Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan  |  Agosto 2015

 SUHETO ITI AKKUB | BIAG KALPASAN TI IPAPATAY—POSIBLE KADI?

Namnama Dagiti Natay—Kasanom a Masigurado?

Namnama Dagiti Natay—Kasanom a Masigurado?

Narigat kadi a patien nga agbiagto manen dagiti natay? Saan a kasta ti kapanunotan ni apostol Pablo. Iti panangiwanwan ti Dios, insuratna: “No iti daytoy laeng a biag a nanginanamatayo ken Kristo, kadagiti amin a tattao datayo ti nakakaasi unay. Nupay kasta, ita ni Kristo naibangonen manipud kadagiti natay, ti umuna a bungbunga kadagidiay naturog ken patay.” (1 Corinto 15:19, 20) Masigurado ni Pablo nga adda panagungar. Ti mismo a panagungar ni Jesus ti mangpaneknek iti dayta. * (Aramid 17:31) Isu nga inawagan ni Pablo ni Jesus kas “umuna a bungbunga” ta isu ti immuna a napagungar nga agbiag iti agnanayon. No ni Jesus ti immuna, kaawatan nga adda pay sabsabali.

Kinuna ni Job iti Dios: “Kailiwmonto ti aramid dagita imam.”—Job 14:14, 15

Adda pay ti sabali a rason a masiguradom ti namnama a panagungar. Ni Jehova ket Dios ti kinapudno. “Ti Dios . . . saanna a mabalin ti agulbod.” (Tito 1:2) Pulos a di nagulbod ni Jehova, ket saanto a pulos agulbod. Ikarina ngata ti panagungar ken ipakitana a kabaelanna a pagungaren dagiti tattao sa dina met tungpalen ti inkarina? Imposible dayta!

Apay ngata nga inyurnos ni Jehova ti panagungar iti masanguanan? Gapu iti ayatna. “No ti nabaneg a lalaki matay mabalinna kadi ti agbiag manen?” insaludsod ni Job. “Umawagkanto, ket siak sungbatankanto. Kailiwmonto ti aramid dagita imam.” (Job 14:14, 15) Kombinsido ni Job nga il-iliwen ti naayat a nailangitan nga Amana nga isu ket pagungarennanto. Nagbaliw kadin ti Dios? “Siak ni Jehova; saanak a nagbaliw.” (Malakias 3:6) Il-iliwen pay laeng ti Dios a makita nga agbiagto manen dagiti natay a nasalun-at ken naragsak. Kasta  met laeng ti kayat a mapasamak ti maysa a naayat nga ama a natayan iti anak. Ngem ti laeng nagdumaanna, adda pannakabalin ti Dios a mangaramid iti kayatna.—Salmo 135:6.

Ti ipapatay ket narigat a problema, ngem adda perpekto a solusion ti Dios

Ipaayanto ni Jehova ti pannakabalin ti Anakna tapno mangyeg iti napalalo a ragsak kadagidiay nagladingit gapu iti ipapatay dagiti ipatpategda. Ania ngata ti panagrikna ni Jesus maipapan iti panagungar? Sakbay a pinagungarna ni Lazaro, nakitana ti panagladingit dagiti kakabsat ken gagayyem ni Lazaro, ket ‘nagarubos dagiti luana.’ (Juan 11:35) Iti sabali pay a gundaway, nasabat ni Jesus ti balo a taga-Nain, a natay ti kakaisuna nga anakna. “Simnek ti asi [ni Jesus] kenkuana, ket kinunana kenkuana: ‘Sumardengka nga agsangsangit.’” Dagus a pinagungarna ti anak ti balo. (Lucas 7:13) Narikna ni Jesus ti saem nga iyeg ti ipapatay. Maragsakanto la ketdi ni Jesus inton pagbalinenna a napalalo a ragsak ti ladingit a marikrikna dagiti tattao!

Nakariknaka kadin iti nakaro a ladingit? Mabalin nga ipagarupmo a ti ipapatay ket problema nga awan ti solusionna. Ngem adda solusion. Isu ti panagungar nga aramiden ti Dios babaen ti Anakna. Laglagipem a kayat ti Dios a makitam dayta a solusion. Kayatna nga addakanto sadiay a mangarakup manen kadagiti ipatpategmo. Panunotem inton kaduam ida nga agplamplano para iti agnanayon a masanguanan, a saankayton nga agpipinnakada!

Kuna ni Lionel nga immun-unan a nadakamat: “Idi agangay, naammuak ti maipapan iti panagungar. Nagrigat a patien idi damo, ken diak agtalek iti tao a nangibaga kaniak iti dayta. Ngem kinitak dayta iti Biblia ket agpayso gayam! Magagaranak unay a makakita manen ken lolok.”

Kayatmo kadi a maammuan ti ad-adu pay? Maragsakan dagiti Saksi ni Jehova a mangipakita kenka iti mismo a Bibliam no apay a mamatida iti panagungar iti masanguanan. *

^ par. 3 Para iti pammaneknek a napagungar ni Jesus, kitaem ti libro a Ti Biblia—Sao’t Dios wenno iti Tao? panid 78-86, nga impablaak dagiti Saksi ni Jehova.

^ par. 9 Pangngaasim ta kitaem ti kapitulo 7 iti libro nga Ania a Talaga ti Isursuro ti Biblia? nga impablaak dagiti Saksi ni Jehova.

Ammuem ti Ad-adu Pay

TI PAGWANAWANAN —PAGADALAN NGA EDISION

Panangdaer iti Ipupusay ti Asawam

Naulpit ken napaut ti saem a gapuanan ti ipupusay ti asawa. Ammuem no kasano a makaliwliwa ti namnama a panagungar a nailanad iti Sao ti Dios.

ANIA A TALAGA TI ISURSURO TI BIBLIA?

Ti Pudno a Namnama Dagiti Natayen a Patpatgem iti Biag

Natayanka kadin iti patpatgen? Makitamto kadi manen ida? Ammuem ti isursuro ti Biblia maipapan iti panagungar.