Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN AGOSTO 2015

 SUHETO ITI AKKUB | BIAG KALPASAN TI IPAPATAY—POSIBLE KADI?

Ania ti Mapasamak Kalpasan ti Ipapatay?

Ania ti Mapasamak Kalpasan ti Ipapatay?

“Ti pagarupko idi ket adda tallo a lugar a papanan ti tao no matay: langit, impierno, wenno purgatorio. Ammok a saanak a nasayaat a tao a maikari a mapan idiay langit wenno dakes unay tapno impierno ti papanak. Saan met a nalawag kaniak no ania ti purgatorio. Awan pay nabasak a kasta iti Biblia. Tao la ti mangibagbaga iti dayta.”—Lionel.

“Naisuro kaniak a mapan amin a tao idiay langit no matayda. Ngem saanak a kombinsido. Impagarupko a ti ipapatay ti pagpatinggaan ti amin ket awanen ti masanguanan dagiti natay.”—Fernando.

Napampanunotmo kadin: ‘Ania a talaga ti mapasamak kalpasan ti ipapatay? Agrigrigat kadi dagiti ipatpategtayo iti maysa a lugar? Makitatayto kadi manen ida? Kasanotay a makasigurado?’ Pangngaasim ta kitaem no ania a talaga ti isursuro ti Kasuratan. Umuna, usigentayo no ania ti ibagbaga ti Biblia a kasasaad dagiti natay. Kalpasanna, ammuentayo ti namnama nga ibagbaga ti Sao ti Dios, ti Biblia.

 Ania ti kasasaad dagiti natay?

TI SUNGBAT TI BIBLIA: “Dagiti sibibiag sipapanunotda a mataydanto; ngem no maipapan kadagiti natay, saanda a pulos sipapanunot iti aniaman, awananda metten a pulos kadagiti tangdan, agsipud ta ti pakalaglagipan kadakuada nalipatanen. Isuamin a masarakan ta imam nga aramiden, aramidem buyogen ti mismo a bilegmo, ta awan ti aramid wenno uray gakat wenno uray pannakaammo wenno uray sirib idiay Sheol, ti disso a papanam.” *Eclesiastes 9:5, 10.

Nalawag a ti Sheol ket lugar a papanan dagiti tattao no matayda. Simboliko dayta a lugar wenno kasasaad nga awanen ti puot wenno agpatinggan ti aniaman nga aramid. Ania ti pannakaawat ni matalek a Job iti Sheol? Napukawna ti amin a sanikuana ken annakna iti maysa laeng nga aldaw. Kalpasanna, nagtubo ti letteg iti intero a bagina. Impakaasina iti Dios: “O italimengnak koma iti Sheol, [“iti impierno,” Catholic Douay Version] tapno aywanannak a sililimed.” (Job 1:13-19; 2:7; 14:13) Nalawag a ti pannakaawat ni Job iti Sheol ket saan nga umap-apuy nga impierno, a sadiay a nakarkaro pay ti pannakaparigatna. Imbilangna ketdi dayta a lugar a pakabang-aranna.

Adda sabali pay a pamay-an a maammuantayo ti kasasaad dagiti natay. Sukimatentayo dagiti salaysay nga adda iti Kasuratan maipapan iti walo a tattao a napagungar.—Kitaem ti kahon a “ Walo a Panagungar a Nadakamat iti Biblia.”

Awan kadagiti walo ti nangdakamat a napanda iti lugar ti kinaragsak wenno pannakaparparigat. No dagiti napagungar ket napan kadagita a lugar idi natayda, saan ngata nga inyestoriada koma dayta iti sabsabali? Ken saan ngata a nairaman koma daytoy kadagiti salaysay ti Biblia tapno maammuan ti amin? Ngem awan ti kasta a mabasatayo iti Biblia. Nalawag nga awan ti inyestoria dagiti walo a tattao maipapan iti dayta. Apay? Gapu ta awan ti puotda, a kasda la nargaan iti turog. Kinaagpaysuanna, us-usaren no dadduma ti Biblia ti pannaturog a mangyilustrar iti ipapatay. Kas pagarigan, “naturog ken patay” da matalek a David ken Esteban.—Aramid 7:60; 13:36.

Ania ngarud ti namnama dagiti natay? Mabalinda pay ngata a mariing iti dayta a pannaturog?

^ par. 7 Iti Baro a Lubong a Patarus ti Nasantuan a Kasuratan, ti nausar a Hebreo a sao a “Sheol” ken ti Griego a sao a “Hades” kaipapananna ti “tanem.” Inusar ti dadduma a patarus ti Biblia ti sao nga “impierno,” ngem awan iti Biblia ti sursuro maipapan iti umap-apuy a lugar a pakatutuokan dagiti natay.

Ammuem ti Ad-adu Pay

Talaga Kadi a Nangpagungar ni Jesus Kadagiti Natay?

Ania ti paneknekan dagiti panagungar nga inaramid ni Jesus maipapan kadagiti karina iti masanguanan?