Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan  |  Enero 2014

 SUHETO ITI AKKUB | NI KADI PATAY TI PAGPATINGGAAN TI AMIN?

Saan a ni Patay ti Pagpatinggaan ti Amin!

Saan a ni Patay ti Pagpatinggaan ti Amin!

Ti Betania ket maysa a bassit a purok a tallo a kilometro ti kaadayona iti Jerusalem. (Juan 11:18) Adda idi napasamak a trahedia sadiay sumagmamano a lawas sakbay ti ipapatay ni Jesus. Ni Lazaro a maysa kadagiti nasinged a gagayyem ni Jesus ket bigla a nagsakit iti nakaro ket natay.

Idi nadamag dayta ni Jesus, imbagana kadagiti adalanna a matmaturog laeng ni Lazaro, ket mapanna riingen. (Juan 11:11) Ngem saanda a natarusan ti imbagana, isu a kinuna ni Jesus: “Ni Lazaro natayen.”—Juan 11:14.

Uppat nga aldaw kalpasan ti tabon, simmangpet ni Jesus iti Betania ket liniwliwana ni Marta a kabsat ni Lazaro. “No addaka koma idi ditoy saan koma a natay ti kabsatko,” kinuna ni Marta. (Juan 11:17, 21) “Siak ti panagungar ken ti biag,” insungbat ni Jesus. “Ti mangwatwat iti pammati kaniak, uray no matay, agbiagto.”—Juan 11:25.

“Lazaro, rummuarka!”

Tapno ipakita a pudno ti imbagana, immasideg ni Jesus iti tanem ket impukkawna: “Lazaro, rummuarka!” (Juan 11:43) Kasta unay ti siddaaw dagiti nakakita idi rimmuar ni Lazaro.

Sakbay dayta, adda pay dua a pinagungar ni Jesus. Ti maysa ket ti balasitang ni Jairo. Sakbay a pinagungar ni Jesus ti balasitang, inladawanna met a matmaturog.—Lucas 8:52.

Paliiwem ta agpada nga inyarig ni Jesus ti ipapatay da Lazaro ken ti balasitang ni Jairo kas matmaturog. Mayanatup unay dayta a panangiladawan. Apay? Ngamin awan puot ti nakaturog ken kaipapananna a saanen a makarikna iti ut-ot wenno panagsagaba. (Eclesiastes 9:5; kitaem ti kahon a  “Ti Ipapatay Kasla iti Nargaan a Turog.”) Naawatan a naimbag dagiti nagkauna a pasurot ni Jesus ti pudno a kasasaad dagiti natay. “Imbilang dagiti pasurot ni Jesus ti ipapatay kas pannaturog, ken ti tanem kas paginanaan . . . dagidiay natay nga addaan  pammati,” * kuna ti Encyclopedia of Religion and Ethics.

Makaliwliwa a maammuan a dagiti natay matmaturogda iti tanem ken saanda nga agsagsagaba. Ditay ngarud mabuteng gapu ta ammotayo ti kasasaad dagiti natay.

“NO MATAY TI TAO, AGBIAGTO AYA MANEN?”

Nupay nasayaat ti maturog iti agpatnag, asino ti mayat a maturog iti agnanayon? Manamnamatayo kadi nga agbiagto manen dagiti natay a naturog iti tanem—kas ken Lazaro ken ti balasitang ni Jairo?

Dayta ti insaludsod ni patriarka a Job idi pagarupna a matayen. “No matay ti tao, agbiagto aya manen?”—Job 14:14, Ti Baro a Naimbag a Damag Biblia.

Sinungbatan a mismo ni Job ti saludsodna idi kinunana iti Mannakabalin-amin a Dios: “Umawagkanto, ket siak sungbatankanto. Kailiwmonto ti aramid dagita imam.” (Job 14:15) Sigurado ni Job a segseggaan ni Jehova ti aldaw a pagungarenna dagiti matalek nga adipenna. Agar-arapaap laeng kadi ni Job? Saan.

Dagiti panangpagungar ni Jesus ket nalawag a pammaneknek nga inikkan ti Dios iti pannakabalin a mangparmek ken patay. Kinapudnona, kuna ti Biblia nga addan ken Jesus “dagiti tulbek ni patay.” (Apocalipsis 1:18) Gapuna, luktanto ni Jesus dagiti ruangan ti tanem kas iti panangibilinna a maikkat ti bato iti ruangan ti tanem ni Lazaro.

Maulit-ulit nga ibaga ti Biblia ti kari a panagungar. Impasigurado ti anghel ken propeta Daniel: “Aginanakanto, ngem tumakderkanto maipaay iti bingaymo iti panungpalan dagiti aldaw.” (Daniel 12:13) Kinuna ni Jesus kadagiti Saduceo a panguluen dagiti Judio a di mamati iti panagungar: “Agbiddutkayo, agsipud ta saanyo nga ammo dagiti Kasuratan wenno uray ti pannakabalin ti Dios.” (Mateo 22:23, 29) Kinuna ni apostol Pablo: “Adda inanamak iti Dios . . . nga addanto panagungar agpadpada dagiti nalinteg ken dagiti nakillo.”—Aramid 24:15.

KAANO NGA AGUNGAR DAGITI NATAY?

Kaano a mapagungar dagiti nalinteg ken nakillo? Kinuna ti anghel iti nalinteg a lalaki a ni Daniel a mapagungarto iti “kamaudianan nga aldaw.” Patien met ni Marta a ti kabsatna a ni Lazaro ket “bumangonto inton panagungar iti kamaudianan nga aldaw.”—Juan 11:24.

Ti Biblia inaigna daytoy ‘maudi nga aldaw’ iti panagturay ti Pagarian ni Kristo. Insurat ni Pablo: “Ta isu [ni Kristo] masapul nga agturay kas ari agingga a ti Dios naikabilnan amin dagiti kabusorna iti babaen dagiti sakana. Kas ti maudi a kabusor, ni patay mapukawto.” (1 Corinto 15:25, 26) Nabileg dayta a rason tapno ikararagtayo nga umay ti Pagarian ti Dios ken maaramid ti pagayatanna ditoy daga. *

Pagaammo unay ni Job a pagayatan ti Dios nga agungar dagiti natay. Inton mapasamak dayta, mapukawton ni patay. Awanton ti agkuna iti, ‘Ni kadi patay ti pagpatinggaan ti amin?’

^ par. 8 Ti sao a “sementerio” ket nagtaud iti Griego a sao a kaipapananna “lugar a pagturogan.”

^ par. 18 Tapno maammuam ti ad-adu pay maipapan iti Pagarian ti Dios, kitaem ti kapitulo 8 iti libro nga Ania a Talaga ti Isursuro ti Biblia? nga impablaak dagiti Saksi ni Jehova.