Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN AGOSTO 2014

 SUHETO ITI AKKUB | INTERESADO KADI TI DIOS KENKA?

Maliwliwanaka ti Dios

Maliwliwanaka ti Dios

“Ti Dios, a mangliwliwa kadagidiay naipababa, liniwliwanakami.”—2 CORINTO 7:6.

‘Ti Anak ti Dios, a nangayat kaniak ken nangyawat iti bagina maipaay kaniak.’—GALACIA 2:20

NO APAY NGA AGDUADUA TI DADDUMA: Uray kasapulanda unay ti liwliwa, ipapan ti dadduma nga agimbubukodanda no dawatenda a bumallaet ti Dios ken tulonganna ida kadagiti problemada. Kuna ni Raquel: “No panunotek ti kaadu ti tao ditoy lubong ken dagiti nadagsen a problemada, kasla saan a napateg dagiti pakaseknak isu nga agduaduaak nga agpatulong iti Dios.”

NO ANIA TI ISURSURO TI SAO TI DIOS: Nangaramiden ti Dios iti naisangsangayan a pamay-an tapno tulongan ken liwliwaenna dagiti tattao. Natawidtayo amin ti basol, isu nga awan ti makaragpat kadagiti kalikaguman ti Dios. Ngem ti Dios “inayatnatayo ket imbaonna ti Anakna [ni Jesu-Kristo] a kas pangikappia a sakripisio maipaay kadagiti basoltayo.” (1 Juan 4:10) Babaen ti sakripisio nga ipapatay ni Jesus, pakawanen ti Dios dagiti basoltayo, maaddaantayo iti nadalus a konsiensia, ken ti namnama a biag nga agnanayon iti natalna a baro a lubong. * Ngem para laeng kadi iti intero a sangatauan dayta a sakripisio, wenno personal a maseknan ti Dios kenka?

Alaentay a pagarigan ni apostol Pablo. Natignay unay iti sakripisio ni Jesus, isu nga insuratna: ‘Agbibiagak babaen ti pammati a maiturong iti Anak ti Dios, a nangayat kaniak ken nangyawat iti bagina maipaay kaniak.’ (Galacia 2:20) Wen, natay ni Jesus sakbay pay a nagbalin a Kristiano ni Pablo. Ngem imbilang ni Pablo dayta a sakripisio kas personal a regalo ti Dios kenkuana.

Ti sakripisio nga ipapatay ni Jesus ket regalo met ti Dios kenka. Pammaneknek dayta nga ipatpategnaka ti Dios. Ipaayannaka dayta iti “agnanayon a liwliwa ken naimbag a namnama” ken ‘patibkerennaka iti tunggal naimbag nga aramid ken sao.’—2 Tesalonica 2:16, 17.

Ngem agarup 2,000 a tawenen ti napalabas sipud indaton ni Jesus ti biagna kas sakripisio. Ania ngarud ti ebidensia a kayat ti Dios ti makigayyem kenka ita?

^ par. 5 Tapno maammuam ti ad-adu pay maipapan iti sakripisio ni Jesus, kitaem ti kapitulo 5 ti libro nga Ania a Talaga ti Isursuro ti Biblia? nga impablaak dagiti Saksi ni Jehova.