Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

TI PAGWANAWANAN DISIEMBRE 2014

 SALUDSOD DAGITI AGBASBASA . . .

Ania ti Agpayso Maipapan iti Krismas?

Ania ti Agpayso Maipapan iti Krismas?

Minilion a tattao iti intero a lubong ti mangselselebrar iti Krismas gapu iti nagduduma a rason. Dadduma ti maragragsakan a makikadua kadagiti gagayyem ken kapamiliada. Adda met dagidiay mangpampanunot iti Dios wenno mangusar iti tiempoda a tumulong kadagiti napanglaw wenno agkasapulan. Talaga a maapresiar met dagita a naimbag nga aramid ngem nainaigda kadagiti negatibo nga aspeto ti Krismas.

Umuna, adu ti mamati a ti Krismas ket selebrasion ti pannakayanak ni Jesus. Ngem sigun iti adu a historiador, awan ti makaammo iti petsa a pannakayanakna. Kuna ti The Christian Book of Why a “dagiti nagkauna a Kristiano saanda a nangpili iti petsa a pannakayanak ni Jesus” gapu ta kayatda ti “sumina iti amin a kaugalian dagiti pagano.” Makapainteres ta awan ti ibaga ti Biblia a nagselebrar ni Jesus iti pannakayanakna wenno iti pannakayanak ti sabsabali. Imbes ketdi, imbilinna kadagiti pasurotna a laglagipenda ti ipapatayna.—Lucas 22:19.

Maikadua, umanamong ti adu nga eskolar a kaaduan a tradision mainaig iti Krismas ket nagtaud kadagiti pagano ken saan a Kristiano. Karaman kadagitoy ti Santa Claus, panagusar iti mistletoe ken Christmas tree, panagsisinnukat iti regalo, panagsindi kadagiti kandela ken panangpuor kadagiti troso (Yule log), panagibitin kadagiti parol wenno balangat a pangdekorasion (wreath), ken panag-caroling. Maipapan iti dadduma kadagitoy a kostumbre, kuna ti libro a The Externals of the Catholic Church: “No mangted wenno umawattayo kadagiti regalo iti Krismas, ken mangibitintayo kadagiti berde a balangat wenno parol kadagiti pagtaengan ken simbaantayo, mano kadatayo ti makaammo a selselebrarantayo gayamen dagiti pagano a kostumbre?”

“No mangted wenno umawattayo kadagiti regalo iti Krismas, ken mangibitintayo kadagiti berde a balangat wenno parol kadagiti pagtaengan ken simbaantayo, mano kadatayo ti makaammo a selselebrarantayo gayamen dagiti pagano a kostumbre?”—The Externals of the Catholic Church

Ngem mabalin a pampanunotem a kasla awan met dakesna ti panangsurot kadagitoy a kostumbre. Usigem daytoy maikatlo a punto. Saan nga anamongan ti Dios a malaokan ti pudno a panagdayaw kadagiti pagano a kostumbre. Babaen ken propeta Amos, kinuna ni Jehova a Dios kadagiti nasukir nga agdaydayaw kenkuana iti nagkauna nga Israel: “Ginurak, linaksidko dagiti piestayo . . . Ikkatem kaniak dagiti bellaak ti kankantam.”—Amos 5:21, 23.

Apay a kasta ti kinainget dagita a sasao? Usigem ti ar-aramiden dagiti tattao iti makin-amianan a pagarian ti nagkauna nga Israel. Ti umuna nga arida a ni Jeroboam ket nangikabil kadagiti nabalitokan nga urbon a baka kadagiti siudad ti Dan ken Bethel ken inallukoyna dagiti umili nga agdayaw kadagitoy imbes a mapanda iti templo idiay Jerusalem tapno siuumiso a dayawenda ni Jehova a Dios. Nangaramid met ti ari kadagiti piesta ken nangdutok kadagiti papadi a tumulong kadagiti umili nga agselebrar kadagita.—1 Ar-ari 12:26-33.

Kasla nainkalintegan met ti inaramid dagiti Israelita. Saan kadi nga inaramidda amin dagitoy tapno dayawen ken paragsakenda ti Dios? Ngem ti nainget a sasao ti Dios babaen ken Amos ken kadagiti dadduma pay a propeta nalawag nga ipamatmatna no ania ti rikna ti Dios maipapan kadagita nga aramid. Babaen ken propeta Malakias, kuna ti Dios: “Siak ni Jehova; saanak a nagbaliw.” (Malakias 3:6) Saan kadi nga ibaga dayta kadatayo no ania ti marikrikna ti Dios kadagiti adu a selebrasion ti Krismas ita?

Kalpasan a nausig ti minilion a tattao ti agpayso maipapan iti Krismas, inkeddengda a saandan a selebraran dayta. Nakariknada iti pudno a pannakapnek ken kinaragsak a makikadua kadagiti gagayyem ken kapamiliada ken tumulong kadagiti napanglaw ken agkasapulan aniaman a kanito iti intero a tawen.

 

Ammuem ti Ad-adu Pay

MASANSAN A MAISALUDSOD

Apay a Saan a Ramrambakan Dagiti Saksi ni Jehova ti Krismas?

Adu ti mangramrambak iti Krismas uray no ammoda ti nagtaudan dayta. Ammuem no apay a saan a ramrambakan dayta dagiti Saksi ni Jehova.

ANIA A TALAGA TI ISURSURO TI BIBLIA?

Panagdayaw nga Anamongan ti Dios

Ammuem ti innem a pagilasinan ti pudno a relihion.