Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

TI PAGWANAWANAN MARSO 2014

Interfaith—Pagayatan Kadi ti Dios?

Interfaith—Pagayatan Kadi ti Dios?

“Ti kadi relihion ket mamagkaykaysa wenno mamagsisina?” Naisaludsod dayta kadagiti agbasbasa iti The Sydney Morning Herald. Adda 89 a porsiento kadagiti napagsaludsodan ti nangibaga a mamagsisina ti relihion.

NGEM naiduma ti panangmatmat dagiti sumupsuporta iti interfaith. “Awan ti relihion a di mangipakita iti asi . . . , di mangipakita iti panangaywan iti aglawlaw . . . , di maseknan iti kinamanagpadagus,” kinuna ni Eboo Patel a nangbuangay iti Interfaith Youth Core.

Kinapudnona, nagtutulag dagiti Budista, Katoliko, Protestante, Hindu, Muslim, ken dadduma pay a relihion tapno pagpatinggaenda ti kinapanglaw, ilabanda ti kalintegan ti tao, pasardengenda ti panagikali iti bomba (land mines), wenno pagsasaritaanda dagiti problema iti aglawlaw. Adu a relihion ti nagtataripnong tapno pagsasaritaanda no kasano nga agkaykaysada a mangsolbar kadagita. Nagraragsakda nupay agduduma ti relihionda. Naaddaanda iti programa babaen ti panangsindida iti kandela, nagpiesta, nagkakanta, nagkarkararagda, ken dadduma pay.

Ti kadi panagtataripnong dagiti relihion ti solusion tapno agkaykaysa ti adu a pammati? Ti interfaith kadi ti pamay-an ti Dios a mangyeg iti nasaysayaat a lubong?

ANIA TI RESULTA TI PANAGKAYKAYSADA?

Ipaspasindayag ti maysa kadagiti kadakkelan nga organisasion ti interfaith nga addaan kadagiti miembro a mangirepresentar iti nasurok a 200 a nagduduma a pammati ken aktibo iti 76 a pagilian. Ti panggepna ket “mangiparegta iti inaldaw ken agtultuloy a panagtitinnulong dagiti saan nga agkakarelihionan.” Nupay kasta, nalaka nga ibaga dagita ngem narigat nga aramiden. Kas pagarigan, sigun kadagiti nangyurnos, pinilida a naimbag dagiti sasao a maisurat iti tulaganda tapno saan a masair ti adu a relihion ken dadduma a grupo a nagpirma iti dokumento. Apay? Ngamin, adda di pagkikinnaawatan no rumbeng pay kadi nga iraman ti Dios iti tulagan. Idi agangay, saandan nga inraman ti Dios.

No saan a nairaman ti Dios iti tulagan, ania ngarud ti paset ti pammati? Kasta met, kasano a maiduma ti interfaith iti aniaman nga organisasion a tumultulong? Dayta ti makagapu a ti grupo ti nagduduma a relihion, ibagbagada a saanda a narelihiosuan a grupo, no di ket “maysa nga organisasion a mangiparparegta iti panagtitinnulong.”

UMDAS KADI NGA IPAREGTA TI NASAYAAT A GALAD?

“Adda agpapada a galad a kayat ti amin a kangrunaan a relihion: ayat, panagtitinnulong ken panagpipinnakawan,” kuna ti Dalai Lama, maysa a nalatak a mangsupsuporta iti interfaith. Intuloyna: “Ti napateg ket paset koma dayta ti inaldaw a panagbiagtayo.”

 Talaga a napateg ti galad a kas iti ayat, asi, ken pammakawan. Kinuna ni Jesus iti pagaammo a Nabalitokan a Bilin: “Amin a bambanag, ngarud, a kayatyo nga aramiden kadakayo dagiti tattao, masapul a kasta met ti aramidenyo kadakuada.” (Mateo 7:12) Ngem ti kadi pudno a pammati ket panangiparegta laeng iti nasayaat a galad?

Kinuna ni apostol Pablo maipapan kadagiti agkunkuna nga agserserbi iti Dios idi kaaldawanna: “Saksiak ida nga adda regtada iti Dios; ngem saan a maitunos iti umiso a pannakaammo.” Apay? Ngamin saanda nga ‘ammo ti kinalinteg ti Dios no di ket ikagkagumaanda nga ipasdek ti bukodda’ a kinalinteg. (Roma 10:2, 3) Awan mamaay ti regta ken pammatida ta saan nga umiso ti pannakaammoda iti kayat ti Dios nga aramidenda.—Mateo 7:21-23.

TI KUNA TI BIBLIA MAIPAPAN ITI INTERFAITH

Kuna ni Jesus a “naragsak dagiti mannakikappia.” (Mateo 5:9) Inaramid ni Jesus ti inkasabana babaen ti saanna a panangaramid iti kinaranggas ken panangidanonna iti mensahe ti talna kadagiti tattao a nagduduma ti relihionda. (Mateo 26:52) Dagidiay nangipangag iti dayta ket nabileg ti panagayatda iti maysa ken maysa. (Colosas 3:14) Ngem iparparegta laeng kadi ni Jesus ti panagtitinnulong dagiti tattao a nagduduma ti kasasaadda tapno agkaykaysada? Nakiraman kadi iti ar-aramid ti dadduma a relihion?

Dagiti panguluen ti relihion dagiti Fariseo ken Saduceo, nakaro ti panangbusorda ken Jesus ken kayatda pay a patayen. Ania ti reaksionna? Binilin ni Jesus dagiti adalanna: “Bay-anyo ida. Isuda dagiti bulsek a mangidaldalan.” (Mateo 15:14) Saan ida a binigbig ni Jesus kas naespirituan a kakabsatna.

Di nagbayag, nabuangay ti kongregasion Kristiano iti Corinto, Grecia. Maysa dayta a siudad a nalatak gapu iti nagduduma a relihion, kultura ken nagtaudanda. Kasano a nagbiag dagiti Kristiano iti kasta a kasasaad? Sinuratan ida ni apostol Pablo: “Dikay agbalin a di agkaasmang a naisangol kadagiti di manamati.” Apay? Kuna ni Pablo: “Ania ti pagtunosan da Kristo ken Belial? Wenno ania ti pakiramanan ti matalek a tao iti di manamati?” Kalpasanna, imbalakadna: “Gapuna rummuarkayo manipud iti tengngada, ket isinayo ti bagbagiyo.”—2 Corinto 6:14, 15, 17.

Nalawag a saan nga anamongan ti Biblia ti interfaith. Ngem mabalin a maisaludsodmo, ‘Kasano a maragpat ti pudno a panagkaykaysa?’

PANANGRAGPAT ITI PUDNO A PANAGKAYKAYSA

Ti International Space Station a mangrikrikus iti daga ket maysa a pagsidsiddaawan a gapuanan ti teknolohia. Naaramid dayta gapu iti panagtitinnulong ti 15 a pagilian. Nairingpas ngata daytoy a proyekto no saan a nagtutunos dagiti nakiraman a pagilian iti plano nga usarenda?

Nasken met nga agtutunos ti nagduduma a relihion iti kaaldawantayo. Nupay ipagpaganetgetda ti panagtitinnulong ken panagririnnaem, awan ti plano a nagtutunosanda tapno agkaykaysa ti pammatida. Kas resultana, saanda pay laeng nga agkaykaysa kadagiti isyu maipapan iti moral ken doktrina.

Naglaon ti Biblia kadagiti pagalagadan ti Dios a nayarig iti plano ken mapagtalkantayo amin dagita. Dagidiay nangannurot iti dayta saandan a mangidumduma gapu iti relihion ken puli ken addan talna ken panagkaykaysada. Kinuna ti Dios: “Itdekto kadagiti ili ti panagbalbaliw nga agturong iti nasin-aw a pagsasao, tapno isuda amin umawagda iti nagan ni Jehova, tapno agserbida kenkuana iti abagan-abaga.” Ti panagkaykaysa ket resulta ti “nasin-aw a pagsasao,” ti pagalagadan ti Dios iti panagdayaw.—Sofonias 3:9; Isaias 2:2-4.

Naimpusuan nga awisendaka dagiti Saksi ni Jehova a tumabuno iti Kingdom Hall nga asideg iti lugaryo tapno makitam ti naisangsangayan a talna ken panagkaykaysada.—Salmo 133:1.