Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

TI PAGWANAWANAN OKTUBRE 2015

 SUHETO ITI AKKUB | ADDA KADI PAGSAYAATANNA NO AGKARARAGKA?

Apay nga Agkarkararag Dagiti Tattao?

Apay nga Agkarkararag Dagiti Tattao?

“Napeklanak idi a sugador. Inkarkararagko a mangabakak koma iti dakkel ngem saan a pulos napasamak dayta.”—Samuel, * Kenya.

“Idiay eskuelaan, ulit-ulitenmi laeng dagiti inkabesami a lualo a naisuro kadakami.”—Teresa, Pilipinas.

“Agkararagak no adda problemak. Agkararagak tapno mapakawan dagiti basolko ken agbalinak a nasaysayaat a Kristiano.”—Magdalene, Ghana.

Ipakita dagiti komento da Samuel, Teresa, ken Magdalene a nadumaduma ti rason nga agkarkararag dagiti tattao. Nasaysayaat ti rason ti dadduma ngem iti sabsabali. Adda dagiti naimpusuan a kararag; adda met dagiti saan. Ngem marikna ti minilion a tattao a kasapulanda ti agkararag, idawatda man a makapasada iti eksaminasion iti eskuelaan, mangabak ti paboritoda a team, tulongan ti Dios ti pamiliada, wenno aniaman pay nga idawatda. Kinaagpaysuanna, ipakita dagiti surbey a regular met nga agkarkararag uray ti dadduma nga awan relihionna.

Agkarkararagka kadi? No wen, ania ti ikarkararagmo? Managkararagka man wenno saan, mabalin a mapanunotmo: ‘Talaga kadi nga adda pagsayaatanna ti panagkararag? Adda kadi dumdumngeg?’ Kuna ti maysa a mannurat a ti panagkararag ket maysa laeng a “pamay-an ti panangagas a mangparelaks.” Kasta met laeng ti kapanunotan ti dadduma a doktor ta ibagada a ti kararag ket maysa a kita ti “alternatibo nga agas.” Maysa la kadi a rutina ti ar-aramiden dagidiay agkarkararag wenno maysa laeng dayta a pangparelaks?

Iti sabali a bangir, ipakita ti Biblia a ti kararag ket saan la a basta pamay-an ti panangagas. Ibagbagana a talaga nga adda dumdumngeg kadagidiay husto ti panagkararag ken ikarkararagda. Pudno kadi daytoy? Kitaentayo dagiti ebidensia.

^ par. 3 Nabaliwan ti dadduma a nagan.