Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN OKTUBRE 2014

 SUHETO ITI AKKUB | PAGARIAN TI DIOS—NO APAY A NAGPATEG KEN JESUS

Pagarian ti Dios—No Apay a Nagpateg ken Jesus

Pagarian ti Dios—No Apay a Nagpateg ken Jesus

Bayat ti ministerio ni Jesus ditoy daga, adu a bambanag ti insurona. Kas pagarigan, insurona dagiti adalanna no kasano ti agkararag, paragsaken ti Dios, ken masarakan ti pudno a kinaragsak. (Mateo 6:5-13; Marcos 12:17; Lucas 11:28) Ngem ti topiko a pagay-ayatna unay nga isarsarita ket ti maipapan iti Pagarian ti Dios.—Lucas 6:45.

Kas nadakamat iti immuna nga artikulo, impamaysa ni Jesus nga ‘inkasaba ken indeklara ti naimbag a damag ti pagarian.’ (Lucas 8:1) Nagnagna iti ginasut a kilometro iti intero a nasion ti Israel tapno isurona kadagiti tattao ti maipapan iti Pagarian ti Dios. Ti ministerio ni Jesus ket nairekord iti uppat nga Ebanghelio a nasurok a 100 a daras a natukoy ti Pagarian. Kaaduan kadagita ket masarakan iti sasao ni Jesus ngem bassit laeng dayta no idilig iti insurona maipapan iti Pagarian ti Dios!—Juan 21:25.

Idi adda ditoy daga ni Jesus, apay a nagpateg kenkuana ti Pagarian? Ammona ngamin nga isu ti pinili ti Dios kas Agturay. (Isaias 9:6; Lucas 22:28-30) Ngem saan a panggep ni Jesus a maitan-ok ken maidaydayaw. (Mateo 11:29; Marcos 10:17, 18) Saanna nga inkaskasaba ti maipapan iti Pagarian para laeng iti pagimbaganna. Kangrunaanna, napateg ken Jesus ti Pagarian ti Dios * gapu iti maipaay dayta para kadagiti ay-ayatenna, iti nailangitan nga Amana ken kadagiti matalek a pasurotna.

TI ARAMIDEN TI PAGARIAN PARA ITI AMA NI JESUS

Ipatpateg unay ni Jesus ti nailangitan nga Amana. (Proverbio 8:30; Juan 14:31) Apresiarenna dagiti nagsasayaat a galad ni Amana kas iti ayat, asi, ken kinahustisia. (Deuteronomio 32:4; Isaias 49:15; 1 Juan 4:8) Kagura la ketdi ni Jesus dagiti maiwarwaras a kinaulbod maipapan iti Amana kas iti ibagbagada a saan a maseknan ti Dios iti panagrigrigat dagiti tattao ken kayat ti Dios nga agrigattayo. Dayta ti maysa a rason no apay a magagaran ni Jesus a mangikasaba “iti naimbag a damag ti pagarian.” Ammo ni Jesus a dayta a Pagarian ti mangisublinto iti nasayaat a reputasion ni Amana. (Mateo 4:23; 6:9, 10) Kasano?

Babaen iti Pagarian, mangaramidto ni Jehova iti dakkel a panagbalbaliw a pakagunggonaan dagiti tattao. “Punasennanto ti amin a lua” iti mata dagiti matalek nga agserserbi kenkuana. Pukawento ni Jehova dagiti pakaigapuan ti panagsangit ken siguraduenna nga “awanton ni patay, awanto metten ti panagleddaang wenno panagsangit wenno ut-ot.” (Apocalipsis 21:3, 4) Usarento ti Dios ti Pagarianna a mangikkat iti amin a rigat a mapaspasaran dagiti tattao. *

Di ngarud pakasdaawan a magagaran ni Jesus a mangipakaammo kadagiti tattao ti maipapan  iti Pagarian! Ammona a dayta ti mangipakita iti pannakabalin ken asi ni Amana. (Santiago 5:11) Ammo met ni Jesus a babaen iti Pagarian, magunggonaan dagiti matalek a tattao nga ipatpategna.

TI ARAMIDEN TI PAGARIAN PARA KADAGITI MATALEK A TATTAO

Sakbay nga immay ditoy daga, nagbiagen ni Jesus idiay langit a kadua ti Amana. Pinarsua ti Ama ti amin a bambanag babaen ti Anakna—manipud iti nakaskasdaaw a langlangit agraman dagiti nakaad-adu a bituen, galaksi agingga iti nagpintas a planetatayo, ken dagiti mula ken animal nga adda iti dayta. (Colosas 1:15, 16) Ngem dagiti tattao ti kangrunaan a ‘pakaay-ayatan ni Jesus.’—Proverbio 8:31.

Makita iti ministerio ni Jesus ti panagayatna kadagiti tattao. Sipud idi damo, imbagana nga immay ditoy daga tapno ‘ideklarana ti naimbag a damag’ kadagiti marigrigat. (Lucas 4:18) Ngem saan laeng nga imbaga ni Jesus a kayatna a tulongan dagiti tattao. Imbes ketdi, namin-adu nga impakitana ti panagayatna kadagiti tattao. Kas pagarigan, idi naguummong ti dakkel a bunggoy tapno dumngeg ken Jesus, “simnek ti asina kadakuada, ket inagasanna dagiti masakitda.” (Mateo 14:14) Idi namati ti lalaki nga addaan nakaro a sakit a kabaelan ni Jesus a paimbagen no kayatna, natignay ni Jesus gapu iti ayatna. Inagasanna ti lalaki ken sidudungngo a kinunana: “Kayatko. Madalusanka koma.” (Lucas 5:12, 13) Idi nakita ni Jesus nga agladladingit ti gayyemna a ni Maria gapu iti ipapatay ti kabsatna a ni Lazaro ‘nagsennaay ti espirituna,’ “nariribukan,” ken ‘nagarubos dagiti luana.’ (Juan 11:32-36) Idin, nangaramid iti nakaskasdaaw a banag, pinagungarna ni Lazaro nupay uppat nga aldawen a natay!—Juan 11:38-44.

Siempre, ammo ni Jesus a temporario laeng ti gin-awa nga impaayna. Ammona nga amin nga inagasanna ket agsakitto manen ken matayto met laeng amin a pinagungarna. Ngem ammo met ni Jesus nga interamente a pukawento ti Pagarian ti Dios dagita a problema. Dayta ti makagapu no apay a saan laeng a nangaramid ni Jesus iti milagro, no di ket sireregta nga inkasabana ti ‘naimbag a damag ti Pagarian.’ (Mateo 9:35) Ipakita dagita nga inaramidna no anianto ti aramiden ti Pagarian ti Dios iti intero a daga. Usigem dagiti kari ti Biblia iti masanguanan.

  •  Awanton ti sakit.

    “Iti dayta a tiempo maluktanto ti matmata dagidiay bulsek, ket maluktanto ti mismo a laplapayag dagidiay tuleng. Iti dayta a tiempo kumalay-atto daydiay pilay a kas iti panagkalay-at ti kalakian nga ugsa, ket ti dila daydiay umel umkisto gapu iti ragsak.” Kasta met, “awanto ti agtataeng nga agkuna: ‘Masakitak.’”—Isaias 33:24; 35:5, 6.

  • Awanton ti ipapatay.

    “Dagiti nalinteg tagikuaendanto ti daga, ket agtaengdanto nga agnanayon iti dayta.”—Salmo 37:29.

    “Alimonennanto ni patay iti agnanayon, ket ti Soberano nga Apo Jehova sigurado a punasennanto ti lulua iti amin a rupa.”—Isaias 25:8.

  • Mapagungarto dagiti natay.

    “Amin dagidiay adda kadagiti pakalaglagipan a tanem mangngegdanto ti timekna ket rummuarda.”—Juan 5:28, 29.

    “Addanto panagungar.”—Aramid 24:15.

  • Addanton balay ken trabaho ti amin.

    “Mangbangondanto iti balbalay ket agnaedda; ket pudno unay nga agmuladanto kadagiti kaubasan ket kanenda ti bungada. Saandanto a mangbangon ket sabali ti agnaed; saandanto nga agmula ket sabali ti mangan. . . . Ti aramid dagiti bukodda nga ima usarento a naan-anay dagidiay pinilik.”—Isaias 65:21, 22.

  •  Awanton ti gubat.

    “Pagsardengenna dagiti gubat agingga iti ungto ti daga.”—Salmo 46:9.

    “Ti nasion saanto a mangitag-ay iti kampilan maibusor iti nasion, saandanto met a sursuruenen ti pannakigubat.”—Isaias 2:4.

  • Awanton ti agbisin.

    ‘Ti daga sigurado nga ipaaynanto ti bungana, ti Dios, a Diostayo, bendisionannatayto.’ —Salmo 67:6.

    “Maaddanto ti naruay a bukbukel iti daga; iti tapaw dagiti bantay addanto ti panaglaplapusanan.”—Salmo 72:16.

  • Awanton ti napanglaw.

    “Saanto a kanayon a malipatan daydiay napanglaw.”—Salmo 9:18.

    “Ispalennanto daydiay napanglaw nga agpatpatulong, kasta met daydiay naparigatan ken siasinoman nga awanan katulongan. Isu maasianto iti daydiay nanumo ken iti daydiay napanglaw, ket dagiti kararua dagidiay napanglaw isalakannanto.”—Salmo 72:12, 13.

No usigem dagitoy a kari maipapan iti Pagarian ti Dios, matarusam kadi no apay a nagpateg ken Jesus ti Pagarian? Idi adda ditoy daga, magagaran a mangisarsarita ti maipapan iti Pagarian iti asinoman a dumngeg ta ammona a kabaelan ti Pagarian a pagpatinggaen amin a problema a makitkitatayo ita.

Kayatmo kadi a sagrapen dagita a kari ti Biblia nga ipaay ti Pagarian? No wen, ammuem ngarud ti ad-adu pay maipapan iti dayta a Pagarian. Ania ti masapul nga aramidem tapno masagrapmo dagiti bendision nga iyegna? Masungbatan dayta iti sumaruno nga artikulo.

^ par. 5 Tukoyen daytoy nga artikulo ti rikna ni Jesus iti agdama gapu ta sibibiag ni Jesus idiay langit. Sipud idi nagsubli idiay langit, sigurado a napateg latta kenkuana ti Pagarian.—Lucas 24:51.

^ par. 8 Tapno maammuam no apay nga ipalpalubos ti Dios nga agrigrigat dagiti tattao, kitaem ti kapitulo 11 ti libro nga Ania a Talaga ti Isursuro ti Biblia? nga impablaak dagiti Saksi ni Jehova.

Ammuem ti Ad-adu Pay

Apay nga Ipalpalubos ti Dios ti Kinadakes ken Panagsagaba?

Kasano a nangrugi ti kinadakes, ken apay nga ipalpalubos dayta ti Dios? Agpatingganto ngata ti panagsagaba?