Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN OKTUBRE 2014

 TI BIBLIA BALBALIWANNA TI BIAG

Bagik Laeng ti Pampanunotek

Bagik Laeng ti Pampanunotek
  • PANNAKAYANAKNA: 1951

  • NAKAYANAKANNA: GERMANY

  • PAKASARITAANNA: NAPANNAKKEL, MANAGIMBUBUKODAN

TI NAPALABASKO:

Agnanaed idi ti pamiliak iti asideg ti Leipzig, East Germany. Asideg laeng dayta iti beddeng ti Czechoslovakia ken Poland. Idi innem ti tawenkon, immakarkami idiay Brazil kalpasanna idiay Ecuador gapu iti trabaho ni Tatang.

Idi agtawenak iti 14, nagadalak iti boarding school idiay Germany. Gapu ta adda dagiti nagannakko idiay South America, siakon ti mangaywan iti bagik. Diak pampanunoten no ania ti ibaga ti dadduma iti ar-aramidek.

Idi agtawenakon iti 17, nagawid dagiti nagannakko iti Germany. Nakipaggianak kadakuada idi damo. Ngem marigatanak nga agpasakup kadakuada gapu ta managimbubukodanak. Pimmanawak idiay balay idi agtawenak iti 18.

Maburiboranak isu a binirokko no ania ti panggep ti biag. Idi napaliiwko ti nagduduma a wagas ti panagbiag ken organisasion, kombinsidoak a ti kasayaatan nga aramidek ket sukisoken ti nagpintas a planeta sakbay a dadaelen dagiti tattao.

Pimmanawak idiay Germany, gimmatangak iti motorsiklo sa napanak idiay Africa. Ngem nagsubliak idiay Europe tapno ipatarimaanko ti motorsiklok. Maysa nga aldaw kalpasanna, addaakon iti igid ti baybay ti Portugal. Idi agangay, insardengko ti nagbiahe iti motorsiklo ket nagbiaheak babaen ti barko.

Nakikaduaak kadagiti agtutubo nga agsagsagana nga aglayag a bumallasiw iti Atlantic Ocean. Sadiay a naam-ammok ti agbalinto nga asawak a ni Laurie. Naglayagkami nga umuna kadagiti isla ti Caribbean. Kalpasanna, nagtalinaedkami iti apagbiit iti Puerto Rico, sakam nagsubli idiay Europe. Mangnamnamakami a makabirok iti sailboat a mabalinmi a pagyanan. Ngem kalpasan ti tallo a bulan a panagsapsapulmi, saan a natuloy ti planomi. Naayabanak nga agsoldado iti Germany.

Nagserbiak iti German navy iti 15 a bulan. Iti daydi a tawen, nagkasarkamin ken Laurie ket implanomi nga ituloy  ti panagpasiarmi. Sakbay ti panagsoldadok, nakagatangkamin iti kaha ti aramidenmi a sailboat. In-inut a naaramidmi dayta bayat ti kaaddak iti militar. Planomi a pagyanan dayta ken pasiaren ti nagpintas a planeta. Kalpasan ti panagsoldadok ken sakbay a nalpasmi ti sailboat, nakasaritami dagiti Saksi ni Jehova ket nagadalkami iti Biblia.

NO KASANO A BINALBALIWAN TI BIBLIA TI BIAGKO:

Idi damo, diak nadnadlaw nga adda masapul a balbaliwak iti biagko. Nagkasarkami ken Laurie ken insardengko metten ti agsigarilio. (Efeso 5:5) Impagarupko a nasayaat met ti panggepmi a mangpasiar iti intero a lubong tapno makitami dagiti nakaskasdaaw a parsua ti Dios.

Ngem masapul gayam a balbaliwak ti personalidadko. Gapu ta napannakkelak unay ken managimbubukodan, naipamaysa ti biagko kadagiti paglaingak. Bagik laeng ti pampanunotek.

Naminsan, nabasak ti nalatak a Sermon ni Jesus iti Bantay. (Mateo, kapitulo 5-7) Idi damo, diak maawatan ti kinuna ni Jesus a kinaragsak. Kas pagarigan, kunana a naragsak dagidiay mabisin ken mawaw. (Mateo 5:6) Pampanunotek no kasano a naragsak dagita a tattao. Bayat ti panagadalko iti Biblia, nabigbigko nga addaantay amin iti naespirituan a kasapulan. Ngem masapul a bigbigentayo nga umuna a kasapulantayo dayta sakbay a mapennektayo. Kas kuna ni Jesus: “Naragsak dagidiay sipapanunot iti naespirituan a kasapulanda.”—Mateo 5:3.

Idi nagadalkami iti Biblia idiay Germany, immakarkami ken Laurie idiay France, sa idiay Italy. Sadinoman ti papananmi adda latta masarakanmi a Saksi ni Jehova. Apresiarek unay ti napudno nga ayatda iti maysa ken maysa ken ti panagkaykaysada. Napaneknekak a talaga nga adda internasional a panagkakabsat dagiti Saksi. (Juan 13:34, 35) Idi agangay, nabautisarankami ken Laurie kas Saksi ni Jehova.

Kalpasan a nabautisaranak, intultuloyko a binalbaliwan ti personalidadko. Inkeddengmi ken Laurie ti aglayag idiay Africa ken bumallasiw iti Atlantic Ocean nga agturong idiay United States. Bayat ti kaaddami iti bassit a sailboat iti tengnga ti naglawa a taaw, nabigbigko nga awan pategko ken nakabasbassitak no maidilig iti natan-ok a Namarsua. Gapu ta awan ti sabali a maaramidko, adu ti tiempok nga agbasa iti Biblia. Nangnangruna a natignayak iti salaysay maipapan iti biag ni Jesus ditoy daga. Perpekto a tao ken nakasirsirib ngem dina intan-ok ti bagina. Saan a ti bagina ti pampanunotenna no di ket ti nailangitan nga Amana.

Nabigbigko a masapul nga iyun-unak ti Pagarian ti Dios

Bayat a pampanunotek ti ulidan ni Jesus, nabigbigko a masapul nga iyun-unak ti Pagarian ti Dios saan ket a dagiti bambanag a kayatko nga aramiden. (Mateo 6:33) Idi nakadanonkami ken Laurie idiay United States, nagdesisionkami nga agyan sadiay ken ipamaysami ti agdayaw iti Dios.

NO KASANO A NAGUNGGONAANAK:

Diak sigurado kadagiti desisionko iti biag. Ngem ita, nabirokakon ti pagtaudan ti pudno a sirib a mangiwanwan kaniak. (Isaias 48:17, 18) Naaddaan met ti panggep ti biagko, ti panagdayaw iti Dios ken panangtulong iti sabsabali a mangammo kenkuana.

Ad-adda a bimmileg ti relasionmi nga agassawa idi inyaplikarmi dagiti prinsipio ti Biblia. Naaddaankami met iti napintas a balasang a makaam-ammo ken mangay-ayat ken Jehova.

Saan a kanayon a naragsak ti biagmi. Ngem babaen ti tulong ni Jehova, dikam pulos sumuko ken itultuloymi ti agtalek Kenkuana.—Proverbio 3:5, 6.

Ammuem ti Ad-adu Pay

Kasano nga Agbalin a Naragsak ti Pamiliam?

Ni Jehova a naragsak a Dios, kayatna a naragsak dagiti pamilia. Ammuem ti praktikal a balakad ti Biblia iti asawa a lalaki, asawa a babai, nagannak, ken annak.