Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN HUNIO 2014

 SUHETO ITI AKKUB | TI KUNA TI DIOS MAIPAPAN ITI PANAGSIGARILIO

Sangalubongan nga Epidemia

Sangalubongan nga Epidemia

Ti sigarilio ket naulpit a mammapatay.

  • Agarup 100,000,000 ti napapataynan iti napalabas a siglo.

  • Agarup 6,000,000 ti mapapatayna iti kada tawen.

  • Maysa a tao ti mapapatayna iti kada innem a segundo.

Ken agtultuloy dayta.

Pattapattaen dagiti autoridad a no agtultuloy dayta, inton 2030, ngumato iti nasurok a 8,000,000 ti matay kada tawen. Ibagada nga agdagupton iti 1,000,000,000 ti matay iti panagsigarilio inton agpatingga ti maika-21 a siglo.

Saan laeng a dagiti agsigsigarilio ti biktima. Karaman dagiti miembro ti pamilia nga agladladingit ken maawanan iti mangsuportar, agraman ti 600,000 a matay kada tawen a saan nga agsigsigarilio a makalang-ab iti asuk ti sigarilio. Adu ti marigatan gapu iti dumakdakkel a gastos ti panagpaagas.

Saan a kas iti nakaro a sakit nga ikagkagumaan dagiti doktor a takuaten ti agasna, ammodan ti agas daytoy nga epidemia. Kuna ni Dr. Margaret Chan, director-general ti World Health Organization: “Ti epidemia ti tabako ket gapuanan ti tao ken maisardeng dayta no agtinnulong ti gobierno ken dagiti tattao.”

Nakaskasdaaw ti panagtignay dagiti tattao iti intero a lubong a mangisardeng iti daytoy a problema iti salun-at. Idi Agosto 2012, agarup 175 a nasion ti immanamong a mangisardeng iti panagsigarilio. * Ngem adda nabileg a puersa a manglaplapped iti pannakaisardengna. Kada tawen, busbosen dagiti industria iti tabako ti binilion a doliar kadagiti adbertismen tapno makaatrakar dagiti kabbaro a kostumer, nangruna dagiti babbai ken agtutubo iti rumangrang-ay a nasion. Gapu ta makaadikto ti tabako, sigurado nga umadu pay ti matay iti sangabilion a naadikton iti sigarilio. No itultuloyda ti agsigarilio, ngumato ti bilang ti matay iti sumaruno nga uppat a dekada.

Adu ti mayat a mangisardeng iti panagsigarilio ngem maguyugoyda gapu kadagiti adbertismen ken pannakaadikto. Kasta ti kapadasan ni Naoko. Agtutubo pay idi nangrugi nga agsigarilio. Mariknana a sosial no tuladenna ti mabuybuyana iti pelikula wenno telebision. Nupay nakitana dagiti nagannakna a natay iti kanser iti bara, intultuloyna latta ti agsigarilio bayat ti panangpadakkelna iti dua a babbalasangna. Inaminna: “Ammok a mabalin nga agsakitakto iti kanser iti bara ken madanaganak iti salun-at dagiti annakko, ngem diak latta maisardeng. Kunak no awanen ti namnamak.”

Ngem naisardeng ti Naoko dayta a bisio gapu ta natignay a kas iti minilion a tattao a mangisardeng iti panagsigarilio. Ania ti nakatulong kadakuada? Basaem ti sumaruno nga artikulo.

^ par. 11 Karaman kadagiti pamay-anda ket ipakaammoda dagiti peggad ti panagsigarilio, iparitda ti panangpataud ken panaglako iti tabako, ingatoda ti buis ti tabako, ken angayenda dagiti programa tapno matulongan dagiti tattao nga agsardeng nga agsigarilio.