Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN HUNIO 2014

Ania ti Namnama Dagiti Inapok?

Ania ti Namnama Dagiti Inapok?

NAMINSAN, adda makaawis a paulo a nagparang iti The Chosun Ilbo a diario ti Korea. Insaludsodna: “‘Ni Mararaem a Shim Cheong,’ Awan Ammona Maipapan ken Jesus—Napan Kadi Idiay Impierno?”

Makaawis ti paulona ta iti estoria dagiti Koreano ni Shim Cheong ket maipatpateg unay a balasang a nangisakripisio iti biagna tapno matulonganna ti bulsek nga amana. Naidaydayaw ni Shim Cheong iti adu a tawen. Kinapudnona, idiay Korea ni “Shim Cheong” ket naibilang kas ulidan ti managsakripisio nga anak.

Para iti adu, saan a nainkalintegan ken makaparurod pay ketdi ti kapanunotan a madusa idiay impierno ti kas kenkuana gapu ta saan a nabautisaran kas Kristiano. Ngamin, nabayagen a napasamak ti pakasaritaanna sakbay a nakadanon iti lugarna ti mensahe maipapan ken Kristo.

Nairaman iti artikulo ti interbiu iti maysa a klero. Napagsaludsodan no mapan idiay impierno dagiti natay a saan a nakaammo maipapan ken Jesus. Ti sungbatna? “Ditay ammo. Ti Dios laeng ti makaammo [kadagita a tattao].”

MAKALIKAGUMAN PARA ITI PANNAKAISALAKAN

Kuna ti The New Catholic Encyclopedia: “Kasapulan ti bautismo tapno maisalakan. Kas kinuna a mismo ni Kristo, malaksid a mayanak iti danum ken Nasantuan nga Espiritu, saan a makastrek ti maysa iti Pagarian ti Dios (Jn 3.5).” Gapu itoy, patien ti dadduma a dagiti natay a di nabautisaran ket maitapuak iti impierno wenno matutuok kalpasan ti ipapatay.

Ngem adu met ti mangibilang a minamaag ti kasta a pammati. Minilion a tattao ti awan ammoda iti Biblia. Maikarida kadi a matutuok iti agnanayon? Ania ti kuna ti Biblia?

TI NAMNAMA A NAIKARI ITI BIBLIA

Nalawag nga ipakita ti Biblia a napateg iti Dios dagiti tattao nga awan pannakaammoda maipapan iti kalikagumna. Ipasigurado kadatayo ti Aramid 17:30: “Ti Dios pinalabasna dagiti tiempo ti kasta a kinaignorante.” Ania ngarud ti ipaay ti Biblia a namnama kadagiti natay nga awan gundawayda a makasursuro iti maipapan iti Dios?

Ania ti kaipapanan ti kari ni Jesus: “Makikaduakanto kaniak idiay Paraiso”?

Ti sungbat ket masarakan iti kinuna ni Jesus iti nailansa a kriminal a natay iti abayna. Kuna ti lalaki ken Jesus: “Laglagipennak inton makagtengka iti pagariam.” Ania ti insungbat ni Jesus? “Pudno ibagak kenka ita nga aldaw, Makikaduakanto kaniak idiay Paraiso.”—Lucas 23:39-43.

Ikarkari kadi ni Jesus a kaduananto ti lalaki idiay langit? Saan. Ti lalaki ket saan a “nayanak manen” iti danum ken espiritu, a kasapulan tapno makastrek iti Pagarian ti langlangit. (Juan 3:3-6) Imbes ketdi, inkari ni Jesus nga agbiagto manen ti kriminal “idiay Paraiso.” Kas maysa a Judio, ammo la ketdi ti lalaki ti Paraiso a daga, ti hardin ti Eden, a nailadawan iti umuna a libro ti Biblia. (Genesis 2:8) Ti kari ni Jesus ket nangted iti sigurado a namnama a panagungar inton maisubli manen ti Paraiso ditoy daga.

Kinapudnona, ikari ti Biblia nga “addanto panagungar agpadpada dagiti nalinteg ken dagiti nakillo.” (Aramid 24:15) “Dagiti nakillo” ket dagidiay saan a nangannurot kadagiti nalinteg a pagalagadan ti Dios gapu ta dida naammuan ti pagayatanna. Pagungaren ni Jesus ti nakillo a kriminal a nakisarita kenkuana, kasta met dagiti minilion wenno nalabit binilion pay ketdi a saan a nakaammo kadagiti pagalagadan ti Dios. Idiay Paraiso a daga, maisuronto kadakuada dagiti kalikaguman ti Dios ken addanto gundaway a mangipakita iti ayatda iti Dios babaen ti panangtungpalda kadagiti bilinna.

INTON MAPAGUNGAR DAGITI NAKILLO

Inton mapagungar dagiti nakillo maukomdanto kadi maibatay iti napalabas nga inaramidda? Saan.  Kuna ti Roma 6:7: “Ti natayen naluk-atanen iti basolna.” No natayen dagiti nakillo, nabayadandan ti basolda. Gapuna, maukomda maibatay iti inaramidda kalpasan ti panagungarda, saan a maibatay kadagiti inaramidda sakbay a natayda. Kasanoda a magunggonaan?

Kalpasan ti panagungar, addanto gundaway dagiti nakillo a makasursuro iti linteg ti Dios, a maipakaammonto inton maluktan dagiti simboliko a lukot. Maukomdanto “sigun kadagiti aramidda,” kayatna a sawen, no nagtulnogda iti linteg ti Dios wenno saan. (Apocalipsis 20:12, 13) Para iti adu a nakillo saan a maikadua a gundaway, no di ket ti damo a gundawayda a manggun-od iti agnanayon a biag ditoy daga babaen ti panangammo ken panangaramidda iti pagayatan ti Dios.

Adu ti naaddaan manen iti pammati iti Dios gapu iti daytoy a pannursuro ti Biblia. Maysa kadakuada ni Yeong Sug a dimmakkel kas napeklan a Katoliko. Padi ti dadduma a miembro ti pamiliana. Kayatna ti agbalin a madre isu a simrek iti kombento. Idi agangay, pimmanaw gapu ta naupay kadagiti nakitana a mapaspasamak sadiay. Maysa pay, dina patien ti doktrina nga impierno gapu ta ibilangna a naranggas ken naulpit ti panangtutuok kadagiti tattao iti umap-apuy nga impierno.

Idi agangay, impakita ti maysa a Saksi ni Jehova ken Yeong Sug dagitoy a sasao iti Biblia: “Dagiti sibibiag sipapanunotda a mataydanto; ngem no maipapan kadagiti natay, saanda a pulos sipapanunot iti aniaman, awananda metten a pulos kadagiti tangdan.” (Eclesiastes 9:5) Inlawlawag ti Saksi a saan a matutuok iti impierno dagiti inapona. Imbes ketdi, nataydan nga arigna matmaturogda ket ur-urayenda ti panagungar.

Gapu ta ammo ni Yeong Sug nga adu pay ti saan a nakangngeg iti kinapudno manipud iti Biblia, impapusona ti sasao ni Jesus a masarakan iti Mateo 24:14: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.” Makiramraman itan a mangikasaba iti naimbag a damag ken mangiranud iti nagsayaat a namnama a naibasar iti Biblia.

“TI DIOS SAAN A MANGIDUMDUMA”

Ibaga kadatayo ti Biblia: “Ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.” (Aramid 10:34, 35) Daytoy ti naan-anay a kinahustisia a namnamaentayo manipud iti Dios a mangay-ayat iti “kinalinteg ken kinahustisia”—Salmo 33:5.