Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan  |  Disiembre 2013

 PAKASARITAAN ITI BIAG

Pinagbalinko a Karera ti Panagserbi ken Jehova

Pinagbalinko a Karera ti Panagserbi ken Jehova

Idi nagraduarak iti hayskul idi Enero 1937, nagenrolak iti Iowa State University nga asideg ti pagnanaedanmi iti makintengnga a laud ti United States. Awanen ti panawenko iti sabali a banag gapu ta mapanak agtrabaho kalpasan ti klasek tapno adda pagbayadko iti matrikulak. Sipud pay ubingak, pagay-ayatkon nga adalen dagiti nangangato a pasdek ken dagiti rangtay.

Idi rugrugi ti 1942, kalpasan a nakiraman ti United States iti Gubat Sangalubongan II, addaakon iti maudi a tawen iti kolehio ken sumagmamano laengen a bulan aggraduarakon kas architectural engineer. Adda dua a kaduak iti kuarto nga ab-abangak. Imbaga ti maysa kadakuada a kasaritak ti tao a “bumisbisita kadagiti lallaki nga agab-abang iti baba.” Idi a naam-ammok ni John O. (Johnny) Brehmer a maysa a Saksi ni Jehova. Nasdaawak ta masungbatanna ti amin a saludsodko babaen ti Biblia. Gapuna, regular a nakipagadalak iti Biblia ken Johnny ken idi agangay, no adda tiempok, makikaduaak kenkuana a mangasaba.

Nagbalin a Saksi ti tatang ni Johnny a ni Otto bayat nga agtrabtrabaho kas presidente iti maysa a banko iti Walnut, Iowa. Nagikkat iti trabahona tapno sumrek kas amin-tiempo a ministro. Idi agangay, ti nagsayaat nga ulidan ni Otto ken ti pamiliana ti nangpabileg kaniak a mangaramid iti nagpateg a desision.

PANAWEN NGA AGDESISION

Naminsan, imbaga ti dean iti unibersidad a bumabbaba ti dati a nangato a markak isu a saanak a makagraduar. Malagipko pay a sipapasnek a nagkararagak ken Jehova a kiniddawko nga iwanwannak. Di nagbayag, pinaayabannak ti propesorko iti engineering. Imbagana a nakaawat iti telegrama nga agkidkiddaw iti maysa nga inheniero. Sinungbatanna dayta ket imbagana nga awatek ti trabaho. Nagyamanak iti propesorko ngem inlawlawagko a kayatko a pagbalinen a karera ti panagserbi ken Jehova. Nabautisaranak idi Hunio 17, 1942, ken dagus a nadutokanak nga agserbi kas payunir, wenno amin-tiempo a ministro dagiti Saksi ni Jehova.

Iti dayta met la a tawen, napakaammuanak nga agserbi iti militar isu a napanak iti draft board tapno ilawlawagko no apay a diak makipaset iti gubat. Nangipakitaak kadagiti affidavit manipud kadagiti propesorko iti kolehio a nangpaneknek a nasayaat ti kababalinko ken nalaingak kas maysa nga structural engineer. Ngem iti laksid dagita, namultaak latta idi agangay iti $10,000 (U.S.) ken nasentensiaanak a maibalud iti lima a tawen iti Leavenworth, Kansas, U.S.A.

TI BIAGKO ITI PAGBALUDAN

Ti Leavenworth U.S. Penitentiary ita. Agarup 230 kadakami ti naibalud sadiay

Nasurok a 230 nga agtutubo a Saksi ti nasentensiaan a maibalud idiay Leavenworth. Pinagtrabahodakami iti talon a bambantayan dagiti guardia.  Ammo ti dadduma kadakuada ti neutral a takdertayo kas Kristiano ken umanamongda iti patpatientayo.

Nakitinnulong pay ti dadduma a guardia tapno maitultuloymi ti panagadal iti Biblia. Tinulongandakami met a mangiserrek iti pagbaludan kadagiti literatura a naibasar iti Biblia. Regular pay nga umaw-awat ti warden iti magasin a Consolation (Agriingkayo! itan)!

NAWAYAWAYAAN KEN NAGSERBI KAS MISIONERO

Kalpasan ti tallo a tawen a pannakaibaludko, nawayawayaanak idi Pebrero 16, 1946, sumagmamano a bulan kalpasan ti Gubat Sangalubongan II. Dagus a nagpayunirak manen. Ti teritoriak ket iti siudad ti Leavenworth, Kansas. Maamakak gapu ta nakaro ti panangidumdumada kadagiti Saksi ni Jehova sadiay. Narigat ti agbirok iti trabaho a pangsuportak iti bagik ngem narigrigat ti agbirok iti pagdagusan.

Malagipko pay ti napasamak bayat a mangaskasabaak idi binugkawannak ti maysa a guardia, “Pumanawka ditoy!” Idi nakitak ti iggemna a baseball bat, nagbutengak ket dagus a pimmanawak. Iti sabali pay a balay, kinuna ti maysa a babai, “Urayennak biit” sa inserrana ti ruangan. Nagurayak agingga a naglukat ti tawa iti ngato sa naibuyat kaniak ti narugit a danum. Ngem adu latta dagiti bendision iti ministeriok. Idi agangay, naammuak a nagbalin a Saksi ti dadduma nga immawat iti literatura a naibasar iti Biblia.

Idi 1943, nangrugi ti baro nga eskuelaan para kadagiti misionero idiay makin-amianan a paset ti New York. Naawisak nga ageskuela ket nagraduarak iti maikasangapulo a klase idi Pebrero 8, 1948. Pagaammo ita daytoy kas Watchtower Bible School of Gilead. Idi nagraduarak, naidestinoak idiay Gold Coast, a Ghana itan.

Idi simmangpetak iti Gold Coast, kasabaak dagiti opisial ti gobierno ken dagiti taga-Europa. Ngem iti ngudo ti lawas, makikaduaak iti kongregasion dagiti Saksi ni Jehova ken tulongak dagiti kakabsat iti panagbalaybalay. Bisitaek met dagiti naiputputong a lugar nga ayan dagiti Saksi ken sanayek ida iti ministerio. Malaksid iti dayta, agserbiak met kas agdaldaliasat a manangaywan iti kabangibang nga Ivory Coast, a Côte d’Ivoire itan.

Bayat nga agserserbiak kadagita a lugar, nasursurok ti agbiag a kas kadagiti lumugar nga Africano, maturogak iti kalapaw a naaramid iti pitak, agkammetak, ken agdalupisakak iti kannag kas kadagiti Israelita idi addada iti let-ang. (Deuteronomio 23:12-14) Gapu iti dayta, nasayaat ti reputasionmi kadagiti kakaduak a misionero. Nakipagadal kadakami iti  Biblia ti assawa ti dadduma nga opisial. Isu nga idi adda bimmusor kadakami ken kiniddawda iti korte a maibabawi ti visa-mi, ti assawa dagiti opisial kinasaoda dagiti assawada ket saan a natuloy ti kiddawda!

Kas kadagiti adu a misionero iti Africa, nagsakitak iti malaria. Naggurigorak ken nagpayegpegak. No dadduma, tenglek payen ti pangak tapno saan nga agpigerger. Nupay kasta, ti panagserbik ket nangyeg kaniak ti ragsak ken pannakapnek.

Bayat ti umuna nga uppat a tawenko iti Africa, nagsinnuratkami ken Eva Hallquist a naam-ammok sakbay a pimmanawak iti United States. Naammuak nga aggraduar iti maika-21 a klase iti Gilead School iti Hulio 19, 1953 iti internasional a kombension dagiti Saksi ni Jehova iti Yankee Stadium, New York. Nakisaritaak iti maysa a kapitan ti barko nga agtrabahoak iti barkona a kasukat ti pasahek a mapan iti United States.

Kalpasan ti 22 nga aldaw a panaglayag iti nadawel a baybay, simmangpetak a makipagkita ken Eva iti hedkuarter dagiti Saksi ni Jehova iti Brooklyn. Iti tuktok ti hedkuarter ti Brooklyn a matannawagan ti sangladan ken ti intero a siudad ti New York, indiayak ti panagkasarmi. Idi agangay, kimmuyog kaniak ni Eva nga agserbi iti Gold Coast.

PANANGIBAKLAY ITI RESPONSABILIDAD ITI PAMILIA

Kalpasan ti adu a tawen a panagserbimi ken Eva iti Africa, nakaawatak iti surat ni Nanang a nangibaga nga agngangabiten ti biag ni Tatang gapu iti kanser. Idi napalubosanak nga agbakasion, nagsublikami ken Eva idiay United States. Dagus a kimmapuy ti salun-at ni Tatang ket di nagbayag natay.

Idi agangay, iti agarup uppat a tawenen a kaaddami idiay Ghana, naammuanmi a nakapuyen ti salun-at ni Nanang. Imbaga ti dadduma a gagayyemmi nga agawidkami tapno aywananmi ni Nanang. Dayta ti karirigatan a desision nga inaramidmi. Kalpasan ti 15 a tawen a panagserbi kas misionero, 11 a tawen kadagita ti nabusbosmi kas agassawa, nagsublikami idiay United States.

Kaduami ti maysa a panguluen ti Gold Coast, Ghana itan

Adu a tawen a nagsinnublatkami a nangaywan ken Nanang. Tulonganmi a makigimong no kabaelanna. Idi Enero 17, 1976, natay ni Nanang iti edad a 86. Ngem 9 a tawen kalpasanna, adda pay nakalkaldaang a napasamak. Nadayagnos nga adda kanser ni Eva. Inaramidmi ti amin tapno umimbag ni Eva ngem saanna a nalasatan ti sakitna. Natay idi Hunio 4, 1985, iti edad a 70.

DADDUMA PAY A PANAGBALBALIW ITI MAKAPNEK A PANAGSERBI

Idi 1988, naawisak a tumabuno iti dedikasion ti napalawa a sanga nga opisina idiay Ghana. Nakallalagip dayta nga okasion! Agarup 40 a tawen ti napalabasen, idi simmangpetak idiay Ghana kalpasan a naggraduarak iti Gilead, awan pay sangaribu a Saksi sadiay. Ngem idi 1988, nasuroken a 34,000, ket ita dandanin 114,000!

Dua a tawen kalpasan a bimmisitaak idiay Ghana, inkasarko ti nasinged a gayyem ni Eva a ni Betty Miller idi Agosto 6, 1990. Intultuloymi a pinagbalin a karera ti panagserbi ken Jehova. Segseggaanmi ti tiempo inton makitami dagiti lolo ken lolami, nagannakmi, ken ni Eva inton agungarda iti paraiso ditoy daga.—Aramid 24:15.

Makaluaak no lagipek ti nakaskasdaaw a pribilehiok nga agserbi ken Jehova iti nasurok a 70 a tawen. Kanayon a pagyamanak ti panangiwanwanna tapno mapagbalinko a karera ti panagserbi kenkuana. Nupay nasuroken a 90 ti tawenko, ni Jehova a kalaingan nga architectural engineer iti uniberso, kanayon nga ikkannak iti bileg ken tured a mangitultuloy iti karerak nga agserbi kenkuana.