Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan  |  Agosto 2015

 SUHETO ITI AKKUB | BIAG KALPASAN TI IPAPATAY—POSIBLE KADI?

Adda Kadi Namnama Dagiti Natay?

Adda Kadi Namnama Dagiti Natay?

Agbiagto kadi manen dagiti natay?

TI SUNGBAT TI BIBLIA: “Um-umayen ti oras nga amin dagidiay adda kadagiti pakalaglagipan a tanem mangngegdanto ti timek [ni Jesus] ket rummuarda.”Juan 5:28, 29.

Kasta ti impakpakauna ni Jesus a mapasamak iti masanguanan, nga iti sidong ti turay ti Pagarianna, awanton ti nagyan ti tanem. “Nasdaawak idi damok a mabasa ti Juan 5:28, 29,” kuna ni Fernando a nadakamat iti immuna nga artikulo. “Naaddaanak iti pudpudno a namnama, ken positibon ti panangmatmatko iti masanguanan.”

Idi un-unana, namnamaen idi ni matalek a Job nga isu ket pagbiagento manen ti Dios kalpasan a matay. Insaludsod ni Job: “No ti nabaneg a lalaki matay mabalinna kadi ti agbiag manen?” Sikokompiansa nga insungbatna: “Amin dagiti aldaw ti inkapilitan a panagtrabahok [ti tiempo a kaadda iti tanem] agurayakto, agingga a ti gin-awak dumteng. Umawagkanto, ket siak sungbatankanto.”—Job 14:14, 15.

Ti panagungar ni Lazaro ikkannatayo iti namnama iti masanguanan

Ti panagungar ket saan a kabbaro ken Marta a kabsat ni Lazaro. Idi natay ni Lazaro, kinuna ni Jesus ken Marta: “Bumangonto ni kabsatmo.” Insungbat ni Marta: “Ammok a bumangonto inton panagungar iti kamaudianan nga aldaw.” Kas sungbat, kinuna ni Jesus: “Siak ti panagungar ken ti biag. Ti mangwatwat iti pammati kaniak, uray no matay, agbiagto.” (Juan 11:23-25) Ket dagus a pinagungarna ni Lazaro! Dayta a makapagagar a salaysay ikkannatayo iti pamalatpatan iti daddadakkel a mapasamak iti masanguanan. Panunotem laengen ti maaramidto a panagungar iti intero a daga!

Addanto ngata mapagungar a mapan idiay langit?

TI SUNGBAT TI BIBLIA: Ipakita ti Biblia a ti panagungar ni Jesus ket naiduma iti walo a panagungar a nairekord iti Biblia. Ditoy daga a napagungar dagiti walo a tattao. Ngem ti panagungar ni Jesus, mabasatayo: “Ni Jesu-Kristo . . . adda iti makannawan ti Dios, ta napan sadi langit.” (1 Pedro 3:21, 22) Ni Jesus kadi ti kakaisuna a mapagungar a mapan idiay langit? Imbaga idi ni Jesus kadagiti apostolna: “No mapanak ket mangisaganaak iti lugar a maipaay kadakayo, umayak manen ket awatenkayto nga ikuyog kaniak, tapno no sadino ti ayanko addakayo met koma.”—Juan 14:3.

Napan ni Kristo idiay langit ket insaganana ti isasangpet ti dadduma nga adalanna. Agdagupto iti 144,000 dagiti mapagungar a mapan idiay langit. (Apocalipsis 14:1, 3) Ngem anianto ti aramiden dagidiay a pasurot ni Jesus idiay langit?

Adunto ti trabahoda! Ibaga ti Biblia kadatayo: “Naragsak ken nasantuan ti asinoman nga addaan paset iti umuna a panagungar; kadagitoy awan autoridad ti maikadua nga ipapatay, no di ket  isudanto ti papadi ti Dios ken ni Kristo, ket makipagturaydanto kenkuana kas ar-ari iti sangaribu a tawen.” (Apocalipsis 20:6) Dagidiay mapagungar a mapan idiay langit makipagturaydanto ken Kristo kas ar-ari ken papadi iti intero a daga.

Siasinonto dagiti sumaruno a mapagungar?

TI SUNGBAT TI BIBLIA: Mabasa iti Kasuratan dagitoy a sasao ni apostol Pablo: “Adda inanamak iti Dios, ti inanama nga ab-abrasaen met dagitoy a tattao, nga addanto panagungar agpadpada dagiti nalinteg ken dagiti nakillo.”Aramid 24:15.

Ipasigurado ti Sao ti Dios a mapagungarto dagiti binilion a natayen

Siasinonto dagiti mairaman iti grupo nga inawagan ni Pablo kas “dagiti nalinteg”? Usigem daytoy a pagarigan. Naibaga ken matalek a Daniel idi dandanin matay: “Aginanakanto, ngem tumakderkanto maipaay iti bingaymo iti panungpalan dagiti aldaw.” (Daniel 12:13) Sadinonto ti pakariingan ni Daniel manipud iti pannaturogna ken patay? “Dagiti nalinteg tagikuaendanto ti daga, ket agtaengdanto nga agnanayon iti dayta.” (Salmo 37:29) Ken impadto ni Jesus: “Naragsak dagiti naalumamay ti kababalinda, yantangay tawidendanto ti daga.” (Mateo 5:5) Mapagungarto ni Daniel ken ti dadduma a matalek a lallaki ken babbai ket agbiagdanto manen ditoy daga iti agnanayon.

Siasinonto dagiti mairaman iti grupo nga inawagan ni Pablo kas “dagiti nakillo”? Isu dagiti binilion a tattao a nagbiag sa natay, nga adu kadakuada ti awanan iti gundaway a nangadal ken nangyaplikar iti kinapudno a linaon ti Biblia. Kalpasan a mapagungarda, maam-ammo ken maapresiardanto ni Jehova * ken ni Jesus. (Juan 17:3) Amin dagidiay mangpili nga agserbi iti Dios manamnamada nga agbiagdanto a kas iti kapaut ti panagbiag ni Jehova, iti agnanayon.

Amin dagidiay mangpili nga agserbi iti Dios manamnamada nga agbiagdanto nga agnanayon a nakasalsalun-at ken nakaragragsak

Anianto ti kasasaad ti daga?

TI SUNGBAT TI BIBLIA: Ti Dios “punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot.” (Apocalipsis 21:4) “Mangbangondanto iti balbalay ket agnaedda; ket pudno unay nga agmuladanto kadagiti kaubasan ket kanenda ti bungada.”—Isaias 65:21.

Panunotem ti panagbiag iti kasta a kasasaad a kaduam dagiti mapagungar nga ipatpategmo! Ngem agtalinaed ti saludsod a, Kasanom a masigurado nga addanto mapasamak a panagungar?

^ par. 15 Jehova ti nagan ti Dios a naipakaammo iti Biblia.

Ammuem ti Ad-adu Pay

NAIMBAG A DAMAG MANIPUD ITI DIOS

Ania ti Panggep ti Dios Para iti Daga?

Ilawlawag ti Biblia no apay a pinarsua ti Dios ti daga, no kaano nga agpatingga ti panagsagaba, ken no ania ti agur-uray iti masanguanan para iti daga ken dagiti agnaed iti dayta.

AGRIINGKAYO!

Biag iti Naisubli a Paraiso

Kasano a maisubli ti paraiso ditoy daga ken anianto ti kasasaad ti biag?