Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN PEBRERO 2015

 TI BIBLIA BALBALIWANNA TI BIAG

Nagustuak Dagiti Nalawag ken Lohikal a Sungbat ti Biblia

Nagustuak Dagiti Nalawag ken Lohikal a Sungbat ti Biblia
  • PANNAKAYANAKNA: 1948

  • NAKAYANAKANNA: HUNGARY

  • PAKASARITAANNA: NAGBIRBIROK ITI SUNGBAT KADAGITI NAPATEG A SALUDSOD ITI BIAG

TI NAPALABASKO:

Nayanakak iti Székesfehérvár, Hungary, maysa a siudad nga aduan iti pakasaritaan nasurok a 1,000 a tawenen ti napalabas. Makapaladingit ta malagipko pay laeng dagiti makadadael nga epekto ti maikadua a gubat sangalubongan.

Idi ubingak pay, da lolo ken lolak ti nangay-aywan kaniak. Maragragsakanak no malaglagipko ida—nangruna ni lolak nga Elisabeth. Tinulongannak a maaddaan iti nabileg a pammati iti Dios. Idi tallon ti tawenko, rinabii a kararagenmi ti maaw-awagan no dadduma a Kararag ti Apo. Ngem idi laeng dandani 30 ti tawenko a naawatak ti kaipapanan dayta a kararag.

Addaak idi iti poder da lolo ken lolak gapu ta aldaw ken rabii nga agtrabtrabaho dagiti nagannakko tapno makaurnongda iti igatang iti desente a balay. Ngem tunggal maikadua a Sabado, agkakaduakami a mangan a sangapamilia. Diak malipatan dagidi a panagkakaduami.

Idi 1958, natungpal ti arapaap dagiti nagannakko; nakagatangda iti balay a pagiananmi a tallo. Makaduak met laengen ida—nakaragragsakak! Ngem innem a bulan kalpasanna, napukaw dayta a kinaragsak. Natay ni Tatang gapu iti kanser.

Kasta unay a ladingitko. Malagipko pay nga inkararagko idi iti Dios: “Apo, impakpakaasik a paimbagem ni tatangko ta kasapulak isuna. Apay a dimo sinungbatan dagiti kararagko?” Kayatko unay a maammuan no ayan ni tatangko. Pinampanunotko: ‘Adda kadin idiay langit? Wenno awanen iti agnanayon?’ Umapalak kadagiti ubbing nga addaan iti amma.

Iti adu a tawen, dandani inaldaw a mapanak iti sementerio. Agparintumengak iti tanem ni Tatang sa ikararagko: “Apo, pangngaasim ta ibagam no ayan ni tatangko.” Inkararagko met a tulongannak a mangtarus iti panggep ti biag.

 Idi agtawenak iti 13, nagsursuroak iti German. Impagarupko a gapu ta adu ti literatura dagiti German, maammuak ti sungbat dagiti saludsodko. Idi 1967, nagadalak iti siudad ti Jena, a paset idi ti East Germany. Sigagagar a nagbasaak kadagiti libro dagiti pilosopo a German, nangruna dagidiay maipapan iti panggep ti biag ti tao. Adda dagiti makapainteres nga ideya a naammuak ngem awan kadagita ti naan-anay a nakakombinsir kaniak. Intultuloyko ti nagbirok kadagiti sungbat.

NO KASANO A BINALBALIWAN TI BIBLIA TI BIAGKO:

Idi 1970, nagsubliak iti Hungary ket naam-ammok ti nagbalin nga asawak a ni Rose. Komunismo idi ti turay iti Hungary. Di nagbayag kalpasan ti kasarmi, nagkamangkami ken Rose idiay Austria. Planomi ti umakarto met laeng iti Sydney, Australia, a pagnanaedan ni angkelko.

Nakabirokak a dagus iti trabaho idiay Austria. Maysa nga aldaw, imbaga ti katrabahuak a makitak iti Biblia ti sungbat ti amin a saludsodko. Inikkannak iti sumagmamano a libro a mangilawlawag iti Biblia. Binasak a naimbag dagita ken kayatko a maammuan ti ad-adu pay isu a nagsuratak kadagiti Saksi ni Jehova, a nangipablaak kadagita a libro, ken nagkiddawak iti kanayonan a literatura.

Iti umuna nga anibersario ti kasarmi ken Rose, adda agtutubo a Saksi a bimmisita kadakami. Intugotna ti literatura a kiniddawko ken intukonna nga iyadalannak iti Biblia, ket inawatko met. Gapu ta magagaranak a makasursuro, mamindua iti makalawas nga agadalkami ken agpaut ti tunggal panagadal iti agarup uppat nga oras!

Magusgustuak ti isursuro dagiti Saksi manipud iti Biblia. Nasdaawak idi impakitada ti nagan ti Dios a Jehova iti Hungarian a Bibliak. Iti 27 a tawen a pannakimismisak, diak pulos nangngeg a nadakamat ti nagan ti Dios. Nagustuak dagiti nalawag ken lohikal a sungbat ti Biblia kadagiti saludsodko. Kas pagarigan, naadalko nga awan ti puot dagiti natay, a kaslada matmaturog laeng iti nargaan. (Eclesiastes 9:5, 10; Juan 11:11-15) Naammuak met ti kari ti Biblia a baro a lubong a sadiay “awanton ni patay.” (Apocalipsis 21:3, 4) Mangnamnamaak a makitakto manen ni tatangko iti dayta a baro a lubong a ‘pagungaranto’ dagiti natay.—Aramid 24:15.

Naimpusuan a nakikadua kaniak ni Rose nga agadal iti Biblia. Napartak ti panagrang-aymi ta nalpasmi ti ad-adalenmi a publikasion iti uneg laeng ti dua a bulan! Inatenderanmi ti amin a gimong dagiti Saksi iti Kingdom Hall. Apresiarenmi unay ti panagiinnayat, panagtitinnulong, ken panagkaykaysa dagiti Saksi ni Jehova.—Juan 13:34, 35.

Idi 1976, naaprobarankami ken Rose nga agnaed iti Australia. Binirokmi a dagus dagiti lumugar a Saksi ni Jehova ket nagalisto a naipasigmi ti bagbagimi kadakuada. Idi 1978, nagbalinkami met a Saksi.

NO KASANO A NAGUNGGONAANAK:

Nabirokak met laengen ti sungbat dagiti saludsod a nabayagen a pakaburiborak. Bayat a simmingedak ken Jehova a Dios, nabirokak met ti kasayaatan nga Ama. (Santiago 4:8) Ken nakapatpateg kaniak ti namnama a makitakto manen ni tatangko iti um-umayen a baro a lubong.—Juan 5:28, 29.

Idi 1989, inkeddengmi ken Rose ti agsubli iti Hungary tapno iranud dagiti patpatienmi kadagiti gagayyem, kapamilia, ken iti sabsabali pay a makasaritami. Pribilehiomi nga isuro ti Biblia iti ginasut a tattao. Nasurok a 70 kadakuada ti agserserbi itan ken Jehova, a pakairamanan ti ipatpategko nga ina.

Inkarkararagko iti 17 a tawen a mabirokak koma ti sungbat dagiti saludsodko. Limmabas pay ti 39 a tawen, agkarkararagak pay laeng—ngem ti ibagbagak itan ket “Pagyamanan, ay-ayatek nga Ama sadi langit ta sinungbatam dagiti kararagko idi ubingak.”

Ammuem ti Ad-adu Pay

Ti Pudno a Namnama Dagiti Natayen a Patpatgem iti Biag

Natayanka kadin iti patpatgen? Makitamto kadi manen ida? Ammuem ti isursuro ti Biblia maipapan iti panagungar.

Talaga Kadi a Posible ti Makapnek a Biag?

No mapaspasarantayo ti tuok wenno ladingit, kasapulan a maammuantayo no talaga a posible ti maaddaan iti makapnek a biag.

Ania ti Maar-aramid iti Kingdom Hall?

Kitaem a mismo ti maar-aramid iti uneg ti Kingdom Hall.