Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN HULIO 2014

 SUHETO ITI AKKUB | APAY A MAPASAMAK TI DAKES KADAGITI NAIMBAG A TATTAO?

No Ania ti Aramiden ti Dios iti Kinadakes

No Ania ti Aramiden ti Dios iti Kinadakes

Nalawag nga ibaga ti Biblia no ania ti aramiden ni Jehova ken ti Anakna a ni Jesu-Kristo maipapan iti rigat a gapuanan ni Satanas a Diablo. Kuna ti Biblia: “Iti daytoy a panggep naiparangarang ti Anak ti Dios [ni Jesus], tapno dadaelenna dagiti aramid ti Diablo.” (1 Juan 3:8) Pukawenna ti agdama a sistema ti bambanag a napno iti kinaagum, gurang-gura, ken kinadakes. Inkari ni Jesus a mapagtalawto ni Satanas a Diablo, ti “agturay iti daytoy a lubong.” (Juan 12:31) No awanen ti impluensia ni Satanas, addanton nalinteg a baro a lubong ken agbalin ti daga a natalna a pagnaedan.—2 Pedro 3:13.

Komusta ngay dagidiay agar-aramid latta iti kinadakes? Panunotem daytoy a kari: “Dagiti napalungdo isuda ti agtaengto iti daga, ket dagiti awan pakababalawanna isuda ti mateddanto iti dayta. No maipapan kadagiti nadangkes, magessatdanto iti mismo a daga; ket no maipapan kadagiti nagulib, maalat-atdanto iti dayta.” (Proverbio 2:21, 22) Awanton ti impluensia dagiti dakes a tattao. Iti kasta a natalna a kasasaad, in-inutton a maikkat ti natawid a kinaimperpekto dagiti natulnog a tattao.—Roma 6:17, 18; 8:21.

Kasano a pukawen ti Dios ti kinadakes iti dayta a baro a lubong? Saan a babaen ti panangikkatna iti wayawaya nga agpili wenno pagbalinenna dagiti tattao a kas iti robot. Imbes ketdi, isurona kadakuada dagiti pagalagadanna ken tulonganna ida a mangilinteg iti pampanunot ken tigtignayda.

Ikkaten ti Dios ti amin a pakarigatan

Anianto ti aramiden ti Dios kadagiti di mapakpakadaan a kalamidad? Inkarina a dandanin iturayan ti Pagarianna ti daga. Ni Jesu-Kristo, ti dinutokan ti Dios nga Ari iti dayta a Pagarian, kabaelanna nga agasan dagiti masakit. (Mateo 14:14) Adda met pannakabalin ni Jesus a mangkontrol iti puersa ti nakaparsuaan. (Marcos 4:35-41) Gapuna, awanton dagiti rigat gapu kadagiti “di mapakpakadaan a pasamak.” (Eclesiastes 9:11) Inton agturay ni Kristo, awanton ti kalamidad a mapasaran dagiti tattao.—Proverbio 1:33.

Komusta met ti minilion a natay nga inosente a tattao? Sakbay a pinagungarna ti gayyemna a ni Lazaro, kuna ni Jesus: “Siak ti panagungar ken ti biag.” (Juan 11:25) Wen, adda pannakabalin ni Jesus a mangpagungar wenno mangbiag manen kadagiti natay.

No kayatyo ti agbiag iti lubong nga awan ti dakes a mapasamak kadagiti naimbag a tattao, adalenyo ti ad-adu pay maipapan iti pudno a Dios ken iti panggepna a masarakan iti Biblia. Maragsakan dagiti Saksi ni Jehova iti lugaryo a tumulong kadakayo a maaddaan iti kasta a pannakaammo. Naimpusuan nga awisendakayo a makisarita wenno agsurat kadagiti nangipablaak iti daytoy a magasin.