Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN MAYO 2014

 PANNAKISARITA ITI MAYSA A KAARRUBA

Mamati Kadi ken Jesus Dagiti Saksi ni Jehova?

Mamati Kadi ken Jesus Dagiti Saksi ni Jehova?

Naisalaysay iti baba ti gagangay a pannakisarita ti maysa a Saksi ni Jehova iti kaarrubana. Ipapantayo a simmarungkar ti Saksi nga agnagan Anthony iti pagtaengan ti maysa a lalaki nga agnagan Tim.

NAPATEG TI PAMMATI KEN JESUS

Anthony: Komusta Tim?

Tim: Nasayaat met.

Anthony: Adda intugotko a kabaruan a ruar ti Pagwanawanan ken Agriingkayo! Sigurado a magustuam dagitoy.

Tim: Pagyamanan. Kinapudnona, maragsakanak nga immayka ta adda kayatko a saludsoden.

Anthony: Sige, ania dayta?

Tim: Idi kalman, nagsaritakami iti katrabahuak. Nadakamatko ti maipapan iti nagpintas a tract nga intedmo kaniak. Ngem kunana a diak basbasaen dagita ta saan kano a mamati ken Jesus dagiti Saksi ni Jehova. Pudno kadi dayta? Kinunak nga isaludsodkonto kenka inton agsublika.

Anthony: Nasayaat ta insaludsodmo dayta kaniak. Ngamin, awanen ti nasaysayaat a pakaammuam iti patpatienmi no di dakami a Saksi.

Tim: Isu ngarud ti kunak.

Anthony: Kinaagpaysuanna, talaga a mamatikami ken Jesus. Ammomi a napateg ti panamati kenkuana tapno maisalakan.

Tim: Ammok a mamatikayo, ngem nagpanunotak idi imbagana a dikay mamati ken Jesus. Panagkunak, dita pay nagsaritaan dayta.

Anthony: Nasayaat no basaenta ti sumagmamano a teksto ti Biblia a mangipakita a napateg ti maaddaan iti pammati ken Jesus. Dagitoy ti masansan nga usaren dagiti Saksi ni Jehova iti panangasabada.

Tim: Sige.

Anthony: Basaenta nga umuna ti kinuna ni Jesus iti Juan 14:6. Imbagana daytoy idi nakisarita iti maysa nga apostolna. “Kinuna kenkuana ni Jesus: ‘Siak ti dalan ken ti kinapudno ken ti biag. Awan ti umay iti Ama malaksid no baeten kaniak.’” Sigun iti binasata, ania ti kakaisuna a pamay-an tapno makaadanitayo iti Ama?

Tim: Babaen ken Jesus.

Anthony: Hustoka. Ken mamati dagiti Saksi ni Jehova iti dayta. Maisaludsodko man: Sigun iti naammuam a kalikaguman ti Dios, no agkararag ti maysa a tao, asino ti pangidalananna iti kararagna?

Tim: Ni Jesus.

Anthony: Umisoka. Isu nga amin a kararagko ket ipadalanko iti nagan ni Jesus. Kasta met laeng ti kararag ti amin a Saksi ni Jehova.

Tim: Kasta gayam.

Anthony: Ti sabali pay a teksto nga usigenta ket ti Juan 3:16. Nagpateg daytoy a teksto ta naawagan iti ababa nga Ebanghelio. No adda maysa a teksto a mangiladawan iti biag ken ministerio ni Jesus ditoy daga dayta ti Juan 3:16. Nasayaat siguro no basaenta.

Tim: Sige. Kunana: “Ta ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a  mangwatwat iti pammati kenkuana saan koma a madadael no di ket maaddaan iti agnanayon a biag.”

Anthony: Pagyamanan. Pamiliar kadi kenka daytoy a teksto?

Tim: Wen, kanayonko a mangngeg ken mabasa kadagiti karatula.

Anthony: Pamiliar dayta a teksto. No usigem a naimbag dayta, kinuna ni Jesus a gapu iti ayat ti Dios, posible a maaddaan dagiti tattao iti biag nga agnanayon. Ngem ania ti kasapulan nga aramidentayo?

Tim: Maaddaan iti pammati.

Anthony: Wen. Maaddaan pammati iti bugbugtong nga Anak, ni Jesu-Kristo. No kasta, ti pammati ken Jesus luktanna ti dalan nga agturong iti biag nga agnanayon. Mabasa dayta a mismo iti panid 2 ti magasin nga intedko kenka. Maipapan iti panggep Ti Pagwanawanan, daytoy a magasin “parparegtaenna dagiti tattao a maaddaan iti pammati ken Jesu-Kristo, a natay idi tapno magun-odantayo ti biag nga agnanayon, ken agturturay itan kas Ari iti Pagarian ti Dios.”

Tim: Paneknekan gayam a mismo ti magasinyo a mamati dagiti Saksi ni Jehova ken Jesus.

Anthony: Husto.

Tim: Ngem apay ngarud nga ibagbagada a saankayo a mamati ken Jesus?

Anthony: Adda sumagmamano a rason. Ibagbagada dayta gapu ta nangngegda iti sabsabali. Wenno mabalin a dayta ti insuro ti ministroda.

Tim: Mabalin met siguro nga ibagbaga ti dadduma a dikay mamati ken Jesus gapu ta Saksi ni Jehova ti awag kadakayo, saan a Saksi ni Jesus.

Anthony: Mabalin a maysa pay dayta a rason.

Tim: Apay ngamin a ni Jehova ti kanayon nga ikaskasabayo?

‘IMPAKAAMMOK TI NAGANMO’

Anthony: Patienmi a napateg nga usaren ti nagan ti Dios a Jehova, kas iti inaramid ti Anakna a ni Jesus. Usigem ti inkararag ni Jesus iti Amana iti Juan 17:26. Mabalin kadi a pakibasam?

Tim: Sige. “Impakaammok kadakuada ti naganmo ket ipakaammokto dayta, tapno ti ayat a pinangayatmo kaniak maadda koma kadakuada ken siak a maikaykaysa kadakuada.”

Anthony: Pagyamanan. Paliiwem ta kinuna ni Jesus nga impakaammona ti nagan ti Dios. Apay ngata nga inaramidna dayta?

Tim: Hmm. Diak ammo.

Ti panamati ken Jesus ket napateg tapno maisalakantayo

Anthony: Nasayaat siguro no basaenta ti sabali pay a teksto a mangilawlawag iti dayta, ti Aramid 2:21. Kunana: “Tunggal maysa nga umawag iti nagan ni Jehova maisalakanto.” Ammok nga umanamongka a no ti panangawag iti nagan ni Jehova ket makalikaguman tapno maisalakan ti maysa, sigurado nga ammo dayta ni Jesus.

Tim: Siempre, ammona.

Anthony: Pannakaisalakan ngarud dagiti pasurotna ti maysa a makagapu no apay a napateg ken Jesus nga ammoda ti nagan ti Dios ken usarenda dayta. Dayta met ti maysa kadagiti kangrunaan a rason nga isarsaritami ti maipapan ken Jehova. Para kadakami napateg nga ipakaammomi iti sabsabali ti nagan ti Dios tapno matulonganda nga umawag iti dayta.

Tim: Ngem uray saan nga ammo wenno saan nga usaren dagiti tattao ti nagan ti Dios, ammoda latta ti ibagbagada no tuktukoyenda ti Dios.

Anthony: Pudno dayta. Ngem babaen ti panangipakaammo ti Dios iti naganna, nalaklaka para kadatayo ti suminged kenkuana.

Tim: Ania ti kayatmo a sawen?

Anthony: Panunotem daytoy: Ditay masapul nga ammuen ti nagan ni Moises. Mabalin nga ibagatay la koma a daydiay lalaki a nangbisngay  iti Nalabaga a Baybay wenno ti lalaki nga immawat iti Sangapulo a Bilin. Kasta met ken Noe, ngem apay a masapul pay nga ammotayo ti naganna? Mabalin nga ibagatay la koman a ti lalaki a nangaramid iti daong ken insalakanna ti pamiliana ken dagiti animal. Uray koma ni Jesu-Kristo, saan kadi a mabalin nga ibagatay la koman a daydiay naggapu idiay langit ken natay maigapu kadagiti basoltayo?

Tim: Wen nga agpayso.

Anthony: Ngem sinigurado ti Dios a maammuantayo ti nagan dagita nga indibidual. No ammotayo ti naganda, agbalin a napaypayso dagita a salaysay kadatayo. Uray no ditay naam-ammo ni Moises, Noe, ken Jesus, napaypayso dagitoy kadatayo ta ammotayo ti naganda.

Tim: Diak pulos napanunot dayta, ngem hustoka!

Anthony: Dayta ti sabali pay a rason a kanayon nga usaren dagiti Saksi ni Jehova ti nagan ti Dios. Kayatmi a tulongan dagiti tattao a maaddaan iti pammati ken Jehova a Dios kas pudpudno a Persona a mabalin a pakigayyeman. Kasta met, ipagpaganetgetmi ti akem ni Jesus iti pannakaisalakantayo. Nasayaat siguro no basaenta ti maysa pay a teksto.

Tim: Sige.

Anthony: Nabasata itay iti Juan 14:6 a kinuna ni Jesus nga isu “ti dalan ken ti kinapudno ken ti biag.” Sublianta ti sumagmamano a bersikulo ken paliiwem ti sasaona iti Juan 14:1. Pakibasam man ti kinuna ni Jesus iti maudi a paset ti bersikulo?

Tim: OK. Kunana: “Watwatenyo ti pammati iti Dios, watwatenyo met ti pammati kaniak.”

Anthony: Pagyamanan. Kayat kadi a sawen dayta a pilientayo laeng ti patientayo no ni Jesus wenno ni Jehova?

Tim: Saan. Kuna ni Jesus a kasapulantay ida a dua.

Anthony: Hustoka. Ken ammok nga umanamongka a saan nga umdas nga ibagatayo a mamatitayo ken Jesus ken iti Dios. Masapul nga agbiagtayo a maitunos iti ibagbagatayo.

Tim: Siempre.

Anthony: Ngem kasano a maipakita ti maysa a pudno nga addaan pammati ken Jesus ken iti Dios? Nasayaat siguro a pagsaritaanta dayta inton sumaruno. *

Tim: Sige.

Adda kadi kayatmo a maammuan a topiko iti Biblia? Adda kadi saludsodmo maipapan iti patpatien dagiti Saksi ni Jehova? No kasta, dika koma bumdeng a makisarita kadagiti Saksi ni Jehova ta maragsakanda a mangilawlawag iti dayta.

^ par. 60 Para iti ad-adu pay nga impormasion, kitaem ti kapitulo 12 iti libro nga Ania a Talaga ti Isursuro ti Biblia? nga impablaak dagiti Saksi ni Jehova.

Ammuem ti Ad-adu Pay

Panagbiag iti Wagas a Makaay-ayo iti Dios

Posible ti agbiag iti wagas a makaay-ayo ken ni Jehova. Kinapudnona, mabalinmo ti makigayyem kenkuana.