Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan  |  Enero 2015

Rumbeng Kadi nga Agkararagtayo ken Jesus?

Rumbeng Kadi nga Agkararagtayo ken Jesus?

MAYSA nga agsirsirarak ti nabiit pay a nangsurbey iti nasurok a 800 nga agtutubo a nagduduma ti relihionda. Dinamagna no mamatida a sungsungbatan ni Jesus dagiti kararagda. Nasurok nga 60 a porsiento ti mamati iti dayta. Ngem maysa nga agtutubo ti nanguged iti nagan ni Jesus iti surbey sa sinukatanna iti “Dios.”

Panagkunam, rumbeng kadi nga agkararagtayo ken Jesus wenno iti Dios? * Tapno masungbatan dayta, usigentayo nga umuna no kasano ti panagkararag nga insuro ni Jesus kadagiti adalanna.

ASINO TI INSURO NI JESUS A PAGKARARAGANTAYO?

Iti panagkararag ni Jesus iti nailangitan nga Amana, nangipakita iti ulidan a surotentayo

Insuro ken impakita ni Jesus no asino ti rumbeng a pagkararagantayo.

TI INSURONA: Idi kiniddaw ti maysa nga adalan ni Jesus, “Apo, isurom kadakami no kasano ti agkararag,” insungbatna: “No agkararagkayo, kunaenyo, ‘Ama.’” (Lucas 11:1, 2) Ken iti nalatak a Sermon ni Jesus iti Bantay, pinaregtana dagiti agdengdengngeg nga agkararag. Kinunana: “Agkararagka ken ni Amam.” Impasiguradona pay: Ti “Amayo ammona no ania ti bambanag a kasapulanyo sakbay pay a dawatenyo kenkuana.” (Mateo 6:6, 8) Iti rabii sakbay ti ipapatay ni Jesus, kinunana kadagiti adalanna: “No dumawatkayo iti Ama iti aniaman a banag itednanto dayta kadakayo iti naganko.” (Juan 16:23) Insuro ngarud ni Jesus nga agkararagtayo iti Amana ken Amatayo, ni Jehova a Dios.—Juan 20:17.

TI ULIDANNA: Maitunos iti insuro ni Jesus a panagkararag, personal met a nagkararag: “Idaydayawka iti publiko, Ama, Apo ti langit ken daga.” (Lucas 10:21) Iti sabali pay a gundaway, “intangad ni Jesus dagiti matana sadi langit ket kinunana: ‘Ama, agyamanak kenka ta dinengngegnak.’” (Juan 11:41) Ken idi dandanin matay, inkararag ni Jesus: “Ama, kadagita imam italekko ti espirituk.” (Lucas 23:46) Iti panagkararag ni Jesus iti nailangitan nga Amana—ti “Apo ti langit ken daga”—nangipakita iti umiso nga ulidan a suroten ti amin. (Mateo 11:25; 26:41, 42; 1 Juan 2:6) Kasta kadi ti pannakaawat dagiti nagkauna nga adalan ni Jesus kadagiti insurona?

ASINO TI NAGKARARAGAN DAGITI NAGKAUNA A KRISTIANO?

Sumagmamano pay laeng a lawas a nakasubli ni Jesus idiay langit, dagiti adalanna ket riniribuk ken pinangtaan dagiti bumusbusor. (Aramid 4:18) Siempre, nagpatulongda babaen ti kararag—ngem asino ti nagkararaganda? “Sangsangkamaysada a nangipigsa ti timekda iti Dios,” nga inkararagda nga itultuloyna ida a tulongan ‘babaen ti nagan ti nasantuan nga adipenna a ni Jesus.’ (Aramid 4:24, 30) Sinurot ngarud dagiti adalan ni Jesus ti insurona a panagkararag. Nagkararagda iti Dios, saan a ken Jesus.

Sumagmamano a tawen kalpasanna, dineskribir ni apostol Pablo no kasano ti panagkararagna ken dagiti kakaduana. Insuratna kadagiti padana a Kristiano: “Agyamankami a kankanayon iti Dios nga Ama ni Apotayo a Jesu-Kristo no ikararagandakayo.” (Colosas 1:3) Insuratna pay kadakuada: “Iti nagan ni Apotayo a Jesu-Kristo kankanayon nga agyamankayo  iti Dios ken Amatayo gapu iti amin a bambanag.” (Efeso 5:20) Ipakita dagita a sasao a pinaregta ni Pablo ti sabsabali nga agkararagda iti ‘Dios ken Amana gapu iti amin a bambanag’—ngem siempre, iti nagan ni Jesus.—Colosas 3:17.

Kas kadagiti nagkauna a Kristiano, maipakitatayo met ti ayattayo ken Jesus no surotentayo ti balakadna maipapan iti panagkararag. (Juan 14:15) No ti laeng pagkararagantayo ket ti nailangitan nga Amatayo, ad-adda a makapagtalektayo kadagiti sasao iti Salmo 116:1, 2: “Agayatak, agsipud ta denggen ni Jehova ti timekko . . . Iti isuamin nga al-aldawko umawagakto.” *

^ par. 3 Sigun iti Kasuratan, saan nga agpada ti Dios ken ni Jesus. Para iti ad-adu pay nga impormasion, kitaem ti kapitulo 4 iti libro nga Ania a Talaga ti Isursuro ti Biblia? nga impablaak dagiti Saksi ni Jehova.

^ par. 11 Tapno denggen ti Dios dagiti kararagtayo, masapul a sipapasnek nga ikagumaantayo nga aramiden dagiti kalikagumanna. Para iti ad-adu pay nga impormasion, kitaem ti kapitulo 17 iti libro nga Ania a Talaga ti Isursuro ti Biblia?

Ammuem ti Ad-adu Pay

SUNGBAT DAGITI SALUDSOD MAIPAPAN ITI BIBLIA

Tulongannak met Laeng Kadi ti Dios No Agkararagak?

Talaga kadi a maseknan ti Dios kadagiti problemam?

ANIA A TALAGA TI ISURSURO TI BIBLIA?

Umadanika iti Dios Babaen ti Kararag

Denggen kadi ti Dios ti kararagmo? Tapno masungbatan dayta a saludsod, nasken a maawatam no ania ti isursuro ti Biblia maipapan iti kararag.