Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN HULIO 2015

 SUHETO ITI AKKUB | KASANOM A SANGUEN DAGITI PAKADANAGAM?

Panagdanag Gapu iti Pamilia

Panagdanag Gapu iti Pamilia

“Kalpasan a natay ni Tatang, imbaga ni lakayko nga adda babaina,” kuna ni Janet. “Iti dayta met la nga oras, innalana amin a badona ket pinanawannak ken ti dua nga annakmi.” Nakabirok ni Janet iti trabaho, ngem kurang ti sueldona a pagtinnag iti balayda. Saan la a kuarta ti problemana. “Kasla diak idi kaya no panunotek ti amin a responsabilidad a siak laengen ti mangibaklay,” nalagipna. “Makonsiensiaak ta kasla kurang ti mait-itedko iti annakko no ikompara iti dadduma a nagannak. Ken uray ita, pakadanagak no ania ti pampanunoten dagiti tattao kaniak ken iti annakko. Baka ipapanda a diak inaramid ti amin tapno masalbar ti relasionmi nga agassawa.”

Ni Janet

Nakatulong ken Janet ti panagkararag tapno makontrolna ti riknana ken mapasayaatna ti relasionna iti Dios. “Nagrigat no rabii ta nakaul-ulimek ti aglawlaw, ket nakaad-adu dagiti mapanunotko a pakadanagak. Nakatulong ti kararag ken panagbasa iti Biblia tapno makaturogak. Paboritok a teksto ti Filipos 4:6, 7: ‘Dikay maringgoran iti aniaman, no di ket iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios; ket ti talna ti Dios a mangringbaw iti isuamin a panunot saluadannanto dagiti pusoyo ken dagiti pannakabalin ti isipyo.’ Adu a rabii a nagkarkararagak ket limmag-an ti riknak gapu iti talna manipud ken Apo Jehova.”

Para iti amin a kita ti pakadanagan ti makaliwliwa a sasao ni Jesus maipapan iti kararag iti Sermonna iti Bantay: “Ti Dios nga Amayo ammona no ania ti bambanag a kasapulanyo sakbay pay a dawatenyo kenkuana.” (Mateo 6:8) Kasapulantayo a talaga ti agkararag ta dayta ti kangrunaan a pamay-an a ‘makaasidegtayo iti Dios.’ Ti resultana? ‘Umasidegto met ti Dios kadatayo.’—Santiago 4:8, Ti Baro a Naimbag a Damag Biblia.

Wen, no agkararagka, lumag-an ti riknam ta nairuarmo dagiti pakadanagam. Ngem saan la a dayta. Ti “Managdengngeg iti kararag” a ni Jehova tulonganna met dagidiay agpatpatulong kenkuana nga addaan pammati. (Salmo 65:2) Isu nga insuro ni Jesus kadagiti  adalanna a ‘kanayon nga agkararagda ken saanda a sumuksuko.’ (Lucas 18:1) Masapul nga itultuloytayo nga ikararag iti Dios nga idalan ken tulongannatayo, ken kombinsidotayo a bendisionanna ti pammatitayo. Ditay koma pagduaduaan a kayatna ken kayanatayo a tulongan. No kasta ti ‘di agressat a panagkararagtayo,’ ipakpakitatayo nga adda pudpudno a pammatitayo.—1 Tesalonica 5:17.

TI KAIPAPANAN TI PUDPUDNO A PAMMATI

Ania a talaga ti pammati? Karaman iti dayta ti ‘pananggun-od iti pannakaammo’ maipapan iti Dios. (Juan 17:3) Maaramidtay dayta no adalentayo nga umuna ti pampanunot ti Dios babaen ti Biblia. Maammuantay no kua a makitkitana ti tunggal maysa kadatayo ken kayatnatay a tulongan. Ngem saan la a dayta ti ramanen ti pudpudno a pammati. Masapul met a maaddaantayo iti nadekket ken nadayaw a pannakigayyem kenkuana. Kas iti pannakigayyem iti padatayo a tao, saan a mabukel ti kasta a relasion iti agpatnag laeng. Agtultuloy a ‘rumang-ay’ ti pammatitayo bayat nga umad-adu ti maadaltayo maipapan kenkuana, ‘ar-aramidentayo ti bambanag a makaay-ayo kenkuana,’ ken marikriknatayo a tultulongannatayo. (2 Corinto 10:15; Juan 8:29) Kasta a pammati ti nakatulong ken Janet a mangsango kadagiti pakadanaganna.

“Talaga a napapigsa ti pammatik gapu ta nariknak a kanayon a tultulongannak ni Apo Jehova a kasla adda laeng isuna iti abayko,” kuna ni Janet. “Namin-adu a napadasanmi ti saan a patas a pannakatrato a kasla nagrigat a daeran. Gapu iti adu a karkararagmi, kanayon a nangited ni Apo Jehova iti solusion a diak pulos mapanunot a bukbukodko. Kada agyamanak kenkuana, malagipko ti nagadu nga inaramidna para kaniak. Kanayon nga itedna ti tulongna no kasapulak, ken kaaduanna nga iti eksakto a tiempo a kasapulak unayen. Inikkannak met kadagiti pudpudno a Kristiano a gagayyem. Kanayon nga addada para kaniak ken nagsayaatda a modelo kadagiti annakko.” *

“Ammok itan no apay a kuna ni Apo Jehova iti Malakias 2:16 a ‘kagurana ti panagdiborsio.’ Para iti awan basolna nga asawa, dayta ti kasaeman a panangtraidor. Adu a tawenen sipud pimmanaw ni lakayko, ngem no dadduma, malidayanak pay laeng ken mariknak nga awan serserbik. No kasta ti mariknak, ikagumaak ti tumulong iti sabsabali, ket nakatulong met dayta kaniak.” Isu a babaen iti panangsurot ni Janet iti prinsipio ti Biblia a di isinsina ti bagi iti sabsabali, nakissayan ti pakadanaganna. *Proverbio 18:1.

Ti Dios ket “ama dagiti awan amada nga ubbing ken maysa nga ukom dagiti balo a babbai” a mangprotektar kadakuada.—Salmo 68:5

“Nangnangruna a limmag-an ti riknak gapu ta ammok a ti Dios ket ‘ama dagiti awan amada nga ubbing ken maysa nga ukom dagiti balo a babbai’ a mangprotektar kadakuada. Saannakaminto pulos panawan a kas iti inaramid ni lakayko.” (Salmo 68:5) Ammo ni Janet a dinatayo subsuboken ti Dios iti “dakes a bambanag.” Imbes ketdi, mangted a “sipaparabur” iti sirib iti amin ken iti “pannakabalin a nalablabes ngem ti gagangay” a makatulong kadatayo a mangsango kadagiti pakadanagantayo.—Santiago 1:5, 13; 2 Corinto 4:7.

Ngem kasanon no agdandanagtayo gapu iti peggad wenno iti delikado a kasasaad?

^ par. 10 Para iti kanayonan a pamay-an a makatulong tapno mapagballigian ti panagdandanag, kitaem ti artikulo nga “Adda Pay Kadi Maaramidam iti Situasionmo?” iti Hulio 2015 a ruar ti Agriingkayo! a mabasa online iti www.jw.org/ilo.

Ammuem ti Ad-adu Pay

Agtalekka Kadi iti Dios?

Ammuem no kasano nga agbalinka a naragsak no maam-ammom ti Dios kas mapagtalkan a gayyem.