Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan  |  Hunio 2015

Siasino ti Antikristo?

Siasino ti Antikristo?

Antichrist ti paulo ti maysa a nabiit pay a horror a pelikula.

Antichrist Superstar ti impanagan ti maysa a popular a banda iti albumda.

The Antichrist ti paulo ti maysa a libro ni Friedrich Nietzsche a philosopher idi 1800’s.

Antikristo ti kaaduanna nga awag dagiti nagkauna nga ari ken emperador kadagiti kalabanda.

Antikristo ti inyawag ni Martin Luther, a lider ti German Reformation, kadagiti papa ti Romano Katoliko.

GAPU ta nabayagen a nadumaduma ti pangus-usaran dagiti tattao iti termino nga “antikristo,” normal laeng a maisaludsodtayo: Siasino a talaga ti antikristo? Apay a paginteresantayo dayta a termino? Siempre, ti kasayaatan a makatulong kadatayo tapno maammuantayo no siasino ti antikristo ket ti Biblia, a maminlima a nangdakamat iti dayta a sao.

NAIPAKAMMO NO ASINO TI ANTIKRISTO

Ni apostol Juan ti kakaisuna a mannurat ti Biblia a nangusar iti sao nga “antikristo.” Ania ti kinunana maipapan iti dayta? Kastoy ti imbagana iti 1 Juan 2:18, 19, 22: “Ubbing, daytoy ti kamaudianan nga oras, ket, kas iti nangngegyo nga umay ti antikristo, uray pay ita timpuaren ti adu nga antikristo; manipud itoy a kinapudno magun-odantayo ti pannakaammo a daytoy ti kamaudianan nga oras. Rimmuarda manipud kadatayo, ngem saanda a kas kadatayo . . . Siasino ti naulbod no di daydiay mangilibak a ni Jesus isu ti Kristo? Isu daytoy ti antikristo, daydiay mangilibak iti Ama ken iti Anak.”

Naawatan ni Juan a ti antikristo ket amin a mangigaggagara a mangiwaras iti kinaulbod maipapan ken Jesu-Kristo ken iti pannursurona

Ania ti maadaltayo kadagita a sasao? Dinakamat ni Juan ti “adu nga antikristo,” kayatna a sawen, ti antikristo ket saan a maymaysa a tao no di ket grupo dagiti tattao. Isuda dagiti tattao wenno organisasion a mangiwarwaras kadagiti kinaulbod, mangibagbaga a ni Jesus ket saan nga isu ti Kristo, wenno ti Mesias, ken balbaliwanda ti kinapudno maipapan iti Dios ken iti Anakna a ni Jesu-Kristo. Ibagbagada nga isuda kano ti Kristo wenno pannakabagina. Ken gapu ta nadakamat a “rimmuarda manipud kadatayo,” isuda ngarud dagiti timmallikud iti pudno a sursuro ti Biblia. Kasta met, addan daytoy a grupo idi insurat ni Juan ti sasao iti ngato, iti “kamaudianan nga oras,” a nalabit idi dandanin matay ti amin nga apostol.

Ania pay ti insurat ni Juan maipapan iti antikristo? Namakdaar ni Juan maipapan kadagitoy nga ulbod a propeta iti 1 Juan 4:2, 3: “Tunggal naipaltiing nga ebkas a mangipudno a ni Jesu-Kristo immay a naglasag nagtaud iti Dios, ngem tunggal naipaltiing nga ebkas a saan a mangipudno ken Jesus saan a nagtaud iti Dios. Kanayonanna pay, daytoy ti naipaltiing nga ebkas ti antikristo a nangngegyo nga um-umay, ket ita addan ditoy lubong.” Kalpasanna, iti 2 Juan 7, inulit ni Juan dayta a punto: “Adu a manangallilaw ti nakastrek ditoy lubong, tattao a saan a mangipudpudno ken Jesu-Kristo kas immay a naglasag. Isu daytoy ti manangallilaw ken ti antikristo.” Nalawag a naawatan ni Juan a ti antikristo ket amin a mangigaggagara a mangiwaras iti kinaulbod maipapan ken Jesu-Kristo ken iti pannursurona.

“DAGITI ULBOD A MAMMADTO” KEN “TI TAO TI KINAKILLO”

Impakdaar ni Jesus a dagiti ulbod a propeta ket umay kas ‘lobo a narawet iti kawes ti karnero’

Nabayag pay sakbay nga insurat ni Juan ti maipapan kadagita a manangallilaw, binalakadanen ni  Jesu-Kristo dagiti adalanna: “Siputanyo dagiti ulbod a mammadto nga umay kadakayo iti kawes ti karnero, ngem iti uneg loboda a narawet.” (Mateo 7:15) Pinakdaaran met ni apostol Pablo dagiti Kristiano iti Tesalonica: “Awan koma ti asinoman a mangallilaw kadakayo iti aniaman a pamay-an, agsipud ta saanto nga umay malaksid no dumteng nga umuna ti apostasia ket maipanayag ti tao ti kinakillo, ti anak ti pannakadadael.”—2 Tesalonica 2:3.

Gapuna, addan dagiti ulbod a mammadto ken apostata idi pay umuna a siglo, ket inkagumaanda a pakapuyen ti kongregasion dagiti Kristiano. Ti termino nga “antikristo” nga inusar ni Juan ket tumukoy iti amin a nangiwaras iti kinaulbod maipapan ken Jesu-Kristo ken iti pannursurona. Kas ipakita dagiti sasao ni Pablo, ibilang ni Jehova a Dios dagitoy a tattao kas “anak ti pannakadadael.”

AGANNAD KADAGITI AR-ARAMID DAGITI ANTIKRISTO ITA

Komusta met ngay ita? Dagiti tattao ken organisasion a mangbukel iti antikristo busbusorenda latta ti Kristo ken ti pannursurona. Igaggagarada ti agiwaras kadagiti ulbod ken makaallilaw a sursuro ta kayatda a tikawen dagiti tattao maipapan iti kinasiasino ti Ama, ni Jehova a Dios, ken ti Anakna, ni Jesu-Kristo. Napateg ngarud nga agannadtayo kadagita a pangallilaw dagiti antikristo. Kitaentayo ti dua a pagarigan.

Iti uneg ti ginasut a tawen, insaknap dagiti relihion ti doktrina a Trinidad, ket ibagbagada nga agpada kano ti Ama ken ti Anak. Pagbalbalinen ngarud ti antikristo a misterio ti kinasiasino ni Jehova a Dios ken ni Jesu-Kristo. Gapu iti dayta, malaplapdan dagiti nasingpet a tattao a mangtulad ken Jesu-Kristo ken saanda a makaasideg iti Dios, kas iparparegta ti Biblia.—1 Corinto 11:1; Santiago 4:8.

Ad-adda pay a matikaw dagiti tattao gapu ta iparparegta dagiti relihion nga agusarda kadagiti patarus ti Biblia a nangikkat iti personal a nagan ti Dios a Jehova. Ar-aramidenda dayta uray no nasurok a 7,000 a daras a mabasa ti nagan a Jehova iti orihinal a manuskrito ti Biblia. Ania ti resultana? Lallalo a nagbalin a misterio ti kinasiasino ti pudno a Dios.

Iti sabali a bangir, adu a nasingpet a tattao ti natulongan nga agbalin a gayyem ti Dios idi naammuanda ti naganna a Jehova. Maysa kadakuada ni Richard, a nakasarita ti dua a Saksi ni Jehova. “Impakitada kaniak iti Biblia a Jehova ti nagan ti pudno a Dios,” kinuna ni Richard. “Nasdaawak ta adda gayam nagan ti Dios. Idi laeng a nangngegko dayta.” Manipud idin, binalbaliwanna ti panagbiagna tapno masurotna dagiti estandarte ti Biblia ken maparagsakna ni Jehova a Dios. “Naaddaanak iti nadekket a relasion iti Dios gapu ta naammuak ti naganna.”

Ginasut a tawenen nga al-allilawen ti antikristo ti minilion a tattao. Ngem babaen ti panagadal iti Biblia a Sao ti Dios, mailasintayo no siasino a talaga ti antikristo ken saantayo a maallilaw kadagiti kinaulbod nga iwarwarasna.—Juan 17:17.

Ammuem ti Ad-adu Pay

LIBRO KEN BROSHUR

Siasino a Talaga ti Mangkonkontrol iti Lubong?

Mabalin a masdaawka iti sungbat ti Biblia. Ammuem no apay a napateg dayta ken no ania ti magunggonam iti masanguanan.

SUNGBAT DAGITI SALUDSOD MAIPAPAN ITI BIBLIA

Adda Kadi iti Biblia ti Doktrina a Trinidad?

Adu a relihion ti mangisursuro a ti Dios ket Trinidad. Kasta kadi ti isursuro ti Biblia?

NAIMBAG A DAMAG MANIPUD ITI DIOS

Adda Kadi Nagan ti Dios?

Adu ti titulo ti Dios, kas iti Mannakabalin-amin, Namarsua, ken Apo. Ngem agarup 7,000 a daras a nausar ti personal a nagan ti Dios iti Biblia.