Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan  |  Enero 2014

Namnama Dagiti Natay—Ti Panagungar

Namnama Dagiti Natay—Ti Panagungar

Mamatika kadi iti kari ti Biblia a panagungar? * Makaparagsak ti namnama a makaduatayto manen dagiti natayen nga ipatpategtayo iti biag. Ngem realistiko kadi dayta a namnama? Tapno masungbatan dayta, ammuentayo no ania ti masursurotayo kadagiti apostol ni Jesu-Kristo.

Patien unay dagiti apostol ti panagungar. Apay? Umuna, naibatay a nangnangruna ti namnamada iti daytoy a kinapudno: Napagungar a mismo ni Jesus. Nakita dagiti apostol ken ti “nasurok a lima gasut a kakabsat iti maymaysa a gundaway” ti napagungar a ni Jesus. (1 Corinto 15:6) Maysa pay, kas ipakita ti uppat nga Ebanghelio, adu a tattao ti mangpaneknek iti panagungar ni Jesus.—Mateo 27:62–28:20; Marcos 16:1-8; Lucas 24:1-53; Juan 20:1–21:25.

Maikadua, nasaksian dagiti apostol ti tallo kadagiti panangpagungar ni Jesus—umuna idiay Nain, sa idiay Capernaum, ken ti maudi idiay Betania. (Lucas 7:11-17; 8:49-56; Juan 11:1-44) Ti naudi kadagita a panangpagungar a pakairamanan ti pamilia a nasinged ken Jesus ket nailawlawag iti immun-una nga artikulo. Kitaentayo no ania ti napasamak.

“SIAK TI PANAGUNGAR”

“Bumangonto ni kabsatmo.” Imbaga dayta ni Jesus ken Marta, ngamin uppat nga aldawen a natay ti kabsatna a ni Lazaro. Idi damo, saan a naawatan ni Marta ti imbaga ni Jesus. “Ammok a bumangonto,” kinunana, ngem pampanunotenna a mapasamakto dayta iti masanguanan. Kalpasan nga imbaga ni Jesus ti “Siak ti panagungar ken ti biag,” panunotem ti siddaaw ni Marta idi nakitana a pinagungar ni Jesus ti kabsatna!—Juan 11:23-25.

Uppat nga aldawen a natay ni Lazaro. Sadino idi ti ayanna? Awan ti imbaga ni Lazaro a mangipakita a nagbiag iti sabali a lugar bayat ti uppat nga aldaw. Awan ti napan idiay langit nga immortal a kararua ni Lazaro. Idi pinagungar ni Jesus, saanna a pinababa ditoy daga manipud panangtagiragsakna iti biag idiay langit iti sibay ti Dios. Sadino ngarud ti ayan ni Lazaro iti uppat nga aldaw? Kinapudnona, isu ket matmaturog iti tanem.—Eclesiastes 9:5, 10.

Laglagipem, inyarig ni Jesus ti ipapatay iti pannaturog a mabalin a riingen ti maysa babaen ti panagungar. Kuna ti salaysay: “‘Ni Lazaro a gayyemtayo napan naginana, ngem agbaniagaak sadiay tapno riingek manipud pannaturogna.’ Gapuna  kinuna kenkuana dagiti adalan: ‘Apo, no isu napan naginana, umimbagto.’ Nupay kasta, nagsao ni Jesus maipapan ti ipapatayna. Ngem impagarupda a nagsasao maipapan ti panaginana iti pannaturog. Iti dayta a tiempo, ngarud, sipaprangka a kinuna kadakuada ni Jesus: ‘Ni Lazaro natayen.’” (Juan 11:11-14) Nagbiag manen ni Lazaro idi pinagungar ni Jesus ket nakaduana manen ti pamiliana. Anian a nagsayaat a sagut ti impaay ni Jesus iti dayta a pamilia!

Ipakita dagita a panangpagungar ni Jesus ditoy daga no anianto ti aramidenna iti masanguanan kas Ari iti Pagarian ti Dios. * Bayat ti panagturay ni Jesus ditoy daga manipud langit, pagungarennanto ti amin nga adda iti tanem a naturog ken patay. Dayta ti makagapu a kinunana: “Siak ti panagungar.” Napalalo la ketdi ti ragsakmo inton makitam manen dagiti ipatpategmo iti biag! Panunotem met ti ragsak dagiti mapagungar!—Lucas 8:56.

Napalalo la ketdi ti ragsakmo inton makitam manen dagiti ipatpategmo iti biag!

PAMMATI ITI BIAG NGA AGNANAYON

Kinuna ni Jesus ken Marta: “Ti mangwatwat iti pammati kaniak, uray no matay, agbiagto; ket tunggal maysa a sibibiag ken mangwatwat iti pammati kaniak saanto a pulos matay.” (Juan 11:25, 26) Dagidiay pagungaren ni Jesus bayat iti sangaribu a tawen a panagturayna, addanto namnamada nga agbiag iti agnanayon—no la ketdi ipakitada ti pudpudno a pammati kenkuana.

“Ti mangwatwat iti pammati kaniak, uray no matay, agbiagto.”—Juan 11:25

Kalpasan nga imbagana dagita a makaparagsak a sasao, insaludsod ni Jesus ken Marta: “‘Patiem kadi daytoy?’ Kinunana kenkuana: ‘Wen, Apo; namatiak a sika ti Kristo nga Anak ti Dios.’” (Juan 11:26, 27) Kayatmo kadi met ti maaddaan iti pammati iti panagungar a kas ken Marta? Umuna, ammuem ti panggep ti Dios para iti tao. (Juan 17:3; 1 Timoteo 2:4) Makatulong dayta tapno maaddaanka iti pammati. Agpatulongka kadagiti Saksi ni Jehova tapno maammuam ti isursuro ti Biblia maipapan iti panagungar. Maragsakanda a mangilawlawag kenka iti dayta a naragsak a namnama a panagungar.

^ par. 2 Kitaem ti artikulo a “Saan a ni Patay ti Pagpatinggaan ti Amin!” iti panid 6 daytoy a ruar.

^ par. 9 Para iti ad-adu pay nga impormasion maipapan ti kari iti Biblia a panagungar iti masanguanan, kitaem ti kapitulo 7 iti libro nga Ania a Talaga ti Isursuro ti Biblia? nga impablaak dagiti Saksi ni Jehova.