Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN DISIEMBRE 2014

 SUHETO ITI AKKUB | MABALINMO TI SUMINGED ITI DIOS

Ar-aramidem Kadi ti Kayat ti Dios?

Ar-aramidem Kadi ti Kayat ti Dios?

“Ibagam laeng no ania ti kayatmo ta maragsakanak a mangaramid iti dayta.” Mabalin a saanmo nga ibaga dayta iti dimo am-ammo wenno iti basta am-ammom laeng. Ngem sidadaanka a mangibaga iti dayta iti ipatpategmo a gayyem. Natural laeng kadagiti nasinged nga aggayyem nga aramidenda ti kiddaw ti tunggal maysa.

Ipakita ti Biblia a kanayon nga aramiden ni Jehova ti ammona a pakaragsakan dagiti agdaydayaw kenkuana. Kas pagarigan, kinuna ni Ari David a nasinged iti Dios: “Adu a banag ti inaramidmo, O Jehova a Diosko, ti mismo a nakaskasdaaw nga ar-aramidmo ken ti pampanunotmo maipaay kadakami; . . . Nagbalinda nga ad-adu ngem iti kabaelak nga ibinsabinsa.” (Salmo 40:5) Saan laeng a dayta, mangar-aramid pay ni Jehova iti pakaragsakan dagidiay saan pay a makaam-ammo kenkuana, nga ipapaayanna ida iti ‘taraon ken pumpunnuenna dagiti pusoda iti ragsak.’—Aramid 14:17.

Maragsakantayo a mangaramid kadagiti bambanag para kadagiti ipatpateg ken raraementayo

Gapu ta maragsakan ni Jehova a mangaramid kadagiti pakaay-aywan ti sabsabali, nainkalintegan laeng a namnamaen a dagidiay mayat nga agbalin a gayyem ti Dios aramidenda met dagiti ‘mangparag-o iti pusona.’ (Proverbio 27:11) Ania ti mabalinmo nga aramiden tapno maparagsakmo ti Dios? Kuna ti Biblia: “Dikay lipatan ti panagaramid iti naimbag ken ti panangiranud iti bambanag iti sabsabali, ta babaen iti kakasta a sakripisio maay-ayo a naan-anay ti Dios.” (Hebreo 13:16) Kayatna kadi a sawen nga umdasen ti panagaramid iti naimbag ken panangiranud iti bambanag iti sabsabali tapno maparagsak ni Jehova?

‘No awan ti pammati, saan a mabalin nga ay-aywen a naan-anay ti Dios,’ kuna ti Biblia. (Hebreo 11:6) Makapainteres ta sa laeng ‘naawagan ni Abraham a gayyem ni Jehova’ kalpasan a “naaddaan iti pammati” kenkuana. (Santiago 2:23) Impaganetget met ni Jesu-Kristo ti kinapateg ti ‘panangwatwat iti pammati iti Dios’ no kayattayo a bendisionannatayo. (Juan 14:1) Kasanoka ngarud a maaddaan iti pammati a birbiroken ti Dios kadagidiay inyasidegna kenkuana? Mabalinmo a rugian iti regular a panagadal iti Sao ti Dios, ti Biblia. Iti kasta, maaddaanka iti “umiso a pannakaammo iti pagayatanna” ken masursurom nga ‘ay-aywen a naan-anay’ ti Dios. Bayat nga umad-adu ti umiso a pannakaammom maipapan ken Jehova ken iyap-aplikarmo dagiti nasursurom a nalinteg a pagalagadanna, bumileg ti pammatim kenkuana ken ad-adda met a suminged kenka.—Colosas 1:9, 10.

Ammuem ti Ad-adu Pay

Ania ti Kayat ti Dios nga Aramidek?

Kasapulam kadi ti naisangsangayan a tanda manipud iti Dios? Ammuem ti sungbat ti Biblia.

Addaan Kadi ti Isuamin iti Padapada a Gundaway a Mangam-ammo iti Dios?

Ammuem no kasano a siguraduen ti Dios a masursuro ti amin a napudno a tattao ti maipapan kenkuana.