Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Ti Pagwanawanan  |  Oktubre 2013

Mangabaruan Kalpasan ti Diborsio

Mangabaruan Kalpasan ti Diborsio

“Kasla nagtupak ti langit kaniak. Nagsayaat idi ti biagko, ngem pagammuan ta awanen mamaayna.”—MARK, * makatawenen a nakidiborsio.

“Adda babai ni lakayko a kaedad ti balasangmi. Idi nagdiborsiokami, naliklikak ti panagpungpungtotna, ngem nariknak a naibabainak ken awan serserbik.”—EMMELINE, 17 a tawenen a nakidiborsio.

Makidiborsio ti dadduma gapu ta kayatda a sumayaat ti biagda. Kayat ti dadduma nga agtalinaed nga adda asawada ngem pinanawan ida ti asawada. Ngem natakuatan ti kaaduan a nakidiborsio a narigrigat ti biagda ngem iti ninamnamada. Kinapudnona, no nabiitka pay a nakidiborsio, maammuam a maysa dayta kadagiti karirigatan a mapasaram. Makatulong ngarud nga usigem dagiti praktikal a balakad ti Biblia tapno maibturam dagiti rigat ti pannakidiborsio.

UMUNA A PROBLEMA: NEGATIBO A RIKNA.

Mabalin a problemam ti kuarta, panangaywan iti annak, ken kinaliday. Naammuan daydi sikologo a ni Judith Wallerstein a kalpasan ti adu a tawen a pannakidiborsio, marikna pay laeng ti dadduma a naallilaw ken nabaybay-anda, nga ibilangda a “ti biag ket saan a patas, makaupay, ken naliday.”

NO ANIA TI MAARAMIDAM

  • Ipeksam ti marikriknam a liday. Mabalin a mailiwka a makikadua iti ipatpategmo. Nupay miserable  ti relasionyo, maladingitanka ta saanmo a napasaran ti ninamnamam a ragsak iti panagasawa. (Proverbio 5:18) Dika koma mabain nga ‘agsangit.’Eclesiastes 3:1, 4.

  • Dimo isinsina ti bagim. Nupay kasapulam ti agmaymaysa tapno agladingit, saan a nasayaat ti napaut a panangisina iti bagi. (Proverbio 18:1) No kaduam dagiti gagayyemmo, dagiti naragsak a bambanag ti pagsasaritaanyo, ta no ti problemam iti dati nga asawam ti kanayon nga estoriaem, mabalin a dayta ti panggapuanda a mangliklik kenka. No adda aramidem a napateg a desision kalpasan ti pannakidiborsiom, agpatulongka iti talkem a gayyem.

  • Aywanam ti salun-atmo. Dagiti problema a resulta ti diborsio ti masansan a pakaigapuan ti sakit kas iti alta presion wenno migraine. Manganka kadagiti nasustansia a taraon, agehersisio, ken maaddaan iti umdas a turog.Efeso 5:29.

  • Ibellengmo dagiti bambanag a mamagpungtot kenka iti dati nga asawam wenno dagiti saanmo a kasapulan, ngem idulinmo dagiti napapateg a papeles. No agsakit ti nakemmo a makakita kadagiti retrato ti kasaryo, idulinmo iti kahon para kadagiti annakmo.

  • Iwaksim dagiti negatibo a kapanunotan. Kuna ni Olga a nakidiborsio idi nakikamalala ni lakayna: “Kanayon nga isaludsodko iti bagik, ‘Ania ti adda kenkuana nga awan kaniak?’” Ngem naamiris ni Olga a no kanayon a panunotenna dagiti negatibo a bambanag, agresulta dayta iti “nadanar nga espiritu.”Proverbio 18:14.

    Natakuatan ti dadduma a nasayaat no isuratda ti pampanunotenda tapno malawlawagan ken makontrol ti panunotda. Maaramidam daytoy no dagiti positibo a bambanag ti panunotem. (Efeso 4:23) Usigem ti dua a pagarigan:

    Negatibo: Basolko ti saan a panagmatalek ti asawak.

    Positibo: Saan a dagiti pakapilawak ti panggapuan ti asawak a mangisina kaniak.

    Negatibo: Sinayangko dagiti kasayaatan a tawen ti biagko iti di umiso a lalaki.

    Positibo: Naragragsakak no ipamaysak a panunoten ti masanguanan.

  • Palabsem dagiti makapasakit a sasao. Mabalin a maibaga dagiti gagayyem ken kakabagiam dagiti makapasakit wenno di umiso a sasao: ‘Bay-amon ta saan met a nasayaat nga asawa para kenka,’ wenno ‘Kagura ti Dios ti panagdiborsio.’ * Nagsayaat ti balakad ti Biblia: “Saanmo nga ipaay ta pusom kadagiti amin a sao a sawen dagiti tattao.” (Eclesiastes 7:21) Kuna ni Martina a dua a tawenen a nakidiborsio: “Imbes a panunotek dagiti makapasakit a sasao, ikagumaak a kitaen ti bambanag sigun iti panangmatmat ti Dios. Ti pampanunotna ket nangatngatoda ngem iti pampanunottayo.”—Isaias 55:8, 9.

  • Agkararagka iti Dios. Parparegtaenna dagiti adipenna nga ‘iyallatiwda kenkuana dagiti pakaringgoranda,’ nangruna no marigrigatanda.1 Pedro 5:7.

PADASEM DAYTOY: Isuratmo dagiti teksto ti Biblia a makatulong kenka, ken ikabilmo iti lugar a nalaka ken kanayonmo a makita. Malaksid kadagiti teksto a nadakamaten, adu a diborsiado ti nagunggonaan kadagitoy a teksto: Salmo 27:10; 34:18; Isaias 41:10; ken Roma 8:38, 39.

Matulongannaka ti Sao ti Dios kadagiti narigat a kasasaad

MAIKADUA A PROBLEMA: PANNAKILANGENMO ITI DATI NGA ASAWAM.

Kuna ni Juliana a nakidiborsio kalpasan ti 11 a tawen a panagasawana: “Kiniddawko ken lakayko  a dinak panawan. Ngem idi pinanawannak, nakapungtotak kenkuana ken iti babai a kabbalayna.” Adu a nakidiborsio ti makapungtot pay laeng kadagiti dati nga assawada uray adun a tawen ti naglabas. Ngem mapilitanda latta a makisarita nangruna no adda annakda.

NO ANIA TI MAARAMIDAM

  • Nasayaat koma laeng ti pannakilangenmo iti dati nga asawam. Masapul a direkta ken dagiti laeng napateg a banag ti pakisaritaam. Natakuatan ti dadduma a nagsayaat daytoy a pamay-an tapno mataginayon ti talna.Roma 12:18.

  • Liklikam ti makapasakit a sasao. Nangruna no mariknam a pabasolennaka, iyaplikarmo ti nainsiriban a balakad ti Biblia: “Ti asinoman a mangmedmed iti sasaona agtagikua iti pannakaammo.” (Proverbio 17:27) No saanen a nasayaat ti saritaanyo, mabalinmo nga ibaga: “Panunotek pay nga umuna ti imbagam, satanto agsarita.”

  • No mabalbalin, dagidiay laeng pakaseknam ti pagsaritaanyo iti dati nga asawam a pakairamanan ti legal, pinansial, ken medikal a rekord.

PADASEM DAYTOY: Iti sumaruno a pannakisaritam iti dati nga asawam, siputam dagiti gundaway nga agpinnapilitkayo iti rason. No kasapulan, isardengyo pay laeng ti agtungtong wenno agtungtongkayo laengen babaen ti e-mail.—Proverbio 17:14.

MAIKATLO A PROBLEMA: TULONGAM DAGITI ANNAKMO A MAKIBAGAY.

Malagip pay ni Maria ti kasasaadna kalpasan a nakidiborsio: “Kanayon nga agsangit ti inaudi a balasangko ken agisbo manen iti iddana. Ken nupay ilimlimed ti inauna a balasangko ti riknana, madlawko a maladingitan.” Mabalin a mariknam nga awan ti tiempo wenno pigsam a tumulong kadagiti annakmo no kasapulandaka unay.

NO ANIA TI MAARAMIDAM

  • Paregtaem dagiti annakmo nga ibagada ti riknada, nupay mabalin a makapasakit ti ibagada.—Job 6:2, 3.

  • Itungpalmo ti akemmo. Nupay kasapulam ti emosional a tulong ken sidadaan a dumngeg ti anakmo, saan nga umiso nga agpatulongka kenkuana a mangsolbar iti problemam. (1 Corinto 13:11) Saan a ti anakmo ti agbalin a rangtay iti pannakisaritam iti dati nga asawam.

  • Pagbalinem a nasayaat ti biag ti anakmo. Makatulong no kaduam dagiti annakmo iti maymaysa a balay ken saan nga agbaliwbaliw ti iskediulyo. Ngem kangrunaan ti amin, itultuloyyo ti naespirituan nga aktibidadyo kas iti panagbasa iti Biblia ken panagdaydayaw ti pamilia.Deuteronomio 6:6-9.

PADASEM DAYTOY: Iti daytoy a lawas, ibagam kadagiti dagiti annakmo nga ipatpategmo ida ken saan nga isuda ti makagapu a nagdiborsiokayo. Sungbatam dagiti saludsodda nga awan ti babbabalawem.

Mabalinmo ti mangabaruan kalpasan ti diborsio. Kuna ni Melissa a nakidiborsio kalpasan ti 16 a tawen, “Idi nakidiborsioak, kinunak, ‘Diak kayat ti kastoy a biag.’” Itan, nupay diborsiado, kontenton iti kasasaadna. Kunana, “Naragsakakon ta linipatkon ti napalabas.”

^ par. 2 Nabaliwan ti dadduma a nagan iti daytoy nga artikulo.

^ par. 18 Kagura ti Dios ti nasikap a panangidiborsio. Ngem no nakikamalala ti maysa, ipaay ti Dios ti kalintegan nga agdesision iti matalek nga asawa no makidiborsio wenno saan. (Malakias 2:16; Mateo 19:9) Kitaem ti artikulo a “Ti Panangmatmat ti Biblia—Aniat’ Diborsio a Guraen ti Dios?” iti Pebrero 8, 1994 a ruar ti Agriingkayo! nga impablaak dagiti Saksi ni Jehova.

ISALUDSODMO ITI BAGIM . . .

  • Adda kadi tiempok a mangipeksa iti ladingitko?

  • Kasanok a mailiwliwag ti sakit ti nakemko iti dati nga asawak?