Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan  |  Marso 2015

Sungbat Dagiti Saludsod Maipapan iti Biblia

Sungbat Dagiti Saludsod Maipapan iti Biblia

Apay a rumbeng a laglagipentayo ti ipapatay ni Jesus?

Ania a namnama ti agbalin a posible gapu iti ipapatay ni Jesus?—Isaias 25:8; 33:24

Ti ipapatay ni Jesus ti kapatgan a pasamak iti historia—natay tapno maisubli ti biag ti tao sigun iti nakairantaanna. Saan a naparsua ti tao nga addaan iti pagannayasan nga agaramid iti dakes, agsakit, wenno matay. (Genesis 1:31) Ngem simrek ti basol iti lubong babaen ti immuna a tao a ni Adan. Inted ni Jesus ti biagna tapno maispaltayo iti basol ken ipapatay.—Basaem ti Mateo 20:28; Roma 6:23.

Impakita ti Dios ti naisangsangayan nga ayatna babaen ti panangibaonna iti Anakna ditoy daga tapno matay para kadatayo. (1 Juan 4:9, 10) Imbilin ni Jesus kadagiti pasurotna a laglagipenda ti ipapatayna babaen iti simple a seremonia a pakairamanan ti tinapay ken arak. No aramidentayo dayta iti tunggal tawen, ap-apresiarentayo ti ayat nga impakita ti Dios ken ni Jesus.—Basaem ti Lucas 22:19, 20.

Siasino dagiti mangan iti tinapay ken uminum iti arak?

Idi damo nga imbaga ni Jesus kadagiti adalanna a laglagipenda ti ipapatayna, dinakamatna ti maysa a tulag. (Mateo 26:26-28) Nangted dayta kadakuada iti namnama ken dadduma ti agbalinto nga ar-ari ken papadi a kaduana idiay langit. Nupay minilion ti manglaglagip iti ipapatay ni Jesus, dagidiay laeng nakitulaganna ti mangan iti tinapay ken uminum iti arak.—Basaem ti Apocalipsis 5:10.

Dandani 2,000 a tawenen a mangpilpili ni Jehova kadagiti agbalin nga ar-ari. (Lucas 12:32) Manmanoda laeng no idilig kadagidiay agbiagto nga agnanayon ditoy daga.—Basaem ti Apocalipsis 7:4, 9, 17.