa a nakabasol kadatayo, awanen ti aniaman a banag nga ekspektarentayo kenkuana. Ngem dina kayat a sawen a no naimpusuan a mangpakawantayo, konkonsintirentayo ti di nasayaat nga aramid wenno tagtagilag-anentayo ti sakit a resulta dayta kadatayo. Imbes ketdi, pinilitayo laeng a lipaten ti sakit ti nakem, uray no mabalin nga adda met nainkalintegan a ‘pakaigapuan ti reklamotayo.’

Makatulong kadi ita? Kas imperpekto a tao, agbasoltayo amin. (Roma 3:23) Isu a masiribtayo no mangpakawantayo ta addanto met tiempo a kasapulantayo ti pammakawan ti dadduma. Kasta met, pagimbagantayo no mangpakawantayo. Kasano?

No agipempempentayo iti gura wenno sakit ti nakem ken ditayo mangpakawan, saksaktantayo ti bagitayo. Dagiti kasta a negatibo a rikna pukawenda ti ragsaktayo, limitaranda ti maaramidantayo, ken pagbalinendatayo a miserable. Mabalin met a pakaigapuan dagita iti nakaro a problema iti salun-at. Kuna ti maysa a report iti Journal of the American College of Cardiology nga insurat da Dr. Yoichi Chida ken ti propesor ti psychology a ni Andrew Steptoe: “Ipakita dagiti resulta ti kaudian a panagadal a mabalin a ti gura ken pungtot ket pakaigapuan iti CHD [coronary heart disease].”

Ngem kitaem dagiti pagsayaatanna no naimpusuan a mangpakawantayo. Mapagtalinaedtayo ti panagkaykaysa ken talna isu a mataginayontayo ti nasayaat a relasiontayo iti sabsabali. Napatpateg pay, ipakpakitatayo a tultuladentayo ti Dios a naimpusuan a mangpakpakawan kadagiti agbabbabawi a managbasol ken mangnamnama a mangpakawantayo met.—Marcos 11:25; Efeso 4:32; 5:1.

Ammuem ti Ad-adu Pay

AGRIINGKAYO!

No Kasano ti Mangpakawan

Apay a nagrigat ti mangpakawan? Ammuem no kasano a makatulong ti balakad ti Biblia.