Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN MARSO 2014

 SUHETO ITI AKKUB

No Ania ti Naaramidanen ti Dios Kenka

No Ania ti Naaramidanen ti Dios Kenka

“Gapu iti kasta unay a panagayat ti Dios iti lubong, intedna ti Bugbugtong nga Anakna tapno ti siasinoman a mamati kenkuana saan a matay no di ket agbiag nga agnanayon.”—Juan 3:16, Ti Baro a Naimbag a Damag Biblia.

Maysa dayta kadagiti nalatak ken masansan a makotar a teksto iti Biblia. Awanen ti sabali a teksto a “nalawag a manggupgop iti relasion ti Dios iti tao ken ti pamay-an ti panangisalakanna.” Iti dadduma a pagilian makita dagita a sasao wenno ti “Juan 3:16” kadagiti publiko a lugar, sticker ti lugan, naisurat kadagiti diding wenno pader, ken iti sadinoman a lugar.

Mamati dagiti mangar-aramid iti dayta a manamnamada ti agnanayon a pannakaisalakan gapu iti ayat ti Dios. Sika ngay? Ania ti kaipapanan ti ayat ti Dios kenka? Ken ania ti naaramidanen ti Dios a mangipakita nga ay-ayatennaka?

“KASTA UNAY A PANAGAYAT TI DIOS ITI LUBONG”

Bigbigen ti adu a tao a ti Dios ti nangparsua iti pisikal a uniberso, ti nakaparsuaan, ken dagiti mismo a tattao. Sigurado nga adda masirib a Namarsua kadagiti nasayaat ti pannakaaramidna ken komplikado a sibibiag nga organismo. Adu ti inaldaw nga agyaman iti Dios gapu iti sagutna a biag. Bigbigenda met nga agdependeda iti Dios iti amin a kasapulan iti biag—kas iti angin, danum, taraon, ken dagiti natural a siklo ti daga—tapno agtultuloyda nga agbiag ken mangtagiragsak iti ar-aramidda.

Nagpateg nga agyamantayo iti Dios ta isu ti nangaramid kadatayo ken mangipapaay iti kasapulantayo. (Salmo 104:10-28; 145:15, 16; Aramid 4:24) Maapresiartayo ti ayatna kadatayo no panunotentayo dagiti ar-aramidenna tapno agbiagtayo. Kastoy ti kuna ni Pablo: “[Ti Dios] mangted iti biag ken anges ken amin a bambanag iti amin a tattao. Ta  babaen kenkuana addaantayo ti biag ken aggunaytayo ken addatayo.”—Aramid 17:25, 28.

Nupay kasta, saan laeng nga impakita ti Dios ti ayatna kadatayo babaen ti panangipaayna iti kasapulantayo. Naisangsangayan ti pannakaaramidtayo ta inikkannatayo iti naespirituan a kasapulan ken tulongannatayo a mangpennek iti dayta. (Mateo 5:3) Gapuna, adda namnama ti natulnog a tattao nga agbalin nga “annak ti Dios” kas paset ti pamiliana.—Roma 8:19-21.

Kas kuna ti Juan 3:16, impakita ti Dios ti ayatna kadatayo babaen ti panangibaonna iti Anakna ditoy daga. Immay ni Jesus tapno isuronatayo maipapan iti Dios ken Amana ken tapno matay maipaay kadatayo. Ngem admitiren ti adu a saanda a maawatan no apay a masapul a matay ni Jesus para iti sangatauan ken kasano a ti ipapatayna ket ebkas ti ayat ti Dios kadatayo. Kitaentayo ti panangilawlawag ti Biblia no apay a natay ni Jesus ken ti pateg daytoy.

“INTEDNA TI BUGBUGTONG NGA ANAKNA”

Gapu ta imperpektotayo amin, agsakit, lumakay ken mataytayo. Ngem saan a dayta ti orihinal a panggep ni Jehova a Dios. Inikkanna ti immuna a tao iti namnama nga agbiag nga agnanayon iti paraiso a daga. Nupay kasta, adda kondision ti Dios, masapul nga agtulnogda kenkuana ta no saan, matayda. (Genesis 2:17) Ngem nagsukir iti Dios ti immuna a tao, ket nagresulta dayta iti ipapatayna ken dagiti annakna. Inlawlawag ni apostol Pablo: “Babaen iti maysa a tao simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti amin a tattao agsipud ta nagbasolda amin.”—Roma 5:12.

Ngem ti Dios ket “managayat iti kinahustisia.” (Salmo 37:28) Nupay saanna a binaybay-an lattan ti inggagara a panagbasol ti immuna a tao, saanna a dinusa ti sangatauan iti agnanayon a panagsagaba ken ipapatay gapu iti saan a panagtulnog ti maysa. Iti sabali a bangir, babaen ti panangyaplikarna ti prinsipio iti linteg a “kararua iti kararua,” impakitana ti kinahustisia ken inikkanna manen ti namnama nga agbiag nga agnanayon dagiti natulnog a tattao. (Exodo 21:23) Ngem kasano a maisubli ti perpekto a biag a napukaw ni Adan? Masapul nga adda maidaton wenno maisakripisio a katupag ti perpekto a biag ni Adan.

Situtulok ni Jesus nga immay ditoy daga ken impaayna ti biagna tapno maispal ti sangatauan manipud basol ken ipapatay

Nalawag nga awan kadagiti kaputotan ni Adan ti makaipaay iti daton a perpekto a biag, no di laeng ni Jesus. (Salmo 49:6-9) Perpekto ni Jesus a kas ken Adan gapu ta nayanak nga awanan iti natawid a basol. Isu a babaen ti panangidatonna iti biagna, sinubbotna dagiti tattao manipud pannakaadipen iti basol. Iti kasta, inikkanna iti gundaway dagiti kaputotan da Adan ken Eva a mangtagiragsak iti perpekto a biag. (Roma 3:23, 24; 6:23) Ngem adda kadi masapul nga aramidentayo tapno magunggonaantayo iti aglaplapusanan nga ayat?

 “SIASINOMAN A MAMATI KENKUANA”

Nadakamat met iti Juan 3:16 dagiti sasao a “siasinoman a mamati ken [Jesus] saan a matay no di ket agbiag nga agnanayon.” Adda ngarud kondision ti pananggun-od iti sagut a biag nga agnanayon. No kayattayo ti “agbiag nga agnanayon,” rumbeng a mamati ken agtulnogtayo ken Jesus.

Ngem mabalin a maisaludsodmo: ‘Apay a nairaman ti panagtulnog? Saan kadi a kinuna ni Jesus a “siasinoman a mamati kenkuana” ket maaddaan iti biag nga agnanayon?’ Pudno a kasapulan ti pammati. Ngem laglagipentayo a kuna ti Biblia a saan nga umdas ti basta mamati laeng ken Jesus. Sigun iti Vine’s Expository Dictionary of Old and New Testament Words, ti sao nga inusar ni Juan iti orihinal a lengguahe kaipapananna ti “panagtalek, saan laeng a basta mamati.” Tapno anamongannatayo ti Dios, saantayo laeng a basta patien a ni Jesus ti Manangisalakan. Masapul nga ikagumaan met nga iyaplikar ti maysa a tao ti insuro ni Jesus. Awan serserbi ti pammati nga awan aramidna. Kuna ti Biblia: “Ti pammati nga awanan ar-aramid natay.” (Santiago 2:26) Ngarud, makalikaguman iti maysa a mamati ken Jesus, kayatna a sawen, masapul nga agbiag maitunos iti patpatienna.

Kastoy ti inlawlawag ni Pablo: “Ti ayat nga adda iti Kristo pilitennakami, agsipud ta isu daytoy ti impatomi, a ti maysa a tao [ni Jesus] natay maipaay iti isuamin . . . ket isu natay maipaay iti isuamin tapno dagidiay nga agbiag saanda koman nga agbiag nga agpaay iti bagbagida, no di ket agpaay kenkuana a natay maipaay kadakuada ken naibangon.” (2 Corinto 5:14, 15) Ti naimpusuan a panagyaman iti sakripisio ni Jesus tignayennatayo koma a mangbalbaliw iti panagbiag a maipaay iti bagitayo, imbes ketdi agbiagtayo maipaay ken Jesus, a natay para kadatayo. Kayat a sawen dayta nga ipangpangrunatayo ti panangaramid iti insuro ni Jesus. Ti kasta a panagbalbaliw apektaranna dagiti prinsipio, desision, ken amin nga aramidentayo. Ania ti gunggona dagidiay maaddaan iti pammati ken Jesus?

“SAAN A MATAY NO DI KET AGBIAG NGA AGNANAYON”

Ibaga ti maudi a paset ti Juan 3:16 ti kari ti Dios kadagidiay maaddaan iti pammati iti pangsubbot a daton [ni Jesus] ken agbiag a maitunos kadagiti pagalagadan ti Dios. Kunana a “saan a matay no di ket agbiag nga agnanayon” dagita a matalek. Ngem nagduma ti namnama dagiti magunggonaan iti ayat ti Dios.

Inkari ni Jesus iti maysa a grupo ti agnanayon a biag idiay langit. Kinunana kadagiti matalek nga adalanna nga asidegen a mapan mangisagana iti lugar para kadakuada tapno makikaduada iti nadayag turayna. (Juan 14:2, 3; Filipos 3:20, 21) Dagidiay mapagungar a mapan idiay langit “isudanto ti papadi ti Dios ken ni Kristo, ket makipagturaydanto kenkuana kas ar-ari iti sangaribu a tawen.”—Apocalipsis 20:6.

Limitado laeng ti bilang dagiti pasurot ni Jesus a maaddaan iti kasta a pribilehio. Kinapudnona, kinuna ni Jesus: “Dikay agbuteng, bassit nga ipastoran, agsipud ta inanamongan ni Amayo ti panangited kadakayo ti pagarian.” (Lucas 12:32) Kasano kaadu dayta a “bassit nga ipastoran?” Kuna ti Apocalipsis 14:1, 4: “Ket nakitak, ket, adtoy! ti Kordero [ti napagungar a ni Jesu-Kristo] nga agtaktakder [iti nailangitan] a Bantay Sion, ket kaduana ti sangagasut uppat a pulo ket uppat a ribu nga addaan iti naganna ken iti nagan ni Amana a naisurat kadagiti mugingda. . . . Nagatang dagitoy manipud iti sangatauan kas umuna a bungbunga iti Dios ken iti Kordero.” No idiligtayo iti binilion a nagbiagen, 144,000 laeng nga indibidual ti mangbukel iti “bassit nga ipastoran.” Gapu ta nadakamatda kas ar-ari, siasino dagiti iturayanda?

Imbaga ni Jesus nga adda maikadua a grupo dagiti matalek a tattao a magunggonaan manipud iti nailangitan a Pagarian. Kinuna ni Jesus iti Juan 10:16: “Addaanak iti sabsabali a karnero, nga awan iti daytoy a pagyaponan; masapul met nga iyegko  dagidiay, ket imdengandanto ti timekko, ket agbalindanto a maymaysa nga arban, maymaysa a pastor.” Namnamaen dagitoy a “karnero” ti biag nga agnanayon ditoy daga—ti namnama a tinagiragsak idi da Adan ken Eva. Kasanotay nga ammo nga agbiagdanto ditoy daga?

Namin-adu a dinakamat ti Biblia nga agbalinto a Paraiso ti daga. Tapno mapaneknekam dayta, basaem iti Biblia dagitoy a teksto: Salmo 37:9-11; 46:8, 9; 72:7, 8, 16; Isaias 35:5, 6; 65:21-23; Mateo 5:5; Juan 5:28, 29; Apocalipsis 21:4. Dakamaten dagita a teksto nga awanton ti gubat, bisin, sakit, ken ipapatay. Imbagana nga addanto tiempo a dagiti naimbag a tattao pagrag-oandanto ti mangibangon kadagiti balbalay, mangtalon iti daga, ken mangpadakkel kadagiti annakda iti natalna nga aglawlaw. * Saanka kadi a maragsakan iti dayta a namnama? Adda panggapuantayo a mamati a dandanin matungpal dagita a kari.

ADUN TI NAARAMIDAN TI DIOS

No panunotem talaga nga adun ti naaramidan ti Dios kenka ken iti amin a tao. Inikkannatayo iti biag, sirib, salun-at, ken dagiti kasapulan tapno agbiagtayo. Kangrunaanna, kas nausigtayon iti Juan 3:16, ti subbot a sagut ti Dios babaen ken Jesus, a natay maipaay kadatayo, kaipapananna ti ad-adu pay a bendision a magun-odantayo.

Sigurado a mangyeg iti manayon a ragsak ken bendision ti agnanayon a biag iti natalna, naragsak a kasasaad nga awan ti sakit, gubat, bisin wenno ipapatay. Agdepende kenka ti pananggun-odmo kadagita a bendision, ngem ti saludsod ket, Ania ti ar-aramidem maipaay iti Dios?

^ par. 24 Para iti ad-adu pay nga impormasion maipapan kadagita a padto, kitaem ti kapitulo 3 ti libro nga Ania a Talaga ti Isursuro ti Biblia? nga impablaak dagiti Saksi ni Jehova.

Ammuem ti Ad-adu Pay

Ania ti Panggep ti Dios iti Daga?

Mapasamakto ngata ti panggep ti Dios nga agbalin a paraiso ti daga? No wen, kaano?

Ania ti Kayat ti Dios nga Aramidek?

Kasapulam kadi ti naisangsangayan a tanda manipud iti Dios? Ammuem ti sungbat ti Biblia.