Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN AGOSTO 2014

 SALUDSOD DAGITI AGBASBASA . . .

Asino ti Nangaramid iti Dios?

Asino ti Nangaramid iti Dios?

Panunotem a kasarsarita ti maysa nga ama ti pito ti tawenna nga anakna. Kunana, “Idi un-unana, pinarsua ti Dios ti daga ken amin nga adda iti dayta; pinarsuana ti init, ti bulan ken dagiti bituen.” Nagpanunot biit ti ubing ket insaludsodna, “Tatang, asino ti nangaramid iti Dios?”

“Awan ti nangaramid iti Dios,” insungbat ti ama. “Datin nga adda Dios.” Napneken ti ubing iti dayta a simple a sungbat. Ngem bayat a dumakdakkel, pampanunotenna latta dayta. Dina maawatan no apay nga awan nangrugian ti Dios. Ngamin, uray ti uniberso adda nangrugianna. Pampanunotenna, ‘Naggapuan ngata ti Dios?’

Ania ti kuna ti Biblia? Ti sungbatna ket kas met laeng iti sungbat ti ama iti ilustrasiontayo. Kinuna ni Moises: “O Jehova, . . . sakbay a nayanak ti mismo a bambantay, wenno impasngaymo ti daga ken ti nabunga a daga a kasla nabuyogan kadagiti panagpasikal, manipud a mismo iti tiempo a di nakedngan agingga iti tiempo a di nakedngan sika ti Dios.” (Salmo 90:1, 2) Kasta met, kinuna ni propeta Isaias: “Saanmo aya a naammuan wenno saanmo aya a nangngeg? Ni Jehova, ti Namarsua kadagiti ungto ti daga, ket Dios agingga iti tiempo a di nakedngan”! (Isaias 40:28) Kasta met, ti surat ni Judas tukoyenna ti Dios nga addan iti napalabas ken agingga iti agnanayon.—Judas 25.

Ipakita dagita a teksto a ti Dios ti “Ari ti kinaagnanayon” kas panangdeskribir kenkuana ni apostol Pablo. (1 Timoteo 1:17) Kayatna a sawen, datin nga adda ti Dios, kasano man kabayag ti tiempo a napalabas, kanayon latta nga adda. (Apocalipsis 1:8) Ti ngarud kinaagnanayon ket maysa kadagiti kapatgan a galad ti Mannakabalin-amin.

Apay a saantayo a matarusan daytoy? Gapu ta nakaab-ababa ti biagtayo no idilig iti kinaagnanayon ni Jehova a Dios, ti sangaribu a tawen iti tao kasla maysa laeng nga aldaw Kenkuana. (2 Pedro 3:8) Kas pagarigan: Ti dudon nga agbiag laeng iti agarup 50 nga aldaw, maawatanna kadi ti panagbiag ti tao a 70 wenno 80 a tawen? Saan! Ngem ibaga ti Biblia a kaslatayo laeng dudon no idilig iti Naindaklan a Namarsua. Uray ti pampanunot ti Dios nangatngatoda no idilig iti pampanunottayo. (Isaias 40:22; 55:8, 9) Saan ngarud a nakaskasdaaw nga adda bambanag maipapan ken Jehova a saan a naan-anay a maawatan dagiti tattao.

Nupay narigat a maawatan ti kinaagnanayon ti Dios, nalawag a nainkalintegan dayta. No adda nangparsua iti Dios, dayta a persona ti Namarsua. Ngem ibaga ti Biblia a ni Jehova ti ‘namarsua ti amin a banag.’ (Apocalipsis 4:11) Kasta met, ammotayo nga awan idi ti uniberso. (Genesis 1:1, 2) Naggapuan ngarud ti uniberso? Masapul nga adda nga umuna ti Namarsua. Addan sakbay pay a napaadda dagiti masirib a parsua, kas iti bugbugtong nga Anakna ken dagiti anghel. (Job 38:4, 7; Colosas 1:15) Nalawag nga isu laeng ti adda idi, awan ti nangparsua kenkuana.

Ti kaaddatayo ken ti kaadda ti intero nga uniberso ti mangpaneknek nga adda agnanayon a Dios. Daydiay nangparsua iti uniberso, ken Daydiay nangipasdek kadagiti linteg a mangkonkontrol iti dayta, masapul nga adda nga agnanayon. Isu laeng ti makaipaay iti biag iti amin a parsua.—Job 33:4.

Ammuem ti Ad-adu Pay

Ania ti Pudno Maipapan iti Dios?

Maseknan kadi ti Dios kenka? Ammuem ti personalidadna ken no kasanoka a makaadani kenkuana.

“Ni Jehova . . . Dakkel iti Pannakabalin”

Pagbutngantayo kadi ti Dios gapu iti pannakabalinna? Ti sungbat ket wen ken saan.