Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN HULIO 2014

 TI BIBLIA BALBALIWANNA TI BIAG

Awitko ti Paltogko iti Sadinoman a Papanak

Awitko ti Paltogko iti Sadinoman a Papanak
  • PANNAKAYANAKNA: 1958

  • NAKAYANAKANNA: ITALY

  • PAKASARITAANNA: NARANGGAS A MIEMBRO TI GANG

TI NAPALABASKO:

Naipasngayak iti ruar ti siudad ti Rome ken dimmakkelak iti lugar dagiti napanglaw. Narigat ti biagmi. Diak pulos nakita ni nanangko ken dikam agkatunosan ken tatangko. Nasursurok ti agbiag iti narigat nga aglawlaw.

Nangrugiak nga agtakaw idi agtawenak iti 10. Damo a nagtalawak iti balaymi idi agtawenak iti 12. Namin-adu nga immaynak innala ni Tatang iti presinto. Kanayonak a makiapa, naranggasak ken kagurak ti amin. Idi agtawenak iti 14, diakon nagawid iti balaymi. Nangrugiak nga agdroga ken agnaed iti kalsada. Gapu ta awan ti pagturogak, puersaek a luktan ti maysa a kotse sa maturogak sadiay agingga iti parbangon. Kalpasanna, agbirokak iti gripo a pagdiram-osak.

Nalaingak nga agtakaw—manipud panangagaw iti bag agingga iti panangserrek iti apartment ken balbalay iti rabii. Idi agangay, dakesen ti pakasarsaritaak ken naawisak a makikadua iti maysa a gang. Gapuna, saan laengen a balbalay ti takawak no di ket dagiti pay banko. Gapu ta agresiboak, raraemendak dagiti kakaduak iti gang. Awitko ti paltogko iti sadinoman a papanak. Kinapudnona, pandagak dayta iti punganko no maturogak. Paset ti panagbiagko ti kinaranggas, droga, panagtakaw, panagsao iti dakes, ken immoralidad. Kanayon a birbirokendak dagiti polis. Namin-adu a naarestoak ken adu a tawen a rummuar-umunegak iti pagbaludan.

NO KASANO A BINALBALIWAN TI BIBLIA TI BIAGKO:

Adda gundaway a binisitak ti maysa kadagiti antik idi nakaruarak iti pagbaludan. Diak ammo a nagbalin a Saksi ni Jehova ni Anti ken ti dua a kasinsinko. Inawisdak a tumabuno iti gimong dagiti Saksi. Gapu ta kayatko a maammuan ti maar-aramid sadiay, simmurotak kadakuada. Idi  simmangpetkami iti Kingdom Hall, kinunak nga agtugawak laengen iti asideg ti ruangan tapno masiputak dagidiay sumrek ken rummuar. Siempre, awitko ti paltogko.

Dayta a gimong ti nangbalbaliw iti biagko. Malagipko pay a kasla addaak iti sabali a planeta. Nakaisem, nainggayyeman, ken nabara ti panangkablaawda kaniak. Nalawag pay laeng iti panunotko ti nasayaat ken napudno a pannakilangen dagiti Saksi. Naiduma unay daytoy iti lubong a nakairuamak!

Nakipagadalak iti Biblia kadagiti Saksi. Bayat nga umad-adu ti naammuak, ad-adda a natarusak a masapul a balbaliwak ti estilo ti panagbiagko. Impapusok ti kuna ti Proverbio 13:20: “Daydiay makipagna kadagiti masirib a tattao agbalinto a masirib, ngem daydiay addaan kadagiti pannakilangen kadagidiay maag nakadakdakesto ti pagtungpalanna.” Naamirisko a masapul nga umikkatak iti gang. Narigat nga aramiden dayta, ngem nagballigiak gapu iti tulong ni Jehova.

Iti umuna a gundaway, makapagteppelakon

Inkagumaak met ti agbalin a nadalus iti pisikal, isu nga insardengko ti agsigarilio ken agdroga. Pinapukisak ti atiddog a buokko, inikkatko ti aritosko, ken saanakon nga agsao iti dakes. Iti umuna a gundaway, makapagteppelakon.

Awan ti interesko nga agbasa ken agadal, isu a marigatanak nga agadal iti Biblia. Nupay kasta, gapu iti panagreggetko, in-inut nga inayatko ni Jehova ngem mangrugin a buriborennak ti konsiensiak. Masansan a negatibo ti panangmatmatko iti bagik, diak ammo no mapakawannak pay ni Jehova gapu kadagiti dakes nga inaramidko. Naliwliwaak idi nabasak ti panangpakawan ni Jehova ken Ari David idi nakaaramid kadagiti nadagsen a basol.—2 Samuel 11:1–12:13.

Marigatanak met a mangiranud iti pammatik iti sabsabali iti trabaho a panangasaba. (Mateo 28:19, 20) Mabutengak amangan no adda makasaritak a nadangrak wenno nakabasolak, ngem in-inut a napukaw dayta. Maragragsakanak a tumulong iti sabsabali a mangammo iti nakaim-imbag a nailangitan nga Amatayo a sisasagana a mamakawan.

NO KASANO A NAGUNGGONAANAK:

Naispal ti biagko gapu ta naam-ammok ni Jehova. Natayen wenno naibalud ti adu kadagiti dati a kakaduak. Ngem naragsak ti biagko ken segseggaak ti nasayaat a masanguanan. Nasursurok ti agbalin a natulnog, napakumbaba, ken agteppel. Kas resultana, nasayaat ti relasionko iti sabsabali. Naragsakak itan iti denna ti napintas nga asawak a ni Carmen. Maragragsakankami a tumultulong iti sabsabali nga agadal iti Biblia.

Nasayaaten ti trabahok ita. No dadduma, mainaig latta kadagiti banko, ngem diakon takawan, no di ket mapanko dalusan!

Ammuem ti Ad-adu Pay

Ania ti Panagadal iti Biblia?

Ammuem ti sungbat dagiti saludsod maipapan iti programa a libre a panagadal iti Biblia.