Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN ABRIL 2015

 PANNAKISARITA ITI MAYSA A KAARRUBA

Apay a Laglagipentayo ti Ipapatay ni Jesus?

Apay a Laglagipentayo ti Ipapatay ni Jesus?

Makita iti baba ti gagangay a pannakisarita ti maysa a Saksi ni Jehova iti maysa a kaarruba. Ipapantayo a ni Megan ti Saksi a simmarungkar iti pagtaengan da Shirley.

“ITULTULOYYO NGA ARAMIDEN DAYTOY KAS PANGLAGLAGIP KANIAK”

Megan: Hi, Shirley! Maragsakanak ta immayka iti Pananglaglagip iti ipapatay ni Jesu-Kristo idi napan a lawas. * Ania ti makunam iti okasion?

Shirley: Naragsak, ngem ti agpayso diak unay naawatan dagiti nangngegko sadiay. Ammok a napatpateg iti adu a tattao ti panangselebrarda iti pannakayanak ni Jesus ngem iti ipapatayna. Di la mabalin nga ilawlawagmo manen no apay a nakapatpateg a laglagipentayo ti ipapatay ni Jesus?

Megan: Pudno nga adu a tattao ti mangselselebrar iti Krismas. Ngem kadagiti Saksi ni Jehova, napateg ti pananglaglagip iti ipapatay ni Jesus. No adda panawenmo, maragsakanak a mangilawlawag manen kenka kadagiti rason.

Shirley: Sige.

Megan: Umuna, laglagipen dagiti Saksi ni Jehova ti ipapatay ni Jesus gapu ta imbilinna dayta kadagiti pasurotna. Kitaenta ti napasamak iti rabii sakbay ti ipapatay ni Jesus. Malagipmo kadi ti espesial a pannangan a kaduana dagiti matalek a pasurotna?

Shirley: Daydiay Last Supper?

Megan: Wen. Maaw-awagan met dayta iti Pangrabii ti Apo. Kabayatan daydi a pangrabii, adda nalawag nga imbilin ni Jesus. Mabalin kadi a basaem ditoy Lucas 22:19?

Shirley: Sige. “Kasta met, nangala iti tinapay, nagyaman, pinispisina, ket intedna kadakuada, a kunkunana: ‘Daytoy kaipapananna ti bagik a maited maigapu kadakayo. Itultuloyyo nga aramiden daytoy kas panglaglagip kaniak.’”

Megan: Pagyamanan. Kitaem ti imbilin ni Jesus iti maudi a paset ti binasam: “Itultuloyyo nga aramiden daytoy kas panglaglagip kaniak.” Sakbay nga imbagana dayta kadagiti pasurotna, inlawlawagna nga umuna no ania ti laglagipenda maipapan kenkuana. Kinunana nga itedna ti biagna maigapu kadagiti pasurotna. Kastoy met laeng ti kinuna ni Jesus iti Mateo 20:28: “Ti Anak ti tao immay, saan a tapno pagserbian, no di ket tapno agserbi ken tapno itedna ti kararuana kas subbot a kasukat dagiti adu.” Dayta ti makagapu a tinawen nga agtataripnong dagiti Saksi ni Jehova para iti anibersario ti ipapatay ni Jesus—tapno laglagipenda ti daton a subbot ni Jesus. Gapu iti ipapatayna, mabalin a maaddaan iti biag ti amin a natulnog a tattao.

APAY A KASAPULAN TI SUBBOT?

Shirley: Ibagbaga dagiti tattao a natay ni Jesus tapno agbiagtayo. Ngem ti agpayso, diak pulos maawatan no kasano a kasta.

Megan: Maawatanka, Shirley. Talaga a narigat a topiko ti daton a subbot ni Jesus. Ngem maysa  daytoy kadagiti kasayaatan a kinapudno iti Biblia. Mabalin kadi nga ilawlawagko dayta uray sumagmamano laeng a minuto?

Shirley: Sige.

Megan: Kabasbasak laeng ti maipapan iti subbot, ket ikagumaak nga ilawlawag iti simple a pamay-an.

Shirley: OK.

Megan: Tapno matarusanta ti subbot, kitaenta nga umuna ti nagbalin a kasasaad idi nagbasol da Adan ken Eva idiay hardin ti Eden. Makatulong no basaenta ti Roma 6:23 tapno maawatanta ti nairaman nga isyu. Pakibasam man ketdi.

Shirley: Kunana: “Dagiti isupapak ti basol isu ti ipapatay, ngem ti sagut nga ipaay ti Dios isu ti agnanayon a biag babaen ken Kristo Jesus nga Apotayo.”

Megan: Pagyamanan. Usigenta ti binasam. Kuna ti rugi ti teksto: “Dagiti isupapak ti basol isu ti ipapatay.” Simple daytoy a paglintegan ti Dios idi rugrugi ti pakasaritaan ti tao—ipapatay ti supapak wenno dusa ti basol. Siempre, awan ti basol idi damo. Naparsua a perpekto da Adan ken Eva, ken perpekto met koma ti amin nga annakda. Isu nga awan koma ti matmatay. Adda gundaway da Adan ken Eva agraman dagiti kaputotanda a siraragsak nga agbiag iti agnanayon. Ngem kas pagaammotayo, saan a kasta ti napasamak.

Shirley: Wen ngarud. Nangan ngamin da Adan ken Eva iti maiparit a bunga.

Megan: Hustoka. Idi nanganda, pinili da Adan ken Eva ti agsukir iti Dios isu a nagbasolda. Pinilida ti agbalin nga imperpekto ken managbasol. Dakes ti nagbanagan dayta para kadakuada ken kadagiti kaputotanda.

Shirley: Ania ti kayatmo a sawen?

Megan: Nasayaat siguro no agusarta iti maysa nga ilustrasion. Kaykayatmo kadi ti agluto iti tinapay?

Shirley: Wen! Magusgustuak dayta.

Megan: Ibagatan nga adda baro a paglutuam iti tinapay. Ngem dimo pay nausar, natinnag isu a nakuppit. Ania ngata ti mapasamak kadagiti tinapay a lutuem iti dayta? Saan kadi nga adda amin kuppitda?

Shirley: Siempre.

Megan: Umasping iti dayta, idi pinili da Adan ken Eva ti agsukir iti Dios, naaddaanda iti “kuppit,” wenno depekto, gapu iti basol ken kinaimperpekto. Gapu ta nagbasolda sakbay a naaddaanda iti annak, adda “kuppit” ti amin a mayanakda, kayatna a sawen, managbasolda amin. Iti Biblia, ti sao a “basol” ket saan laeng a tumukoy iti dakes nga aramid, agaplikar pay iti kasasaad a natawidtayo. Kas resultana, uray awan pay naaramidantayo a dakes ken ditay pay nayanak idi nagbasol da Adan ken Eva, automatiko a natawidtayo amin ti kinaimperpekto ken basol nga agtungpal iti ipapatay. Kas nabasata iti Roma 6:23, ti supapak ti basol ket ipapatay.

Shirley: Kasla saan a nainkalintegan dayta. Apay koma nga agsagaba iti agnanayon ti amin a tao gapu iti basol da Adan ken Eva?

Megan: Wen, kasla saan a nainkalintegan. Ngem panunotem daytoy. Perpekto ti kinahustisia ti Dios, isu nga inkeddengna a matay da Adan ken Eva gapu iti basolda. Nupay kasta, adda namnamatayo a kaputotanda. Nangaramid ti Dios iti pamay-an tapno mawayawayaantayo iti daytoy narigat a kasasaad. Ditoy a sumrek ti daton a subbot ni Jesus. Sublianta ti Roma 6:23. Kalpasan a dinakamatna a “dagiti isupapak ti basol isu ti ipapatay,” kuna ti teksto: “Ngem ti sagut nga ipaay ti Dios isu ti agnanayon a biag babaen ken Kristo Jesus nga Apotayo.” Isu a ti ipapatay ni Jesus ti namagbalin a posible a maispaltayo iti basol ken ipapatay. *

 TI SUBBOT—KAPATGAN A SAGUT TI DIOS

Megan: Adda pay sabali a detalye iti daytoy a teksto a kayatko nga ipakita kenka.

Shirley: Ania dayta?

Megan: Siputam ta kuna ti teksto: “Ti sagut nga ipaay ti Dios isu ti agnanayon a biag babaen ken Kristo Jesus nga Apotayo.” No ni Jesus ti nagsagaba ken natay, ken nangipaay iti biagna agpaay kadatayo, apay ngarud a kuna ti teksto a ti subbot ket “sagut nga ipaay ti Dios”? Apay a dina imbaga, “sagut nga ipaay ni Jesus”? *

Shirley: Hmm. Diak ammo.

Megan: Pinarsua ti Dios da Adan ken Eva, ket nagbasolda kenkuana idi nagsukirda idiay hardin ti Eden. Sigurado a nasaktan ni Jehova idi nagrebelde ti dua nga immuna a tao nga annakna. Ngem imbaga a dagus ni Jehova ti solusion. * Pinanggepna nga umay ditoy daga ti maysa kadagiti espiritu a parsuana, agbiag kas perpekto a tao, sa ipaayna ti biagna kas daton a subbot. Isu a ti subbot ket talaga a sagut ti Dios. Ngem saan la a dayta, napanunotmo kadin no ania ti narikna ti Dios idi napapatay ni Jesus?

Shirley: Saan pay.

Megan: Makitak nga adda ay-ayam iti arubayanyo. Adda kadi anakmo?

Shirley: Wen, maysa a lalaki ken maysa a babai.

Megan: Kas maysa a nagannak, panunotem no ania ti narikna ti nailangitan nga Ama a ni Jehova idi napapatay ti Anakna a ni Jesus. Ania ngata ti nariknana idi kitkitaenna manipud langit a maar-aresto, mauy-uyaw, ken matungtungpa ti ay-ayatenna nga Anak? Ken ania ngata ti nariknana bayat a mailanlansa ti Anakna iti maysa a kayo, tapno mapasaranna ti in-inut ken nasaem nga ipapatay?

Shirley: Sigurado a nasaktan. Diak pulos napanunot dayta!

Megan: Siempre, saantay nga ammo ti eksakto a narikna ti Dios iti daydi nga aldaw. Ngem ammotayo nga adda riknana, ken ammotayo met no apay nga impalubosna a mapasamak dayta. Nagsayaat ti pannakailawlawag daytoy iti maysa a pamiliar a teksto, iti Juan 3:16. Pakibasam man.

Shirley: Kunana: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.”

Ti daton a subbot ti kadakkelan pay laeng nga ebkas ti ayat

Megan: Pagyamanan. Sublianta ti rugi dayta a bersikulo. Kunana: “Ti Dios inayatna ti lubong.” Dayta ti tulbek—ayat. Ayat ti nangtignay iti Dios a mangibaon iti Anakna ditoy daga tapno matay agpaay kadatayo. Talaga a ti daton a subbot ti kadakkelan pay laeng nga ebkas ti ayat. Dayta ti makagapu nga agtataripnong dagiti Saksi ni Jehova iti kada tawen, tapno laglagipenda ti anibersario ti ipapatay ni Jesus. Nakatulong met laeng kadi kenka ti nagsaritaanta?

Shirley: Wen. Pagyamanan iti panangilawlawagmo.

Adda kadi kayatmo a maammuan a topiko iti Biblia? Adda kadi saludsodmo maipapan iti patpatien dagiti Saksi ni Jehova? No kasta, dika koma bumdeng a makisarita kadagiti Saksi ni Jehova ta maragsakanda a mangilawlawag iti dayta.

^ par. 5 Maminsan iti kada tawen, agtataripnong dagiti Saksi ni Jehova iti anibersario ti ipapatay ni Jesus tapno laglagipenda ti sakripisiona. Ita a tawen, maangay dayta inton Biernes, Abril 3.

^ par. 32 Addanto artikulo iti daytoy a serye a mangilawlawag no kasano a ti daton a subbot ni Jesus ispalennatayo manipud iti basol, ken no ania ti masapul nga aramidentayo tapno magunggonaantayo iti subbot.

^ par. 36 Sigun iti Biblia, nagduma ti Dios ken ni Jesus. Para iti kanayonan nga impormasion, kitaem ti kapitulo 4 ti libro nga Ania a Talaga ti Isursuro ti Biblia? nga impablaak dagiti Saksi ni Jehova.

Ammuem ti Ad-adu Pay

Ti Subbot—Kapatgan a Sagut ti Dios

Ania ti subbot? Kasanoka a mabenepisiaran iti daytoy?

Apay a Nagsagaba ken Natay ni Jesus?

Kasano a mabenepisiaranka iti ipapatayna?