Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan  |  Hulio 2014

Makitam Kadi ti Di Makita a Dios?

Makitam Kadi ti Di Makita a Dios?

“TI DIOS maysa nga Espiritu,” isu a ditay makita. (Juan 4:24) Ngem ibaga ti Biblia nga adda dagiti kasla nakakita iti Dios. (Hebreo 11:27) Pudno kadi a nakitada? Talaga kadi a makitam ti “di makita a Dios”?—Colosas 1:15.

Idiligtayo ti kasasaadtayo iti tao a nayanak a bulsek. Awan kadin ti matarusanna iti aglawlawna gapu ta bulsek? Adda. Magun-odanna dagiti impormasion iti nadumaduma a pamay-an a makatulong kenkuana a mangtarus kadagiti tattao, banag, ken pasamak iti aglawlawna. Kuna ti maysa a bulsek: “Ti panagkita ket saan laeng a babaen iti mata, no di ket babaen iti isip.”

Kasta met, nupay saanmo a makita ti Dios kadagiti pisikal a matam, makitam ti Dios babaen iti ‘mata ti pusom.’ (Efeso 1:18) Usigem ti tallo a pamay-an tapno maaramidmo dayta.

“SILALAWAG A MAKITA MANIPUD PANNAKAPARSUA TI LUBONG”

Masansan a napigpigsa ti panagdengngeg ken panagrikna ti bulsek ket usarenna dagita tapno matarusanna ti bambanag a dina makita. Kasta met, mabalinmo nga usaren amin a sentidom tapno maammuam dagiti bambanag iti aglawlawmo ken matarusam ti di makita a Dios a nangaramid kadagita. “Dagiti di makita a kualidadna ket silalawag a makita manipud pannakaparsua ti lubong ken agpatpatuloy, agsipud ta matarusan ida babaen iti bambanag a naaramid.”—Roma 1:20.

Kas pagarigan, usigem ti daga a pagnanaedantayo. Naisangsangayan ti pannakaaramidna para kadatayo, saan laeng a tapno adda pagbiagtayo no di ket tapno agbiagtayo a naragsak. Maragsakantayo no mariknatayo ti bara ti init, pul-oy ti angin, maramanantayo ti natubbog a prutas, wenno mangngegtayo ti makapabang-ar a kanta dagiti tumatayab. Saan kadi a dagitoy a sagut paneknekanda a maseknan, nadungngo, ken naparabur ti Namarsua kadatayo?

Ania ti masursurom maipapan iti Dios kadagiti makitam iti uniberso? Ti langlangit ipalgakna ti pannakabalin ti Dios. Ipakita ti nabiit pay nga ebidensia ti siensia a saan laeng a lumawlawa ti uniberso no di ket nakaparpartak pay ti ilalawana. No tumangadka iti langit iti rabii, panunotem: Asino ti nagtaudan daytoy nga enerhia a pakaigapuan ti napartak nga ilalawa ti uniberso? Ibaga kadatayo ti Biblia a ti Namarsua ket addaan iti ‘naruay a dinamiko nga enerhia.’ (Isaias 40:26) Dagiti parsua ti Dios ipakitada kadatayo nga Isu ti “Mannakabalin-amin” ken Daydiay “natan-ok iti pannakabalin.”—Job 37:23.

“TI NANGILAWLAWAG KENKUANA”

Kuna ti ina ti dua nga ubbing nga adda depekto ti panagkitada: “Panagsao ti maysa kadagiti kapatgan nga aspeto ti panagsursuroda. Ibagam kadakuada amin a makitam ken mangngegmo, [ken] nakasaganaka a kanayon a mangilawlawag. Sika ti pannaka-matada.” Kasta met, nupay “awan ti tao a nakakita iti Dios uray kaano,” ni Jesus nga Anak ti Dios nga adda iti abay ti “Ama isu ti nangilawlawag kenkuana.” (Juan 1:18) Kas immuna a pinarsua ti Dios ken bugbugtong nga Anak, ni Jesus ti nagbalin a “pannaka-matatayo” idiay langit. Ni Jesus ti kasayaatan a pagtaudan ti impormasion maipapan iti di makita a Dios.

Paliiwem ti sumagmamano a bambanag nga inlawlawag ni Jesus maipapan iti Dios bayat ti di mabilang a panawen a pannakikaduana iti Amana:

  • Nagaget nga agtrabaho ti Dios. “Ni Amak agtultuloy nga agar-aramid [wenno agtrabtrabaho] agingga ita.”—Juan 5:17.

  •  Ammo ti Dios dagiti kasapulantayo. “Ti Dios nga Amayo ammona no ania ti bambanag a kasapulanyo sakbay pay a dawatenyo kenkuana.”—Mateo 6:8.

  • Siaayat nga ipapaay ti Dios dagiti kasapulantayo. “Ni Amayo nga adda iti langlangit . . . pagleggakenna ti initna kadagiti nadangkes a tattao ken kadagiti naimbag ket pagtuduenna kadagiti nalinteg a tattao ken kadagiti nakillo.”—Mateo 5:45.

  • Ipatpategnatayo ti Dios kas indibidual. “Saan aya a ti dua a billit-tuleng mailako iti sinsilio a bassit ti pategna? Kaskasdi awan maysa kadakuada ti matnag iti daga a saan nga ammo ni Amayo. Ngem dagiti mismo a buok ti uloyo nabilangda amin. Gapuna dikay agbuteng: napatpategkayo ngem iti adu a billit-tuleng.”—Mateo 10:29-31.

TI TAO A NANGYANNINAW ITI DI MAKITA A DIOS

Masansan a naiduma ti panangtarus dagiti bulsek kadagiti kapanunotan no idilig kadagiti makakita. Ti anniniwan ket mabalin nga ibilang dagiti bulsek kas nalamiis ken nalinong, saan a kas nasipnget a lugar. No kasano a ti tao a nayanak a bulsek dina makita ti anniniwan wenno lawag, ditay met matarusan ni Jehova a bukodtayo. Gapuna, impaay ni Jehova ti maysa a tao a naan-anay a mangipakita kadagiti galadna ken personalidadna.

Ni Jesus dayta a tao. (Filipos 2:7) Saan laeng nga impakaammo ni Jesus ti maipapan iti Amana no di ket impakitana pay kadatayo dagiti personalidad ti Dios. Kinuna ni Felipe nga apostol ni Jesus: “Apo, ipakitam kadakami ti Ama.” Insungbat ni Jesus: “Ti nakakita kaniak nakitana met ti Ama.” (Juan 14:8, 9) Ania ti “makitam” maipapan iti Ama babaen kadagiti inaramid ni Jesus?

Nadungngo, napakumbaba, ken nalaka nga asitgan ni Jesus. (Mateo 11:28-30) Immasideg dagiti tattao kenkuana gapu ta makapabang-ar ti personalidadna. Narikna ni Jesus ti saem a marikrikna dagiti tattao ken nakipagrag-o kadakuada. (Lucas 10:17, 21; Juan 11:32-35) Bayat a basbasaem wenno dengdenggem dagiti salaysay ti Biblia maipapan ken Jesus, usarem dagiti sentidom ken biagem dagiti pasamak iti panunotmo. No mennamennaem ti wagas a pannakilangen ni Jesus kadagiti tattao, nalawag a makitam ti nagsasayaat a personalidad ti Dios, iti kasta sumingedka Kenkuana.

PAGTITIPONEM DAGITI IMPORMASION

Kuna ti maysa nga autor maipapan iti kasasaad ti tao a bulsek: “Makaala iti sumagmamano laeng nga impormasion, manipud iti nadumaduma a pamay-an (panagrikna, panagangot, panangdengngeg, ken dadduma pay), sana pagtitiponen dagita.” Kasta met, no paliiwem dagiti parsua ti Dios, basaem ti kinuna ni Jesus maipapan iti Amana, ken analisarem ti wagas a panangyanninaw ni Jesus kadagiti galad ti Dios, makitam ti nagpintas a ladawan maipapan ken Jehova. Agbalin ti Dios a pudpudno kenka.

Napasaran dayta ni Job a nagbiag idi un-unana. Idi damo, nagsao a ‘dina maawatan.’ (Job 42:3) Ngem kalpasan nga inusigna a naimbag dagiti nakaskasdaaw a pinarsua ti Dios, natignay ni Job a mangibaga: “Iti alimadamad nangngegko ti maipapan kenka, ngem ita ti bukodko a mata makitanaka.”—Job 42:5.

‘No birokem ni Jehova, ipalubosnanto nga isu masarakam’

Mabalin a pumudno met dayta kenka. “No birokem [ni Jehova], ipalubosnanto nga isu masarakam.” (1 Cronicas 28:9) Maragsakan dagiti Saksi ni Jehova a tumulong kenka a mangbirok iti di makita a Dios.