Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN ABRIL 2014

 SUHETO ITI AKKUB

Rumbeng Kadi nga Agkararagka?

Rumbeng Kadi nga Agkararagka?

Mabalin a maisaludsodmo, ‘No ammo ti Dios ti amin agraman ti pampanunotek ken kasapulak, masapul pay kadi nga agkararagak?’ Nainkalintegan dayta a saludsod. Saan kadi a kinuna ni Jesus a ti Dios “ammona no ania ti bambanag a kasapulanyo sakbay pay a dawatenyo kenkuana”? (Mateo 6:8) Nabigbig daytoy ni Ari David iti nagkauna nga Israel ket insuratna: “Ta awan pay uray maysa a sao iti dilak, ngem, adtoy! O Jehova, ammomon amin dayta.” (Salmo 139:4) Apay a masapul pay nga agkararagtayo iti Dios? Tapno masungbatan dayta, ammuentayo ti kuna ti Biblia maipapan iti kararag. *

“Umadanikayo iti Dios, ket isu umadaninto kadakayo.”—Santiago 4:8

 TI KARARAG PASINGEDENNATAYO ITI DIOS

Nupay ibaga ti Biblia nga ammo ni Jehova * a Dios ti amin a banag, ipakita met dayta a saan laeng nga interesado a mangammo kadagiti bambanag maipapan kadagiti agdaydayaw kenkuana. (Salmo 139:6; Roma 11:33) Ti awan limitasionna a memoria ti Dios ket saan a kas iti kompiuter a mangurnong laeng iti impormasion maipapan kadagiti tattao. Kinapudnona, interesado ti Dios kadagiti pampanunotentayo gapu ta kayatna a sumingedtayo kenkuana. (Salmo 139:23, 24; Santiago 4:8) Gapuna, pinaregta ni Jesus dagiti pasurotna nga agkararagda uray no ammo ti Amana dagiti kangrunaan a kasapulantayo. (Mateo 6:6-8) Ad-adda a sumingedtayo iti Namarsua kadatayo no ibagatayo kenkuana dagiti pakaseknantayo.

No dadduma, ditay ammo no ania a talaga ti ikararagtayo. Kadagita a gundaway, ammo ti Dios dagiti di mayebkas a rikriknatayo ken usarenna ti perpekto a pannakaammona tapno ipaayna dagiti kasapulantayo. (Roma 8:26, 27; Efeso 3:20) Ad-adda a sumingedtayo iti Dios no mabigbigtayo a tinulongannatayo iti pamay-an a ditay napuotan.

SUNGBATAN KADI TI DIOS TI AMIN A KARARAG?

Ipasigurado ti Biblia a sungbatan ti Mannakabalin-amin a Dios ti kararag dagiti matalek nga adipenna, ngem ibagana met no apay a dina sungbatan ti dadduma a kararag. Kas pagarigan, idi nakaro ti kinaranggas ti nagkauna nga Israel, binilin ti Dios ni propeta Isaias nga ibagana iti ilina: “Uray no mamin-adu nga agkararagkayo, saanak nga umimdeng; dagiti mismo nga imayo napnoda iti panagibukbok iti dara.” (Isaias 1:15) Nalawag a dagidiay di mangtungtungpal iti linteg ti Dios wenno agkararag a saan nga umiso ti motibona, dida manamnama a sungbatan ti Dios ti kararagda.—Proverbio 28:9; Santiago 4:3.

Ngem ibaga ti Biblia: “Uray ania ti dawatentayo maitunos iti pagayatanna, denggennatayo.” (1 Juan 5:14) Kayat kadi a sawen dayta a patgan a dagus ti Dios ti amin a kiddaw? Saan. Usigem ti kapadasan ni apostol Pablo. Namitlo nga impakaasina a maikkat koma ti ‘siit iti lasagna.’ (2 Corinto 12:7, 8) Mabalin nga adda nakaro a sakit ni Pablo iti mata. Makaupay la ketdi dayta kenkuana! Naikkan ni Pablo iti pannakabalin a mangagas ken mangpagungar ngem masapul nga ibturanna ti sakitna. (Aramid 19:11, 12; 20:9, 10) Nupay saan a nasungbatan ti kararagna iti pamay-an a kayatna, nagyaman latta ni Pablo iti tulong ti Dios.—2 Corinto 12:9, 10.

“Daytoy ti adda kadatayo a panagtalek kenkuana, nga, uray ania ti dawatentayo maitunos iti pagayatanna, denggennatayo.”—1 Juan 5:14

Pudno, saan a simimilagro a sinungbatan ti Dios ti kararag ti dadduma a karakter ti Biblia. (2 Ar-ari 20:1-7) Ngem uray idi tiempo ti Biblia, saan a kanayon a sungbatan ti Dios dagiti kararag. Maupay ti dadduma a manamati no kasla saan a sungbatan ti Dios ti kararagda. Insaludsod ni Ari David: “Kasanonto kabayag, O Jehova, a lipatennak? Iti agnanayon?” (Salmo 13:1) Ngem idi nabigbig ni David a masansan a tinulongan ni Jehova, ad-adda a nagtalek iti Dios. Iti isu met laeng a kararag, kinuna ni David: “No maipapan kaniak, iti naayat a kinamanangngaasim nagtalekak.” (Salmo 13:5) Kas ken David, dagiti agdaydayaw ken Jehova ita masapul nga agtultuloy nga agkararag agingga a sungbatan ti Dios dagiti kiddawda.—Roma 12:12.

 NO KASANO A SUNGBATAN TI DIOS DAGITI KARARAG

Ipaay ti Dios ti kasapulantayo.

Saan a kanayon nga ipaay dagiti nagannak no ania ti kiddawen dagiti annakda iti kanito a kiddawenda dayta. Kasta met, mabalin a saan a patgan ti Dios ti dawattayo iti wagas a kayattayo ken iti kanito a kiddawentayo dayta. Ngem agtalektayo a kas iti naayat nga ama, ti Namarsua kadatayo ipaayna dagiti kasapulantayo iti umiso a tiempo ken iti umiso a pamay-an.—Lucas 11:11-13.

Mabalin a maysa a teksto iti Biblia ti sungbat ti Dios

Ditay mapupuotan a sungbatan ti Dios dagiti kararagtayo.

Ngem kasano ngay no ikararagtayo a mabang-arantayo iti agdama a parikuttayo? Ipapantayo kadi a gapu ta awan ti namilagruan a sungbat, saan a dengdenggen ni Jehova ti kararagtayo? Maysa pay, nasayaat no panunotentayo amangan no ditay napupuotan a tinulongannatayo ti Dios. Kas pagarigan, nalabit tinulongannaka ti naayat a gayyem iti umiso a tiempo. (Proverbio 17:17) Saan ngata a tinignay ni Jehova ti nadungngo a gayyemmo tapno tulongannaka? Kasta met, mabalin a maysa a teksto iti Biblia ti ipaay ti Dios a sungbat. Mabalin nga ipaay dayta a teksto ti sirib a kasapulantayo tapno maibturantayo ti narigat a kasasaad.—2 Timoteo 3:16, 17.

Mabalin nga usaren ti Dios ti naayat a gayyem a tumulong kadatayo iti umiso a tiempo

Imbes nga ikkaten ti Dios dagiti problematayo, masansan a mangted iti bileg a kasapulantayo tapno maibturantayo dayta. (2 Corinto 4:7) Kas pagarigan, idi inkararag ni Jesus iti Amana nga ikkatenna ti pakarigatanna, ta maamak di la ket ta matabbaawan ti nagan ti Dios, nangibaon ni Jehova iti anghel a mangpabileg iti Anakna. (Lucas 22:42, 43) Umasping iti dayta, mabalin nga usaren ni Jehova ti nasinged a gayyem a mangparegta kenka iti tiempo a kasapulam dayta. (Proverbio 12:25) Gapu ta mabalin a saan a mapupuotan, masapul nga alertotayo koma a mangkita iti wagas a panangsungbat ti Dios iti kararagtayo.

Ammo ti Dios ti kasayaatan a panangsungbatna iti kararagtayo.

Kuna ti Biblia sungbatan ti Dios a Mannakabalin-amin ti kararag dagiti napakumbaba “iti naikeddeng a tiempo.” (1 Pedro 5:6) Gapuna, no kasla saanna a sungsungbatan ti napasnek a kiddawtayo, dina kayat a sawen a saan a maseknan ni Jehova. Imbes ketdi, gapu ta ad-adu ti pannakaammona ngem datayo, ammo ti naayat a Namarsua ti kasayaatan a tiempo a panangipaayna iti kiddawtayo.

“Agpakumbabakayo, ngarud, iti sidong ti mannakabalin nga ima ti Dios, tapno itan-oknakayo iti naikeddeng a tiempo.”—1 Pedro 5:6

Panunotem daytoy: No agkiddaw iti bisikleta ti ubing pay nga anakmo, itedmo kadi a dagus dayta? Kasanon no dina pay ammo ti agbisikleta, mabalin a saanmo pay laeng nga igatangan. Ngem mabalin nga itedmo ti kiddawna no ammonan nga usaren dayta. Kasta met, ipaay ti Dios ti umiso a ‘tarigagay ti pusotayo’ iti maitutop a tiempo no itultuloytayo nga ikararag dayta.—Salmo 37:4.

AGTALEKKA A DUMDUMNGEG NI JEHOVA

Paregtaen ti Biblia dagiti pudno a Kristiano nga agtalekda iti bileg ti kararag. Ngem mabalin a kuna ti dadduma, ‘Nalaka nga ibaga dayta ngem narigat nga aramiden.’ Pudno dayta nangruna no agib-ibturtayo iti nabayagen a problema wenno panangirurumen. Mabalin a matuokantayon nga aguray iti sungbat ti Dios. Ngem laglagipentayo nga imbaga ni Jesus nga agtultuloytayo nga agkararag.

 Dinakamat ni Jesus ti ilustrasion maipapan iti napanglaw a balo a nagtultuloy a nagkiddaw iti saan a nainkalintegan a hues tapno magun-odna ti hustisia. (Lucas 18:1-3) Idi damo, saan a tinulongan ti hues, ngem kinunana met laeng idi agangay: ‘Siguraduekto a magun-odanna ti hustisia, tapno saanto nga agtultuloy nga umay kaniak.’ (Lucas 18:4, 5) Sigun iti teksto iti orihinal a lengguahe, dimngeg ti hues iti kiddaw ti balo tapno saanna a danogen ti hues, wenno iti piguratibo a pamay-an, “dadaelen ti reputasion [ti hues].” * Nupay saan a nainkalintegan ti hues, tinulonganna ti napanglaw a balo di la ket ta madadael ti reputasionna. Ngarud ad-adda nga ipaay ti naayat a Dios ti hustisia kadagidiay “umaw-awag kenkuana iti aldaw ken rabii”! Kas iti kinuna ni Jesus, ‘ipaayto a dagus ti Dios ti hustisia kadakuada.’—Lucas 18:6-8.

“Itultuloyyo ti agdawat, ket maitedto dayta kadakayo”—Lucas 11:9

Nupay mabalin a maumatayon nga agpatpatulong no dadduma, ditay koma sumuko. No itultuloytayo ti agkararag, ipakpakitatayo a kayattayo a tulongannatayo ti Dios. Mabigbigtayo met koma a sungbatan ti Dios dagiti kiddawtayo. Kas resultana, sumingedtayo kenkuana. Wen, agtalektayo a sungbatan ni Jehova dagiti umiso a kararagtayo no itultuloytayo ti agkiddaw ken ditay agduadua a denggen ti Dios dagiti kararagtayo.—Lucas 11:9.

^ par. 3 No kayattayo a denggen ti Dios dagiti kararagtayo masapul nga ipapuso ken tungpalentayo dagiti bilinna. No aramidentayo dayta, mariknatayo ti bileg ti kararag kas nailawlawag iti daytoy nga artikulo. Para iti ad-adu pay nga impormasion, kitaem ti kapitulo 17 iti libro nga Ania a Talaga ti Isursuro ti Biblia? nga impablaak dagiti Saksi ni Jehova.

^ par. 5 Jehova ti nagan ti Dios a naipakaammo iti Biblia.

^ par. 22 Idi tiempo ti Biblia, namnamaen ti Dios a mangipakita dagiti ukom iti naisangsangayan a konsiderasion kadagiti ulila ken balo.—Deuteronomio 1:16, 17; 24:17; Salmo 68:5.